Read lunyore 1 BAKORINTHO 10 Bible Online

1 BAKORINTHO 10 - lunyore bible

1 BAKORINTHO 10

¹Abaana befwe, nzenya mumanye mbu abakuka befwe bosi bali hasi wobulindi bwelilumbesi, khandi bosi bambukha inyanza obulahi.

²Bosi babaputiswa okhukholwa aba Musa mwilumbesi nende munyanza.

³Bosi balia khubiokhulia bilala ebiomwoyo,

⁴nibanywa khubiokhunywa bilala ebiomwoyo, okhuba banywa khulwanda lwomwoyo olwatsia n'nabo; nolwanda tsana lwali Kristo.

⁵Nebutswa abenji khubo sibayanzisia Nyasaye tawe, khulwako bamululwa musitsiimi.

⁶Ne amang'ana yako kosi nebilolelo khwifwe, mbu khulekhenge okhwekomba amang'ana amabi, singa yabo olwa bali okhwekomba.

⁷Murekayakayanga emisambwa, singa obwa bandi khubo bakhola tawe, singa Amahandiko kaboolanga, “Abandu bekhala nibalia, nibanywa nibasinjila okhusina.”

⁸Kata khuraheya, singa abandi khubo baheya, ma litukhu elala abandu etsielefu amakhumi kabili natsitaru nibafwa.

⁹Khurateema Omwami, singa abandi bamuteema niberwa netsinzokha.

¹⁰Kata khuretsulil'la singa abandi khubo bali okhwetsulil'la nibatibibwa nende Om'malaika wolufu.

¹¹Amang'ana yako kabakwila kabe esilolelo khubandi, nikahandikwa khulwa okhuchetsiyia ifwe abali munyinga tsino olwe esihesi sili ahembi okhwola.

¹²Uyo opaalanga mbu uraliye yehenge bulahi mbu alekhe okhukwa.

¹³Amateemo kamwanyooye nakang'ayile khubandu. Nyasaye nomusubilwa, naye sialahuchil'la muteemwe okhuyomba tsingufu tsienywe tawe. Nebutswa halala nende okhutemwa khwene, alamuhelesia tsingufu tsiokhwefwila, ma munyoole injila yokhuhonokokha.

¹⁴Khulwe yako, abalina banje, mwehanye okhwekayakaya emisambwa.

¹⁵Mboolanga n'nenywe singa abandu abachesi, muchele abene akamboolanga.

¹⁶Khupilanga Nyasaye embwo khulwe esisanda sielisabo lio Mwami, ne olwa khusinywetsanga khusanganga halala mumatsahi ka Kristo. Ne olwa khulitsanga omukaati okwa khumekanisie, khusanganga mumubili kwa Kristo.

¹⁷Ifwe, kata olwa khuli abenji, khuli omukaati mulala, omubili mulala, sichila fwesi khukabana khumukati mulala.

¹⁸Paalekhwo khubandu Baisiraeli; yabo abalitsanga ebiokhulia ebihan'nwe khumulimo kwa Nyasaye khulusambwa.

¹⁹Kho mboolanga mbwena? Mbu emisambwa kata ebiokhulia ebihan'nwe khumisambwa nesindu?

²⁰Tawe, Nebutswa mboolanga mbu ebindu biabetsimbia tsindi bahaananga singa omusango, bihanwanga khubisieno, sibahaananga khu Nyasaye tawe. Nase sinyenya inywe okhusanga nende ebisieno tawe.

²¹Simunyala okhunywa musisanda sio Mwami, khandi munywe es'sanda siebisieno tawe. Simunyala okhusanga khumesa yo Mwami, khandi khumesa yebisieno tawe.

²²Nohomba khwenyanga okhuchema Omwami abe neimbalikha? En'no khupaalanga mbu khuli abakufu okhuyomba Omwami?

²³“Ebindu biosi nebilahi,” Yee, nebutswa ebindu biosi sibili nobukhonyi tawe. “Ebindu biosi nebilahi;” nebutswa biosi sibiombokhanga tawe.

²⁴Omundu alekhe okhuruna akobukhalabwe konyene, nebutswa siomundu arune akobukhala bwabasie.

²⁵Muli abalakhule okhulia biosi ebikulwanga musiiro sila amarebo khulwo omwoyo.

²⁶Okhuba singa Amahandiko kaboolanga, “Esibala nende ebindu biosi ebili mwo nebia Nyasaye.”

²⁷Omundu orali omusubili namwinjisia khubiokhulia ma muhuchil'le okhutsia, lie siosi esilerwa imbeli wenywe sila okhurebelesia khulwo omwoyo tawe.

²⁸Nebutswa omundu naba namubool'la, “Ebiokhulia yibi biahan'nwe omusango khumisambwa,” kho muralia ebiokhulia yibio tawe khulwa uyo omubooleye khandi khulwo omwoyo.

²⁹Omwoyo sikuli okwenywe tawe, nebutswa nokwomwene uyo. Omundu alareeba: “Esiakhachila obulakhuule bwanje bukhalachilwe esiina namakani komundu undi nisina?

³⁰Nimba nikhupila Nyasaye embwo khulwa ebiokhulia bianje, busina omundu yanzekule khubiokhulia ebia khupiye embwo?”

³¹Kho liosi eliamukhola, kata mukhulia nohomba okhunywa, mukhole ebindu biosi khulwa obukhongo bwa Nyasaye.

³²Murahana omunyakhano khu Bayahudi nohomba khu Betsinzibulo tsindi nohomba khwikanisa lia Nyasaye tawe.

³³Khole butswa singa obwa nase kholanga; ndeemanga okhuyanzisia abandu bosi mukosi aka kholanga, nirahendela khwo obulahi bwanje omwene, nebutswa obulahi bwabandu bosi mbu nabo bakhahonibwa.