Read lunyore 1 BAKORINTHO 11 Bible Online

1 BAKORINTHO 11 - lunyore bible

1 BAKORINTHO 11

¹Mulonde okhukhola khwanje, singa obwa nase nondanga okhukhola khwa Kristo.

²Mwitsoomianga inywe sichila munzitsul'langa khasotso nimulonda amebaalo kanje akandamuha.

³Nebutswa nzenya mumanye mbu omurwe kwomundu wosi ni Kristo, omurwe kwomukhasi wosi nomusaatsa, ne omurwe kwa Kristo ni Nyasaye.

⁴Omusaatsa wosi naba nasaaya Nyasaye, kata naba naboola amang'ana ka Nyasaye mukhwekayakaya nafuunikhile omurwekwe, asimbianga Kristo omurwe oli omurwe kwe.

⁵Ne omukhasi wosi naba nasaaya Nyasaye kata okhuboola amang'ana ka Nyasaye mukhwekayakaya narefuunikhile omurwe, kho asimbianga omusaatsawe omurwe; siyabukhan'ne nende obekelwe omurwe tawe.

⁶Omukhasi naba narefuunikha omurwe, kho, busina arakhabekele liswi? Ne nikaba nikali nes'simba murwe khumukhasi okhukhalakwa liswi kata okhubekwa, kho yefuunikhe omurwe.

⁷Omusaatsa siakwan'ne okhwefuunikha omurwe tawe, okhuba ye nelikondo lia Nyasaye nende okhufwana khwoluyalilwe. Nebutswa omukhasi nobukhongo bwomusaatsa;

⁸sichila omusaatsa siyarula khumukhasi tawe, nebutswa omukhasi niye owarula khumusatsa.

⁹Kata omusaatsa siyalombwa khulwa omukhasi tawe, nebutswa omukhasi yalombwa khulwo omusaatsa.

¹⁰Niko akachila omukhasi akwana okhufuunikha omurwekwe okhuba nesilolelo mbu ali hasi woburuchi bwomusaatsawe khulwa abamalaika.

¹¹Kata mbwo, mubulamu bwefwe mu Mwami, omukhasi sali khububwe sila omusaatsa, kata omusaatsa sali khububwe sila omukhasi tawe.

¹²Okhuba singa obwa omukhasi yalombwa okhurula khumusaatsa, nimbwo omusaatsa yebulwa nomukhasi, ne ebindu biosi bialombwa na Nyasaye.

¹³Khalakekhwo inywe abene, omukhasi akwana okhusaaya Nyasaye narefuunikhile omurwe?

¹⁴Ne okhulongwa khwene sikhumwibaal'langa mbu omusaatsa naba nali neliswi lirambi nes'simba murwe khuye.

¹⁵Nebutswa omukhasi olwa ali neliswi lirambi noluyali khuye, sichila yahebwa liswi yilio libe esiokhwefuunikha.

¹⁶Nebutswa omundu wosi naba niyenya okhuleera amahingane, akandakhaboola kali mbu ifwe nohomba kata amakanisa ka Nyasaye sikhuli neifwo yindi yosi eyokhwekayakaya tawe.

¹⁷Mumang'ana akanyenya okhumulaka luno simwitsomianga tawe, sichila okhubukana khwenywe khulwa okhwekayakaya sikhuleranga obulahi tawe, nebutswa khuleranga obubi.

¹⁸Eliokhuranga mbuliye mbu olwa mubukananga mukanisa, mwabukhananga abene khubene, ne nase khandi subilanga khwo mbwo.

¹⁹Okhwabukhana okhwola khubeho mwinywe, kho abali abatooto bamanyikhe khwinywe.

²⁰Olwa mubukananga halala, esiamulitsanga silili kata Lisabo lio Mwami tawe.

²¹Okhuba mukhulia khwenywe buli mundu atsitsachil'la okhulia ebiokhulia, kho abalala bali inzala ne abandi nibekur're.

²²Mubula netsingo omwa munyala okhulia nokhunywa mutsinyumba tsienywe? Nohomba muchaayanga likanisa lia Nyasaye, nimubasimbia abatakha emirwe? Mwenyanga mubool'le mbwena? Mbu mwitsoomie inywe? Siahene sindakhamwitsomia tawe.

²³Okhuba ndanyoola khu Omwami amebaalo aka ndamuha inywe: mbu mubutukhu bwene yibwo obwa Omwami Yesu yasieman'nwamwo yabukula omukaati,

²⁴nakhupila Nyasaye embwo, nakumekania naboola mbu, “Kuno nomubili kwanje okwahanwa khulwenywe. Mukholenje mbwo khulwo okhunzitsul'la.”

²⁵Khandi mbwo olwa bali nibama'le okhulia, yabukula es'sanda, naboola mbu, “Es'sanda sino nisio indakano ya Nyasaye imbia eyakholwa khulwa amatsahi kanje. Mukholenge mbwo buli lwosi olwa munywa khwo khulwo okhunzitsul'la ise.”

²⁶Yaka kamanyianga mbu lwosi olwa mulia khumukaati kuno, nimunywa khus'sanda sino, muribulanga okhufwa khwo Mwami okhwola olwa alitsa.

²⁷Khulwe yako, omundu wosi naba nalia khumukati, nohomba nanywa khus'sanda sio Mwami munjila yesifwabwi, alaba nesikha khumubili nende amatsahi ko Mwami.

²⁸Kho omundu yehenge omwene, ma kho alie khumukaati yikwo khandi anywe khus'sanda.

²⁹Okhuba naba nalia khumukaati, ne naywa khus'sanda naramanyilisianga esifune siomubili kwo Mwami yeler'ranga esiina olwaba nalia nanywa lisabo lio Mwami.

³⁰Niko akachila obwinji bwenywe nibatekhelana khandi nibalwala, nabandi khwo nibafwa.

³¹Nikhuba nikhwehenga ifwe abene singa obwa kali, sikhwakhaleerwa imbeli wesiina sia Nyasaye tawe.

³²Nebutswa khuyaalwa nikhukhalachilwa esiina nende Omwami kho khulekhe okhukhalachilwa esiina halala nende abesibala.

³³Niko akachila, abaana befwe, olwa mubukananga okhulia lisabo lio Mwami mulindanenje.

³⁴Omundu wosi naba niyakhaba inzala alie ingo, kho mubule okhukhalachilwa esiina na Nyasaye olwa mubukana halala. Akandi kosi ndakhakakhole olwa ndiba ninzitsile.