Read lunyore 1 BAKORINTHO 12 Bible Online

1 BAKORINTHO 12 - lunyore bible

1 BAKORINTHO 12

¹Abaana befwe, singa obwa mwamandichila khumang'ana kebihanwa bio Mwoyo Omutsienukhu ndekombanga mumanye obwatooto bwabio.

²Mumanyile mbu olwa mwali nimusili okhuba abasubili mwemel'lwa nimukosibwa munjila tsinyinji okhwekayakaya emisambwa echirali nobulamu.

³Nyenyanga mumanye mbu omundu wosi owemel'lwanga nomwoyo wa Nyasaye, sanyala okhuboola mbu, “Yesu alaamwe!” Khandi omundu wosi sanyala okhuboola mbu, “Yesu niye Omwami” ne naremeleywe no Mwoyo Omutsienukhu tawe.

⁴Biliho ebihanwa lukano na lukano, nebutswa Omwoyo ohananga nimulala.

⁵Buliho oburumikhi lukano na lukano, ne Omwami orumikhilwanga nimulala.

⁶Buliho obukholi lukano na lukano ne Nyasaye nimulala okholanga kosi mubandu bosi.

⁷Siomundu ahebwanga okhubisula khwo Mwoyo khulwa okhukhonyel'la bosi.

⁸Omwoyo ahetsanga omundu mulala amang'ana kobuchesi noundi amang'ana kokhumanyilisia singa Omwoyo tsana ayanzanga.

⁹Omwoyo ahetsanga oundi obusubili, noundi amuhetsanga obunyali bwokhuhonia abalwaye.

¹⁰Ahetsanga mulala obukholi bwamangalimwa, noundi oburoobi, noundi okhumanyilisia ebihanwa ebirulanga khu Mwoyo Omutsienukhu nende ebirarulanga khwo. Ahetsanga oundi okhul'loma mutsinimi lukano na lukano, noundi obukaluli bwetsinimi.

¹¹Ne yako kosi nobukholi bwo Mwoyo mulala mwene uyo, okabilanga siomundu lukano lukano singa Omwoyo mwene alaliye.

¹²Singa obwomubili kuli mulala ma kuli nebitonye ebinji, khandi singa ebitonye biomubili bili ebinji khumubili mulala, nimbwo Kristo ali omubili mulala okuli nebitonye ebinji.

¹³Ifwe fwesi khwabaputiswa no Mwoyo mulala okhulomba omubili mulala, Abayahudi kata Abetsimbia tsindi, abahambe kata abalakhule bosi banywesibwa khu Mwoyo mulala mwene uyo.

¹⁴Omubili sikuli esitonye silala tawe nebutswa kuli nebitonye ebinji.

¹⁵Ne esilenje nisiba nisiboola mbu, “Sichila ise sindi omukhono tawe, kho sindi esiokhumubili,” kho yako sikachila nisirabba esiokhumubili tawe.

¹⁶Ne esirwi nisiba nisiboola mbu, “Sichila ise sindi imoni tawe, kho sindi esiokhumubili,” kho yako sikachila nisirabba esiokhumubili tawe.

¹⁷Ne omubili kwosi nikwakhabeye imoni, khane kwakhahuliye mbwena? Ne omubili kwosi nikwakhabeye esirwi, khane kwakhahunyilisisie mbwena?

¹⁸Nebutswa singa kali, Nyasaye yabikha siesitonye siomubili singa obwo omwene ayanzanga.

¹⁹Ne ebitonye biosi nibiakhabeye esitonye silala, omubili kundi kwakhabeye hena?

²⁰Nebutswa singa kali, ebitonye nebinji ne omubili nimulala.

²¹Kho imoni sienyala okhubool'la omukhono mbu, “Ibe sikhwenya tawe” kata omurwe sikunyala okhubool'la ebilenje mbu, “Inywe simwenya tawe!”

²²Nebutswa ebitonye yibio ebiomubili ebilolekha singa ebitofu, biosi bienyekhanga.

²³Khandi ebitonye yibio ebiomubili ebiakhupaalanga khwo mbu bibula oluyali, ebiene yibio khubihetsanga oluyali olukali ne ebitonye ebiralolekhanga mbu nebilahi, nibio ebia khulindanga bulahi.

²⁴Ebitonye ebilahi sibitakha okhuhendelwa tawe. Nyasaye yahambania omubili halala munjila eyokhukoosia esitonye esirali nolukoosi.

²⁵Ne kho obwabukhani sibuliho mumubili, nebutswa mbu ebitonye biosi bikhonyanenge.

²⁶Ne esitonye silala olwa sisal'la, ebitonye bindi biosi bisal'langa halala n'nasio, kata esitonye silala nisiba nisihebwa oluyali, ne ebitonye bindi biosi bisangala halala n'nasio.

²⁷Inywe mwesi muli omubili kwa Kristo, khandi siomundu ali esitonye siakwo.

²⁸Mukanisa, Nyasaye yela olwokhuranga abarumwa, olwakhabili abaroobi, olwakhataru abebaali, ma abokhukhola akamangalimwa, abokhuhonia abalwaye, ma abakhonyel'li,[1] abemeli, nende abokhul'loma mutsinimi lukano na lukano.

²⁹Kho bosi nabarume? Bosi nabaroobi? Bosi nabebaali? Bosi bakholanga akamangalimwa?

³⁰Bosi bali nebihanwa biokhuhonia? Bosi bal'lomelanga mutsinimi? Bosi bakalulanga akabooywe?

³¹Ne rekhwo emioyo okhwenya ebihanwa ebili ebiobuha okhusila. Khandi ndamumanyia injila indahi okhusila.