Read lunyore 1 BAKORINTHO 13 Bible Online

1 BAKORINTHO 13 - lunyore bible

1 BAKORINTHO 13

¹Nimba nin'noma mutsinimi tsiabandu nende etsia abamalaika, nebutswa nirali nobuyanzi, ndi butswa singa omukasa okulanjil'langa nohomba likhuli elisal'lananga.

²Khandi nyala okhuba nesihanwa siobukambi obweyinikhu nimanya amabiso kosi nende obumanyi bwosi; nyala okhuba nobusubili bwosi obwenyekhananga okhusimula ebikulu, ne nirali nobuyanzi sindi esindu tawe.

³Nyala okhuhinia emiandu chianje chiosi ningabul'la abatakha khandi nyala okhuhana omubili kwanje kusambwe mumul'lo, ne nirali nobuyanzi, sikangasila esindu tawe.

⁴Obuyanzi bwesimilisianga nibukhola aketsimbasi; obuyanzi sibuli neimbalikha nohomba okhwekhonya kata okhutsalikha tawe.

⁵Obuyanzi siburunanga akarakwan'ne tawe. Sibukhaabanga akabwo obwene tawe. Sibusinyikhanga tawe, sibwitsul'langa amabi kabukhol'lwa tawe,

⁶obuyanzi sibusangal'la amabi tawe, nebutswa busangal'langa obwatooto.

⁷Obuyanzi bwefilanga mu kosi, busubilanga kosi, bunayanga mumang'ana kosi, bwetinyilisianga mubindu biosi.

⁸Obuyanzi sibuhwetsanga tawe. Oburoobi nibuliho bwakhahwe. Tsinimi nitsiba nitsisiliho tsiakhahwe. Kata obuchesi nibuba nibuliho bwakhahwe.

⁹Obuchesi bwefwe nobuleemu, khandi oburoobi bwefwe nobuleemu;

¹⁰nebutswa olwe yako akali amahesikhu kakhetse, ne akali amaleemu kakhahweho.

¹¹Olwa ndali nindi omwana, ndaboolanga singa omwana, ndapaalanga singa omwana khandi ndehul'langa singa omwana; ne lunondi olwandi omundu okhul'le, sisili khandi mulwana tawe.

¹²Luno esiakhulolanga ni singa likondo lifwilil'lu musilang'i, nebutswa olunyuma khulilolana moni namoni. Lunondi ndamanya matititi, nebutswa olunyuma ndakhamanye kosi singa Nyasaye yamanya ise kupu.

¹³Kho akahindilanga nikataru mbu obusubili, obunaayi, obuyanzi, ne eliyomba kosi khuko nobuyanzi.