Read lunyore 1 BAKORINTHO 14 Bible Online

1 BAKORINTHO 14 - lunyore bible

1 BAKORINTHO 14

¹Mulondel'le obuyanzi. Murune nesinani ebihanwa bio Mwoyo, nokhusila muno esihanwa siokhuribula amang'ana ka Nyasaye.

²Omundu ol'lomelanga mutsinimi sial'lomanga nabandu tawe nebutswa na Nyasaye, sichila abulaho omuhul'langa. Aboolanga amabiso kobwatooto mubunyali bwo Mwoyo.

³Nebutswa uyo oribulanga amang'ana ka Nyasaye al'lomanga nabandu nabahelesia obukhonyi, obuchetsiyi, nende obuhotselesi.

⁴Ol'lomanga mutsinimi yeyombokhanga omwene, ne oribulanga amang'ana ka Nyasaye yombokhanga likanisa.

⁵Nase ndakhenya mbu mwesi mul'lomele mutsinimi, nebutswa okhusila muno muribule amang'ana ka Nyasaye. Omundu oribulanga amang'ana ka Nyasaye ayomba uyo ol'lomelanga mutsinimi, fwana naba naliho omundu okalukhania akaboolanga mbu abasubili bosi bombokhwe.

⁶Kho abaana befwe, nimba ninzitsa khwinywe nin'nomelanga mutsinimi ndakhamukhonya sina? Esindu tawe, fwana nimba nimuribul'la okhubisulwa okhurula khu Nyasaye nohomba akobumanyilisi, nohomba amang'ana ko Mwoyo nohomba okhwibaala.

⁷Kata ebindu nabindu ebirali nobulamu ebiamayoosi singa lilele nohomba litungu mbiba nibirakhabukhana mumayoosi, kho olwembo lwene olukhupwa khwilele nohomba khwitungu omundu yakhalumanya mbwena?

⁸Khandi omundu okhupanga olwika naba naralukhupa obulahi, kho niwina owakherechekhela lihe?

⁹Nenywe mbwo, omundu yakhamanyilisia mbwena akamul'lomanga nikaba mbu amang'ana akamuribulanga mutsinimi sikakhahul'likha bulahi tawe? Okhuba muboolanga nikabira butswa.

¹⁰Tsiliho tsinimi tsinyinji musibala, nebutswa lubulaho kata l'lala olubula nesifune sialwo.

¹¹Kho nimba niramanyilisia ol'limi olwo uyo al'lomanga, khe mba nindi omucheni khumundu uyo, naye khandi nali omucheni khwise.

¹²Nenywe mwesi mbwo, olwa muli nokhwonyonywa okhunyoola ebihanwa bio Mwoyo, okhwola muteme okhuyomba kosi okhurumikhila okhusila yibio ebiokhwombokha abasubili.

¹³Khulwe yako, omundu ol'lomelanga mutsinimi asaaye mbu anyal'lwe okhwinoosia akaboolanga.

¹⁴Okhuba nimba nisaayila mutsinimi, omwoyo wanje niye osaayanga, ne amakani kanje sikahambanangamwo tawe.

¹⁵Khe khole sina? Ndakhasaayanga nende Omwoyo wanje khandi ndakhasaaya namakani. Ndakhembanga nende Omwoyo khandi nyembe nende amakani.

¹⁶Olwa okhupilanga Nyasaye embwo mumwoyo butswa, omundu namundu oli halala mubusaayi yibwo yakhanyala mbwena okhukalusia mbu “Amina” mukhukhupa embwo khukhwo. Sali neinjila yosi okhumanya akoboolanga tawe.

¹⁷Kata nikaba okhusaaya khwokhukhupa embwo khu Nyasaye nikhuli okhulahi ne oundi uyo siakhonyelwe tawe.

¹⁸Khupilanga Nyasaye embwo, sichila n'nomanga mutsinimi okhuyomba inywe mwesi.

¹⁹Nebutswa mukhwekayakaya khwomukanisa ndakhayanza okhuboola amang'ana karano akahul'likha mbu mbebaal'le abandi okhuyomba okhubool'la mutsinimi amang'ana etsielefu likhumi.

²⁰Abaana befwe, murabba singa abaana mukhupaala khwenywe tawe. Mube abaana mukokhukhola obubi, nebutswa mumapaalo mube abakhulundu.

²¹Kahandikwa mu Mahandiko mbu Omwami yaboola, “Ndakhabool'lane nabandu bano mubandu betsinimi tsinjeni, khandi ndakhal'lomele muminwa chiabandu abacheni, ne kata mbwo sibalambul'la tawe.”

²²Kho esihanwa esiokhul'lomela mutsinimi nesilolelo siobunyali bwa Nyasaye khu yabo abarali abasubili, tawe khubasubili, ne esihanwa siokhuribula amang'ana ka Nyasaye nesilolelo khubasubili, tawe khubarali abasubili.

²³Kho abelikanisa bosi nibaba nibabukan'ne halala, ma bosi nibal'lomanga mutsinimi, ne abandu nabandu butswa, kata abarali abasubili nibaba nibenjilamwo, sibakhaboola mbu muli abalalu?

²⁴Nebutswa bosi nibaba nibaribula amang'ana ka Nyasaye olwomundu orali omusubili, kata omundu namundu butswa yenjila mwo kosi akahul'la kamwitsusia tsimbi tsitsie, kosi akahul'la kalamukhalachila esiina.

²⁵Akamasilisi akomumwoyokwe kalabakalwa habulafu, ma alakwa hasi mafung'ama namwekayakaya Nyasaye, naboola mbu “Tooto mwene Nyasaye ali halala n'nenywe.”

²⁶Abaana befwe akamboolanga ngakano. Olwa mubukana mukanisa halala, khulwa okhwekayakaya, mulala abe nolwembo oundi obwibaali, noundi amabiso okhurula khu Nyasaye, oundi amang'ana mutsinimi, noundi okhwinoosia akabooywe mutsinimi. Amang'ana kosi okhwola kabe akokhukhonya likanisa.

²⁷Omundu wosi naba nal'lomela mutsinimi, babe babili nohomba bataru bonyene, simulala simulala, ne abeho onyala okhwinoosia akabooywe.

²⁸Ne naba nabulaho onyala okhwinoosia, kho omundu ol'lomelanga mutsinimi abune mwikanisa ma yel'lomele omwene butswa nende Nyasaye.

²⁹Abokhuribula amang'ana ka Nyasaye nabo baboole babili nohomba bataru, nabandi bachele amang'ana kabwe.

³⁰Nebutswa omundu owikhaye mukanisa naba nabisul'lwa ling'ana na Nyasaye kho owokhuranga abune.

³¹Mwesi munyala okhuribula amang'ana ka Nyasaye simulala, simulala, mbu bosi beke amang'ana khandi bosi bakufuhasibwe.

³²Esihanwa siokhuribula amang'ana ka Nyasaye sirukwanga nomundu ol'lomanga,

³³sichila Nyasaye sali Nyasaye owobukoyanu tawe nebutswa owomulembe. Singa obwa kali mumakanisa kosi akabandu ba Nyasaye,

³⁴abakhasi basiling'anenje mumabukana. Sibahuchil'lwanga okhul'loma tawe, nebutswa bahul'lenge nibelela singa obwa Malako ka Musa kaboolanga.

³⁵Ne nisiliho esindu siosi esiabenya okhumanya, bareebe abasaatsa babwe ingo. Nes'simba murwe omukhasi okhul'loma mukanisa.

³⁶Nisina? Ling'ana lia Nyasaye liarula khwinywe ndilanda? Nohomba ninywe abalietsela mwenyene?

³⁷Omundu wosi naba napaala mbu nomurumwa wa Nyasaye nohomba ali nesihanwa sio Mwoyo okhwola amanye mbu amang'ana akamuhandichilanga kano nelilako lio Mwami.

³⁸Naba nakalechelesia, nenywe muramuhendela tawe.

³⁹Kho abaana befwe, rune nesinani okhuribula amang'ana ka Nyasaye ne murekal'la okhul'loma mutsinimi tawe.

⁴⁰Amang'ana kosi kakholwe singa obwa kakwan'ne mubuloosie obulahi.