Read lunyore 1 BAKORINTHO 15 Bible Online

1 BAKORINTHO 15 - lunyore bible

1 BAKORINTHO 15

¹Luno abaana befwe, nyenyanga okhumwitsusia Amang'ana Amalahi aka ndamukambila, nenywe nimukabukula, ma khuko obusubili bwenywe buralilanga.

²Muhonibwanga khulwako nimuba nimuhanda khuko, fwana okhusubila khwenywe nikhwali okhwa butswa.

³Ndali okhumuhelesia amang'ana kobukusi akandahebwa: mbu Kristo yafwa khulwe tsimbi tsiefwe singa Amahandiko kaboolanga;

⁴nayabilwa ma nasimukukha khwitukhu liakhataru singa Amahandiko kaboolanga;

⁵khandi yalolekhela Petero ma nende abechi likhumi nababili.

⁶Ma nalolekhela abasubili basiefwe abayomba etsimia tsirano hali l'lala, ne okhwola luno, obwinji bwabwe khubo basiliho, ne abandi bamal'le okhufwa.

⁷Ma nalolekhela Yakobo nende abarumwa bosi.

⁸Inyuma wa bosi yandolekhela ise, ise omundu ofwana uyo owebulwa munyinga erakwan'ne.

⁹Ise ndi omutititi khubarumwa bosi, kata singwan'ne okhulangwa omurumwa tawe, okhuba ndakhupia likanisa lia Nyasaye esibi.

¹⁰Ndi singa obwandi mbu khulwe esirenda sia Nyasaye. Ne esirenda esia ndahebwa sisiali esikhaya butswa tawe. Nebutswa ndatiya butinyu okhuyomba abarumwa bosi, ne sindi nise omwene tawe, nebutswa esirenda sia Nyasaye esia ndali n'nasio.

¹¹Kho nikaba nikarula khu ise, nohomba okhurula khubo, nimbwo khukambanga, khandi yaka niko akamwasubila.

¹²Luno nikhuba nikhukambanga mbu Kristo yasimukusibwa okhurula mubafu, kho khandi abandi khwinywe baboolanga mbwena mbu okhusimukukha khwabafu sikhuliho tawe?

¹³Ne okhusimukukha khwabafu nikhuba nikhuraliho, kho kata Kristo siyasimukusibwa tawe.

¹⁴Ne Kristo naba narasimukusibwa, kho okhukamba khwefwe nokhwabutswa, khandi okhusubila khwenywe nibutswa.

¹⁵Nefwe kata khunyoolekha nikhukobokhelanga akobubehi khu Nyasaye mbu yasimukusia Kristo, ne khane naramusimukusia tawe.

¹⁶Okhuba abafu nibaba nibarasimukusibwa, kho Kristo naye siyasimukusibwa tawe.

¹⁷Ne nikali Kristo siyasimukusibwa, kho obusubili bwenywe nobwabutswa, musili mutsimbi tsienywe.

¹⁸Khandi yabo bosi abasubili mu Kristo abafwa bamal'le okhutiba.

¹⁹Okhunaaya khwefwe mu Kristo nikhuba okhulahi butswa amatukhu kakhusili abalamu konyene, kho khuli abokhubeleel'lwa mubandu bosi.

²⁰Nebutswa akatooto kali mbu yasimukukha okhurula mubafu okhumanyia mbu yabo abali okhufwa bakhasimukusibwe.

²¹Okhuba singa okhufwa khwaleerwa nomundu nimbwo khandi okhusimukukha khwabafu nakhwo khwaleerwa nomundu.

²²Singa abandu bosi bafwila mu Adamu, nimbwo khandi bosi balisimukusibwa mu Kristo.

²³Nebutswa siomundu alisimukusibwa munjila ye omwene, Kristo niye owokhuranga ma olunyuma olwa yakhetse, abandu abali aba Kristo nabo bakhasimukusibwe.

²⁴Ma nilwo olwe esihesi siakhetse; Kristo alilakhul'la Nyasaye Samwana obwami, olwa aliba namal'le okhuleka obwami bwosi bwemioyo chiobubi, halala nobunyali bwosi netsingufu tsiosi noburuchi bwosi.

²⁵Okhuba Kristo akwan'ne okhuruka okhwola olwa Nyasaye aleka abasukube bosi nabareye hasi webilenjebie.

²⁶Omusuku owokhumal'likha okhulekwa nokhufwa.

²⁷Okhuba Amahandiko Amatsienukhu kaboolanga, “Nyasaye yara ebindu biosi hasi webilenjebie.” Nolwa aboolanga mbu, “Ebindu biosi” limanyikha mbu omwene uyo owabira hasiwe, sali mubindu yibio tawe.

²⁸Nolwa ebindu biosi biliba nibimal'le okhurebwa hasi webilenje bia Kristo, kho habwene yaho omwana omwene alirebwa hasi wa Nyasaye owara ebindu biosi hasiwe; ma Nyasaye aruke ebindu biosi.

²⁹Kakhabe mbwena khu yabo ababaputiswa khulwa abafu? Abafu nibaba nibarasimukusibwa tawe busina yabo babaputiswe khulwabo?

³⁰Nefwe fwesi khulwa sina nikhwekhupia esibi khasotso?

³¹Abaana befwe, mbukananga nolufu sielitukhu. Okhweitsomia okhwandi n'nakhwo khwinywe mu Mwami wefwe Yesu Kristo khunombanga okhuboola yaka.

³²Nimba nindalwana nende tsinyama nabulimo mu Efeso singa omundu namundu butswa, obukhala bwanje buli hena? Abafu nibaba nibarasimukukha khandi tawe, kho, “Lekhe khulie khunywe, sichila mukamba nakhufwe” singa kaboolwanga.

³³Murakaatwa tawe, “Okhutwaka okhubi khwononianga tsifwo tsindahi.”

³⁴Labe tsimoni mulekhe tsinjila tsiobwoni. Abandi sibamumanyile Nyasaye tawe. Mbooye mbwo okhumusimbia emirwe.

³⁵Omundu undi alareeba, “Abafu bakhasimukusibwe mbwena? Bakhabe nemibili chifwana mbwena?”

³⁶Omuhingwa ibe! Olworaakanga imwo mwiloba senyala okhumela nerafwiye mbelio tawe.

³⁷Ne esioraaka neimwo butswa inzele soraakanga omubili kwene okulibaho tawe, nebutswa oraakanga imwo inzele, neli eyamabele, nohomba eyindi yosi.

³⁸Nyasaye achihelesianga omubili singa obwa ayanzanga, ne ahelesianga sieimwo omubili kwayo kwene.

³⁹Khandi inyama yebindu ebili mwoyo sieli eyeimbila ndala tawe; abandu bali ne neimbila ndala eyomubili, netsinyama nabulimo tsili neimbila yindi, amanyonyi neimbila yindi, tsisutse natsio neimbila yindi.

⁴⁰Chiliho emibili chiomwikulu, nende emibili chiomusibala, obulahi bwemibili chiomwikulu buli khubwabwo, khandi obulahi bwechiomusibala buli khubwabwo.

⁴¹Buliho obulahi bweliuba, obwomwesi, nende obundi obwetsinyininyini, okhuba kata inyininyini yabukhan'ne nende inyininyini yasie mubukhongo bwayo.

⁴²Nimbwo okhusimukukha khwabafu khwakhabe. Omubili okuyabilwanga nokwokhubola; olwa kusimukusibwa kulaba ngubula obwonekhu.

⁴³Kuyabilwanga mwikondo libi khandi litofu, olwa kusimukusibwa kulaba mwikondo lilahi eliobunyali.

⁴⁴Kuyabilwa okwoburulanda, olwa kusimukusibwa kulaba omubili kwomwoyo. Kuliho omubili kwoburulanda; khulwe yako kuliho khandi omubili kwomwoyo.

⁴⁵Okhuba Amahandiko Amatsienukhu kaboolanga, “Omundu wokhuranga, Adamu, yalombwa omubili okuli mwoyo.” Nebutswa Omundu wokhumal'likha yali Omwoyo okuhaananga obulamu.

⁴⁶Sali owomwoyo oranjil'langa okhubaho tawe, nebutswa owoburulanda, ma olunyuma owomwoyo.

⁴⁷Omundu wokhuranga yalombwa musibala okhurula khwiloba, ne omundu wakhabili yarula mwikulu.

⁴⁸Yabo abali abomusibala bali singa omundu owalombwa okhurula khwiloba, ne yabo abali abomwikulu bali singa Uyo owarula mwikulu.

⁴⁹Singa obwa nefwe khuli nelikondo lioweliloba, nimbwo khuliebiikha likondo liomundu wokhurula mwikulu.

⁵⁰Abaana befwe, elia mboolanga ndielino mbu, inyama nende amatsahi sibinyala okhulaamilwa Obwami bwa Nyasaye tawe, kata obwonekhu sibunyala okhulaamilwa oburononekha tawe.

⁵¹Hulile, mubisul'le libiso lino; Ifwe sikhwakhafwe fwesi tawe, nebutswa fwesi khulikalukhanibwa,

⁵²bwangu mukhufunafunia khweimoni, olwolwika lwokhumal'likha lwakhakhupwe. Okhuba olwo olwika lulikhupwa, abafu bakhasimukukhe mbarali nobwonekhu, nefwe fwesi khulikalukhanibwa.

⁵³Okhuba omubili kuno okwobwonekhu kukwan'ne okhwebiikha okurononekha, khandi okufwitsanga kukwan'ne okhwebikha okurafwa tawe.

⁵⁴Kho olwo omubili kuno kwobwonekhu kuliba nikwebiikhile okurononekha, nende kuno okufwitsanga olwa kuliba nikwebiikhile okurafwitsanga, nilwo olwa akahandikwa kaliekhola mbu, “Okhufwa khumal'lwe, ne obulechi bunyoolekhele!”

⁵⁵“Ibe okhufwa, okhuleka khwo khuli hena? Ibe okhufwa, obunyali bubwo bwokhusalisia buli hena?”

⁵⁶Obunyali bwokhufwa netsimbi, nobunyali bwetsimbi na Malako.

⁵⁷Nebutswa Nyasaye aboolelwe embwo okhuhetsanga obulechi okhubir'ra mu Mwami wefwe Yesu Kristo!

⁵⁸Niko akachila abaana befwe abandayanza, muralile murasikulwa tawe. Murekhwo omwoyo okhukhola emilimo chio Mwami khasotso, sichila mumanyile mbu obunyakhani bwenywe mu Mwami sibuli obwabutswa tawe.