Read lunyore 1 BAKORINTHO 16 Bible Online

1 BAKORINTHO 16 - lunyore bible

1 BAKORINTHO 16

¹Ne amang'ana okhulondokhana nelisanjilo liokhusolol'lwa abasubili khulwa okhukhonya abandu ba Nyasaye Ebuyahudi, okhwola mukhole singa ndabool'la amakanisa akali Ebugalatia.

²Siomwihonga, simulala khwinywe abikhenge esindu khumasendi okhulondokhana nende obunyool'lo bubwe kho olwa ndakhetse lisanjilo lilabule okhusololwa.

³Olwa ndakhabe ninzol'le, ndibaruma netsibarwa abamuliba nimwel'le okhuhila ebihanwa bienywe Yerusalemu.

⁴Nikakhabe nikakwan'ne mbu nase nzieyo, kho bakhatsie halala n'nase.

⁵Ndakhetse khwinywe nimal'le okhubir'ra Makedonia, sichila kambachianga okhubir'rayo.

⁶Haundi ndimenyakhwo n'nenywe, kata okhumal'layo amatukhu kobusindu ma mulakhonye okhutsitsachil'la noluchendo lwanje hosi ahandakhatsie.

⁷Sinyenya okhulolana n'nenywe hatu butswa nimbiranga tawe. Naayanga okhumenya n'nenywe oluhono olurambi Omwami niyakhambuchil'la.

⁸Namenyekhwo Efeso hano okhwola litukhu lia Pentekoste.

⁹Omuliango kunzikukhiye omukhongo Efeso yino khulwo omulimo omulahi ngarali abasuku bokhunzikal'la nabenji.

¹⁰Timoteo naba niyetsa, mumwinjisie sila okhuria, abe mwinywe sichila akholanga omulimo kwo Mwami singa ise.

¹¹Omundu wosi aramuchaya tawe nebutswa mumukhonyel'le atsilil'le noluchendolwe nomulembe, kho yetse owandi yino okhuba mulindil'langa halala nabaana befwe.

¹²Ne khumang'ana komusubili wasiefwe Apolo, ndamutsuuba mbu amukonye halala nabaana befwe bandi; nebutswa sibuli obulalilo bwa Nyasaye luno tawe. Nebutswa yakhetse olwa aliba nanyooye obweyangu.

¹³Mube meso, muralile mubusubili, mwome ikholo, mukufuhale.

¹⁴Kosi aka mukhola, kakhol'lwe mubuyanzi.

¹⁵Abaana befwe, mumanyile Stefano nende abeinyumbaye mbu nibo abasubili bokhuranga mu Akaya, khandi bayehaana abene okhurumikhila abandu ba Nyasaye.

¹⁶Ndakhamusaaya mbu, inywe mwesi mulonde obwemeli bwabandu abafwana yabo, nende obwomundu wosi okhonyananga n'nabo emilimo chino, narumikha n'nabo.

¹⁷Sangaliye okhwitsa khwa Stefano, Foritunato, nende Akaiko, sichila betsusisie yako akandaleema okhukhola elubeka lwenywe.

¹⁸Abandu bafwana mbwo, mukwan'ne okhubetsul'langa, sichila basakulusisie omwoyo kwanje singa obwa basakulusia echienywe.

¹⁹Abasubili musitonye sia Asia bamusiesianga. Akula nende Piliskila halala nelikanisa elili munyumba yabwe bamusiesiye okhusila muno mu Mwami.

²⁰Abaana befwe bosi bamusiesisie. Musiesanie abene khubene nobuyanzi bwobuta.

²¹Ise, Paulo, mandikanga amasiesi kano nomukhono kwanje omwene.

²²Omundu wosi orayanzanga Omwami, abe musilaamo siobubi. Maranatha, Omwami wefwe yitsa!

²³Esirenda sio Mwami Yesu Kristo sibe halala n'nenywe.

²⁴Obuyanzi bwanje bube halala n'nenywe mwesi mu Yesu Kristo.