Read lunyore 1 BAKORINTHO 2 Bible Online

1 BAKORINTHO 2 - lunyore bible

1 BAKORINTHO 2

¹Nase, abaana befwe, olwa ndali okhwitsa khwinywe okhumukambila amabiso ka Nyasaye, sindaitsa nimukambila mubusitsa bwokhuboola kata obwobuchesi obukali tawe.

²Okhuba olwa ndali n'nenywe sindachooma okhumanya ling'ana lindi liosi mwinywe tawe, narali Yesu Kristo ne okhusila muno okhufwa khukhwe khumusalapa.

³Kho olwa ndali n'nenywe ndali omutofu, nindechelanga muno khulwoburi,

⁴ne okhuboola khwanje nokhukamba khwanje sikhwalimwo amang'ana kobuchesi akakhahombelesia abandu tawe, habula khwamanyibwa nobunyalibwo Mwoyo wa Nyasaye.

⁵Kho obusubili bwenywe sibweletanga khubuchesi bwabandu tawe, harali khubunyali bwa Nyasaye.

⁶Khukambanga amang'ana kobuchesi khuyabo abakhula mumwoyo, nebutswa sibuli obuchesi obwesibala sino, nohomba obunyali bwabaruchi abesibala sino, abetsa okhukosia obunyali tawe.

⁷Obuchesi bwakhumukambilanga nobuchesi bwelibiso lia Nyasaye eliabiswa okhurula khubandu elia Nyasaye yali niyamala okhwela khale khulwo oluyali lwefwe kata esibala nisisili okhulombwa.

⁸Saliho kata mulala khubaruchi besibala yisi owamanya obuchesi yibu. Abaruchi balaba nibabumanya khane sibakhamubambile Omwami wobukhongo tawe.

⁹Ne singa obwa Amahandiko kaboolanga, “Amang'ana akomundu aralolakhwo nohomba okhuhul'la, kata akomundu arapaalakhwo mbu kakhekholekha, niko aka Nyasaye yabalombela yabo abamuyanza.”

¹⁰Nebutswa kali khwifwe mbu Nyasaye yakhubisul'la libiso lilie okhubir'ra mu Mwoyo uwe orunilisianga amang'ana kosi kata akebisa musi okhusila khwichoomo lia Nyasaye.

¹¹Niwina onyala okhumanya amang'ana komundu nikurali omwoyo kwomundu uyo? Khandi nimbwo amang'ana ka Nyasaye kali! Abulaho okamanyile, narali Omwoyo wa Nyasaye.

¹²Sikhwanyoola omwoyo wesibala tawe harali Omwoyo owarumwa na Nyasaye kho khumanye amang'ana kosi aka Nyasaye yakhuha.

¹³Kho luno sikhul'lomanga amang'ana akakhwechibwa nobuchesi bwabandu tawe, nebutswa amang'ana akechesibwa no Mwoyo singa obwa khwinoosianga akatooto komwoyo khubandu abali no Mwoyo.

¹⁴Omundu orali no Mwoyo sianyoolanga ebihanwa ebirulanga khu Nyasaye tawe. Khumundu ofwana mbwo nobuhingwa khuye, kata sanyala okhukamanya tawe sichila kamanyilisibwangwa munjila yomwoyo.

¹⁵Uyo oli no Mwoyo wa Nyasaye amanyilisianga amang'ana kosi, ne omwene siakhalachilwanga nende omundu wosi tawe.

¹⁶Singa obwa Amahandiko kaboolanga, “Niwina omanyile amakani ko Mwami? Niwina onyala okhumwibaal'la?” Nebutswa ifwe khuli namapaalo ka Kristo.