Read lunyore 1 BAKORINTHO 3 Bible Online

1 BAKORINTHO 3 - lunyore bible

1 BAKORINTHO 3

¹Abaana befwe, nase sindanyala okhul'loma n'nenywe singa ndakhal'lomele nabandu abali no Mwoyo tawe. Ndal'loma n'nenywe singa abandu besibala, singa abandu abasili okhukhula mu Kristo.

²Ndali okhumunywesia amabeele, tawe ebilibwa ebiomu, sichila simwakhanyal'le okhubinyanya tawe. Ne tooto kata lunondi simunyala tawe.

³Okhuba musimenyanga singa abandu besibala bamenyenga. Olwe imbalikha nobusoolo bisili mwinywe, kho yako sikamanyianga habulafu mbu inywe musili abandu besibala nimumenyanga obulamu bwesibala?

⁴Olwa mulala khwinywe aboolanga mbu, “Ise ndi owa Paulo,” noundi mbu, “Ise ndi owa Apolo,” Kho yako sikamanyianga mbu musimenyele singa abandu besibala sino?

⁵Kho Apolo niwina? Paulo naye niwina? Ifwe khuli butswa abarumikhi ba Nyasaye abachila inywe nimusubila. Simulala khwifwe akholanga emilimo echio Mwami yamuhelesia okhukhola.

⁶Ise ndaraaka imwo, Apolo natsukhil'lakhwo amaatsi, nebutswa Nyasaye niye owachikhusia.

⁷Omundu oraakanga siali esindu, kata otsukhil'langa amaatsi siali esindu, habula Nyasaye oukhusianga.

⁸Kho oraakanga nende otsukhil'langa amaatsi nabalala; Nyasaye alirunga siomundu okhuhelana nemilimo chichie.

⁹Ifwe khuli abakholi bemilimo halala nende Nyasaye. Inywe muli omukunda kwa Nyasaye. Khandi muli eliombokho lia Nyasaye.

¹⁰Okhuhelana khusirenda esia Nyasaye yambelesia, singa omwombokhi omusitsa, ndayaba omuse ne oundi yombokhanga khwo. Ne siomundu ahenge bulahi singa obwa yombakha khwo.

¹¹Okhuba Nyasaye wamala okhura Yesu Kristo singa omuse kwonyene, ne okundi kwosi sikunyala okhuyabwa tawe.

¹²Khumuse yikhwo omundu anyala okhwombokhakhwo netsahabu, efetsa, amachina akobukusi obutinyu, emisaala, obunyasi, kata amakata.

¹³Obulahi bwemilimo chiabuli mundu bwakhamanyikhe olwe Litukhu liokhukalukha khwa Kristo liakhachiribule. Okhuba khu Litukhu yilio, omul'lo kwakhateme emilimo chia simulala nokhumanyia singa obwa chili.

¹⁴Emilimo chiomundu wosi echiayombokha khwo nichiba nichilimenya, alanyoola omurungo.

¹⁵Ne emilimo chiomundu wosi nichiba nichilikhakha, ye salinyoola esindu tawe, ne omwene alihonibwa, nebutswa singa obiriye mumul'lo.

¹⁶Siahene mumanyile mbu inywe muli Ehekalu ya Nyasaye, khandi mbu Omwoyo wa Nyasaye amenyanga mwinywe.

¹⁷Omundu wosi naba niyononia Ehekalu ya Nyasaye, Nyasaye alimwononia. Okhuba Ehekalu ya Nyasaye neinzienukhu, ne ninywe Ehekalu tsana.

¹⁸Omundu wosi alekhe okhwekaatia. Omundu wosi khwinywe naba napaalanga mbu nomuchesi khulwa amang'anake musibala muno, yekhole omuhingwa, kho abe omuchesi.

¹⁹Okhuba akesibala silolanga okhuba obuchesi nobuhingwa imbeli wa Nyasaye. Amahandiko kaboolanga mbu, “Nyasaye afumilanga abachesi mubuchesi bwabwe.”

²⁰Khandi mbu “Omwami wamanya mbu amapaalo kabachesi nakabutswa.”

²¹Khulwe yako, omundu areyitsoomia khulwa amang'ana kabandu tawe, okhuba ebindu biosi nebienywe.

²²Paulo, Apolo na Petero; esibala, obulamu, okhufwa, ebiliho luno, kata ebiitsa okhubaho biosi nebienywe,

²³nenywe muli aba Kristo, naye Kristo nowa Nyasaye.