Read lunyore 1 BAKORINTHO 4 Bible Online

1 BAKORINTHO 4 - lunyore bible

1 BAKORINTHO 4

¹Inywe mukhubale ifwe singa obwa khuli abarumikhili ba Kristo khandi abalindi bamabiso kobwatooto bwa Nyasaye.

²Abandu abalindi bakwan'ne babe abasubilwa khubami babwe.

³Khulwanje simendibwanga khulwa okhukhalachilwa esiina n'nenywe, nohomba okhukhalachilwa nabandu bandi, kata omwene sinyala okhwekhalachila tawe.

⁴Amakani kanje sikakhalachilanga esiina tawe, nebutswa yako sikaakholanga okhuba omulunji tawe. Omwami niye oukhalachilanga.

⁵Murakhalachila omundu wosi esiina inyinga nesili okhwola tawe, mulekhe okhwola olwo Mwami alitsa. Ye alibisula amang'ana akabiswa musiilima, nabakala habulafu lichoomo liemioyo chiabandu. Ma nilwo olwa siomundu alinyoola okhwitsomibwa khukhwe okhurula khu Nyasaye.

⁶Abaana befwe, rumikhiye amang'ana yaka kosi khu ifwe babili Apolo nende ise mwene singa esilolelo, kho mweke okhurula khwifwe esiamahandiko kano kaboolanga mbu, “Mulonde amalako akahandikwa.” Omundu wosi khwinywe alekhe okhutsalikha nayanza omundu mulala nachiaya oundi.

⁷Niwina owakhukhola omukhongo okhuyomba abandi? Kata nisina esioli n'nasio esia Nyasaye arakhuhelesia? Ne noba niwahebwa, otsalikhanga busina, singa orahebwa?

⁸Khane mwamal'le okhwikura? Mwamal'le okhuba abahinda? Mwamal'le okhuba abaruchi kata ifwe nikhurali mbwo tawe? Tooto siakhuha mwaba abaruchi, ma khwamihe n'nenywe halala.

⁹Khwise kafwananga mbu Nyasaye wakhukhola ifwe abarumwa okhuba abokhumal'likha khubandu bosi, singa abandu abakhalachiywe esiina siokhufwa, okhuba singa esilolelo imbeli wesibala, nabamalaika, nende abandu.

¹⁰Ifwe khuli abahingwa khulwa Kristo, nenywe muli abachesi mu Kristo! Ifwe khuli abatekhele, nenywe muli abetsingufu! Inywe muli noluyali nefwe khubula oluyali!

¹¹Kata okhwola khunyinga ya leelo ifwe khuli neinzala, nobuluho, khubula tsingubo, khukhupakwanga; khandi khuli abahuyahuyi;

¹²khunyakhananga nikhukhola emilimo namakhono kefwe abene. Olwa khunyekwanga khulamanga ikhabi, olwa khukhupibwanga esibi, khwefwilanga;

¹³nikhuchikhwa, khuboolanga amalahi. Okhwola lunondi khukholwanga singa amabibi kesibala, kata singa amakhokoro kesibala.

¹⁴Simandikanga amang'ana yaka khulwa okhumusimbia emirwe tawe, harali okhumwibaal'la singa abaana banje abandayanza.

¹⁵Kata nimuba nimuli nende abebaali abenji mu Kristo, nebutswa papa wenywe nimulala yenyene, sichila mubulamu bwa Kristo, nise owamwibula khulwa okhumukambila Amang'ana Amalahi.

¹⁶Khulwe yako, musaayanga mbu mulonde mumakulu kanje.

¹⁷Niko akachil'le nimurumila Timoteo omwana wanje omuyanzwa, khandi omusubilwa mu Mwami. Alamwitsusia injila yobulamu eyanondanga mu Yesu Kristo khandi eyanzibaalanga siahabundu mumakanisa kosi.

¹⁸Abalala khwinywe batsalikhanga nibapaala mbu sinanzitse okhumukonya tawe.

¹⁹Nebutswa nanzitse khwinywe bwangu, ma ndakhamanye yabo abatsalikhanga, tawe khulwa amang'ana kabwe, habula khulwo obunyali bwabwe.

²⁰Okhuba Obwami bwa Nyasaye sibuli obwa amang'ana butswa tawe, nebutswa nobwobunyali.

²¹Kho mwenyanga mbwena? Nzitse khwinywe neindabusi, nohomba nobuyanzi nende omwoyo kwobuhoma?