Read lunyore 1 BAKORINTHO 5 Bible Online

1 BAKORINTHO 5 - lunyore bible

1 BAKORINTHO 5

¹Siahene oluyali lwalanda mbu buliho obuheyi mwinywe, oburalikhwo kata mubandu abarali abasubili tawe. Ndabool'lwa mbu omundu amenyanga nende omukhasi wasamwana.

²Ne inywe mutsalikhanga mbwena? Mukwan'ne okhubeelela, ma owakhola ling'ana yilio ahinibwe mwinywe.

³Nase khulwanje, kata nimbulaho mumubili, nebutswa ndiho mumwoyo halala n'nenywe; ma singa obwa ndakhabeyeho, mal'le okhukhalaka esiina

⁴muliira lio Mwami Yesu khumundu owakhola ling'ana yilio. Olwa muba nimwebunjikhanga halala, nase nindi n'nenywe halala mumwoyo, mubunyali bwo Mwami wefwe Yesu,

⁵muhane omundu uyo khu Setani, mbu omubili kukwe kwononibwe, ma omwoyokwe kuhonibwe Mwitukhu tsana olwo Mwami wefwe yakhakalukhe.

⁶Okhweitsoomia khwenywe sikhuli okhulahi tawe. Simumanyile amamela amatititi kahambilanga libumbi liosi?

⁷Mwetsienule amamela ka khale ketsimbi, kho mube abasiyikhu kupu. Ma mulaba singa libumbi liyia elibulamwo amamela singa obwa nase manyile mbu muli. Singa Kristo, akhameme khomusango kwefwe kwepasaka, umal'le okhuhanwa khubwali.

⁸Kho niko akachila, khulombe lisabo ne khuralomba namamela amakhulu, kata namamela akobusuku nende obubi tawe, nebutswa nomukaati okuralimwo amamela, omukaati kwobusiyikhu nende obwatooto.

⁹Mubarwa yanje eya ndali okhumuhandichila ndamubool'la mbu mulekhe okhutsokana nabaheyi.

¹⁰Simboolanga mulekhe okhutsokana nabetsimbia bosi abali abaheyi, kata abalangu, nabanuli, kata abekayakayanga ebiniini tawe. Ngaba nikali mbwo, mwakhabeye nimukwan'ne okhurula musibala muno.

¹¹Nebutswa ndamuhandichila mbu muratsokana khwo nomundu owelanganga omukristo naba nali omuheyi, omulangu, owekayakayanga emisambwa, omunyekani, omukholwi wamalwa kata omunuuli tawe. Nohomba kata okhulia, muralitsanga nomundu oweimbila iyio tawe.

¹²Sikali akanje okhukhalachila abali esioba esiina tawe. Inywe mukwan'ne okhukhalachila yabo abali mwinywe esiina.

¹³“Omundu omubi uyo mumuhinie mwinywe.” Yabo abali esioba Nyasaye niye olibakhalachila esiina.