Read lunyore 1 BAKORINTHO 7 Bible Online

1 BAKORINTHO 7 - lunyore bible

1 BAKORINTHO 7

¹Ne luno, okhulondokhana khumang'ana aka mwamandichila: Nobulahi omusaatsa niyakhabula okhutesia.

²Nebutswa, sichila okhutemwa khwokhukhola obuheyi nokhwinji, nobulahi omusaatsa okhuba nomukhasi uwe, khandi omukhasi abe nomusaatsa uwe.

³Omusaatsa amukhol'lenje omukhasiwe akamukwan'ne ne omukhasi khandi akhol'lenje omusaatsawe akamukwan'ne.

⁴Omukhasi siali nobunyali khumubili kukwe omwene, narali omusaatsawe, khandi mbwo omusaatsa siali nobunyali khumubili kukwe omwene narali omukhasiwe.

⁵Muremanenje tawe, nikarali nimuba nimuhuchilisanisie okhwimana khwo munyinga indititi mbu mwehaane mukhusaaya Nyasaye, ma khandi mube halala, mbu Setani alekhe okhumuteema khulwa okhubula okhwelinda khwenywe.

⁶Akamboolanga kano namapaalo kanje butswa nebutswa sikali lilako tawe.

⁷Ndakhekombele mbu abandu bosi babekhwo singa ise. Nebutswa siomundu ali nesihanwasie okhurula khu Nyasaye, mulala sino noundi sila.

⁸Ne khu yabo abasili okhuteesania, nende abakhasi abalekhwa bosi, nobulahi okhumenya mbwo singa obwe ise ndi.

⁹Nebutswa nibaba nibaranyala okhwekaya, kho batesanie, sichila nobulahi okhusila okhutesania okhuyomba okhukhakha mukhwonyonywa.

¹⁰Khuyabo abateesania, ndi nelilako elirali elianje nebutswa elio Mwami mbu: Omukhasi ararula khumusaatsawe tawe.

¹¹Nebutswa naba namurulakhwo amenye narateesibwa tawe, nikarali mbwo, bahuchilisanie nomusaatsawe. Omusaatsa naye khandi arakhunga omukhasiwe tawe.

¹²Khubandi bosi ise mboolanga, (siali Omwami tawe nise:) omukristo wosi naba nali nomukhasi orali omusubili, ne naba niyahuchil'la okhumenya n'naye, kho omusaatsa alekhe okhumukhunga.

¹³Kata omukhasi omukristo naba nali nomusaatsa orali omusubili, ne naba niyahuchil'la okhumenya n'naye, kho omukhasi uyo, aralekhana nomusaatsawe uyo tawe.

¹⁴Omusaatsa orali omusubili akholwanga okhuhuchil'lwa khu Nyasaye khulwa okhuhambanibwa nomukhasiwe, naye omukhasi orali omusubili akholwanga okhuhuchil'lwa khu Nyasaye khulwa okhuhambanibwa nomusaatsawe omukristo. Kalaba nikarali mbwo, khane abaana babwe bakhabeye abesifwabwi, nebutswa luno bahuchil'lwa okhuba aba Nyasaye.

¹⁵Ne kata mbwo, orali omusubili naba niyenya okhulekhana nowasie oli omusubili, akhole mbwo. Nikali mbwo, omusaatsa omusubili nohomba omukhasi omusubili nomulakhule okhukhola mbwo. Nyasaye wakhulanga ifwe okhumenya mumulembe.

¹⁶Ibe omukhasi omusubili, omanyile mbwena noba niwakhahonia omusaatsawo? Kata ibe omusaatsa, omanyile mbwena noba niwakhahonia omukhasiwo?

¹⁷Siomundu akwana okhumenya singa obwo Mwami yamukabila, khandi singa obwa Nyasaye yamulanga. Khandi mumakanisa kosi nimbwo ndakanga.

¹⁸Omundu owasebwa naba nahuchil'la omulango kwa Nyasaye arekhola singa orasebwa. Ne omundu orasebwa naba nahuchil'la omulango kwa Nyasaye kho arakhaaba okhusebwa tawe.

¹⁹Okhusebwa kata okhubula okhusebwa sikhuli esindu tawe, nebutswa okhulinda amalako ka Nyasaye khuli nobukhala obukali.

²⁰Kho siomundu atsitsachil'le okhuba muliiba elia yalimwo olwa Nyasaye yamulanga.

²¹Olwa walangwa, wali noli omuhambe? Nobulahi, sil'li ling'ana tawe. Ne noba nonyala okhulakhulwa, olakhulwe mbwo.

²²Uyo owalangwa mu Mwami nali omuhambe, niye omulakhule wo Mwami, ne uyo owalangwa nali omulakhuule nomurumikhili wa Kristo.

²³Mwakulwa nobukusi obutinyu kho murakwa abahambe babandu tawe.

²⁴Abaana befwe, siomundu atsitsachil'le mubuhambani na Nyasaye muliiba elia yalimwo olwa yalangwa.

²⁵Ne luno okhulondokhana khumang'ana aka mwamandichila khu yabo abasili okhuteesania, sindi nelilako liosi okhurula khu Mwami khubo tawe, nebutswa mbananga amapaalo kanje singa omundu omusubilwa khulwo tsimbabasi tsio Mwami.

²⁶Kho okhulondokhana nende obutinyu obuliho luno, ise nduutsi mbu nobulahi omundu amenye singa obwa ali.

²⁷Ibe wateesia? Orakhunga omukhasiwo tawe. Ibe osili okhutesia? Oraruna okhuteesia omukhasi tawe.

²⁸Nebutswa noba noteesia, sioba nokhol'le tsimbi tawe, kata omukhaana naba natesibwa, siaba nakhol'le tsimbi tawe. Nebutswa yabo abatesania, balanyoola amatinyu akomusibala muno, ne nase ndakhenya okhumuhonia mukene yako.

²⁹Abaana befwe, eliamumbool'la ndielino mbu, tsinyinga tsititihile. Kho okhurula olwaleelo abali nabakhasi babe singa ababula n'nabo,

³⁰nabo abalakaya, babe singa abaralakayanga amasika, nabo abasangala babe singa abarasangala, nabo abakulanga babe singa ababula emiandu;

³¹nabo abanala akesibala, babe singa abaranala. Okhuba esibala sino sihwetsanga.

³²Nase ndakhenya mbu inywe murabba nesihenda mwoyo siosi tawe. Omundu orali nomukhasi ahendelanga emilimo chio Mwami obwa yakhanyala okhuyanzisia Omwami.

³³Omundu owateesia ahendelanga amang'ana kesibala obwa yakhanyala okhumuyanzisia omukhasiwe,

³⁴ma akabukhananga khabili mumapaalo kaako. Ne omukhaana orateesibwa ahendelanga amang'ana ko Mwami okhuba omutsienukhu mumubili nende mumwoyo, nebutswa omukhasi owateesibwa ahendelanga amang'ana kesibala, obwa yakhanyala okhumuyanzisia omusaatsawe.

³⁵Mboolanga kano khulwa kamukhonye, sikali muretsanga mububohe tawe, nebutswa khulwe yako akakwan'ne, khandi mbu murumikhilenge Omwami nomwoyo mulala.

³⁶Omundu naba nalola mbu siamukhol'langa omukhaana owayahamba obulahi tawe, ne omubilikwe nikumuyombel'langa ma niyenya mbu bateesanie, akhole akayenya, bateesanie. Siyakhaba nakhol'le tsimbi tawe.

³⁷Nebutswa omusaatsa nachooma mumwoyokwe okhubula okhuteesia omukhaana owayahamba, naranichilisibwa, nebutswa nanyala okhwelinda omwene, ma niyahula mumwoyokwe mbwo, kho yakhakhola obulahi muno.

³⁸Omundu oteesianga akholanga obulahi, nebutswa uyo orateesianga okholanga obulahi okhusila.

³⁹Omukhasi owateesibwa abetsanga omubohe olwomusaatsawe asiliho mwoyo; nebutswa olwomusaatsa aba namal'le okhufwa, omukhasi nomulakhuule anyala okhuteesibwa nomundu owomwene ayanzile, nebutswa omusaatsa tsana nali Omukristo.

⁴⁰Nebutswa, khulwanje ndolanga mbu yakhaba omusangalu okhusila naba namenya sila okhuteesibwa. Yitsio netsinganakani tsianje, ne subile mbu nase khandi ndi nende omwoyo wa Nyasaye.