Read lunyore 1 BAKORINTHO 8 Bible Online

1 BAKORINTHO 8 - lunyore bible

1 BAKORINTHO 8

¹Ne luno, khuhenge khumang'ana kebiokhulia ebikhol'lwe emisango khumisambwa. Khumanyile mbu fwesi khuli nobumanyi, ngarali obumanyi yibwo bukholanga abandu okhutsalikha, nebutswa obuyanzi bwombokhanga.

²Omundu wosi naba napaala mbu wamanya esindu, kho asili okhumanya esindu siosi singa akwan'ne okhumanya.

³Ne omundu wosi oyanzanga Nyasaye kho omwene uyo Nyasaye wamumanya.

⁴Niko akachila, khumang'ana akokhulia ebiokhulia ebihan'nwe singa emisango khumisambwa, khumanyile mbu omusambwa nesindu esirali nobulamu; khandi khumanyile mbu khuli nende Nyasaye mulala yenyene.

⁵Kata nibaba nibaliho abalangwa mbu “abanyasaye,” mwikulu, kata nibali musibala, singa olwa baliho “abanyasaye” abenji nende “abaami” abenji,

⁶khwifwe aliho Nyasaye mulala yenyene, niye Papa, oli omulonji webindu biosi, ne ifwe khumenyanga khulwaye. Khandi aliho Omwami mulala, mbu Yesu Kristo, ne ebindu biosi bialombwa okhubir'ra khuye, nefwe khumenyanga okhubir'ra muye.

⁷Nebutswa sibali bosi abali nobumanyi yibwo tawe. Nebutswa abandi banala akemisambwa mbu kata leelo olwa balitsanga ebiokhulia ebihan'nwe singa emisango khumusambwa basipaalanga butswa mbu nebiemisambwa. Emioyo chiabwe nemitekhele, ma behul'la mbu bononekhanga khulwe ebiokhulia biemisango.

⁸Ne ebiokhulia sibilikhusunda ahembi khu Nyasaye tawe. Nikhuba nikhuralia, sikhulema esindu tawe, kata nikhuba nikhulia, sikhumeetekha esindu tawe.

⁹Nebutswa muhenge bulahi, khase obalakhuule bwenywe yibwo bwakhachila abatekhele mubusubili bakwe mutsimbi.

¹⁰Omundu naba nakhulola ibe ouli nobumanyi, niwikhaye nolitsanga khubiokhulia mu hekalu yemisambwa, naye nali omutekhele mumwoyo, siyakhatsuubwa okhulia khubindu biemisango chiemisambwa?

¹¹Okhuba khulwa okhumanya khukhwo, okosianga oli omutekhele mumbusubili, omwana wefwe owa Kristo yafwila.

¹²Kho olwa mwononinjia abasubili basienywe, nimusalisia emioyo chiabwe echili emitekhele mbwo, kho habwene yaho mumwononinjia Kristo.

¹³Niko akachila, esiokhulia nisiba nisichila omusubili wasianje akwe mutsimbi, kho sindakhaliakhwo inyama khandi tawe, mbu ndekhe okhuchila omwana wefwe akwe mutsimbi.