Read lunyore 1 BAKORINTHO 9 Bible Online

1 BAKORINTHO 9 - lunyore bible

1 BAKORINTHO 9

¹Ise sindi omulakhuule? Sindi omurumwa? Sindamulola Yesu Mwami wefwe? Inywe simuli amakalusio khumilimo chianje mu Mwami?

²Kata nimba nirali omurumwa khubandi, nebutswa ndi omurumwa khwinywe. Inywe ninywe obukobokheli bwoburumwa bwanje mu Mwami.

³Olwabandu banzekulanga, okhwesoola khwanje khuli singa mbu,

⁴Sikambel'le okhuhebwa esiokhulia nende esiokhunywa khulwo omulimo kwanje?

⁵Sikhuli nobunyali okhuchenda halala nomukhasi omusubili singa abarumwa bandi bosi bakholanga abaana banga Omwami nende Petero?

⁶Nohomba nise nende Baranaba fwenyene abaranyala okhumenya oburakhola emilimo tawe?

⁷Niwina okholanga omulimo singa omusikari niyerunga omwene? Nimulimi sina owakharaaka emisabibu naraliakhwo khubiamo biachio? Niwina owayanga esiayo naranywakho khumabeele kasio?

⁸Kho, mboolanga amang'ana kano singa omundu namundu noho? Nako Amalako kosi sikaboolanga mbwo?

⁹Khusomanga mu Malako ka Musa mbu: Orabohanga ing'ombe omunwa olwa ehuulanga amatuma tawe. Kho nikhwo okhuboola mbu, tsing'ombe tsiene Nyasaye atsipaalangakhwo noho?

¹⁰Kho siyali naboolanga khwifwe butswa? Tooto liahandikwa khulwefwe. Omundu olima akwana okhulima nanayanga okhulia khwo kata ohulanga ahule nanayanga okhulia khwo.

¹¹Nikhuba nikhwamurachiye ebindubio Mwoyo, kho neling'ana likhongo nikhuba nikhuchesa ebindu bienywe ebiesibala?

¹²Abandi nibaba nibali nobunyali okhusanga n'nenywe khuyako, ifwe sikhuli nobwatooto okhubayomba? Nebutswa, ifwe sikhurumikhilanga obunyali yibwo tawe. Habula khwefwilanga amang'ana kosi, mbu khulekhe okhwikal'la Amang'ana Amalahi ka Kristo.

¹³Siahene inywe mumanyile mbu abakholanga emilimo chie Hekalu banyoolanga ebiokhulia biabwe okhurula mu Hekalu, nabo abakholanga emilimo chiemisango banyoolanga omukabwa kwabwe khumusango tsana.

¹⁴Khandi nimbwo Omwami yalaka mbu abakambanga Amang'ana Amalahi banyoolenje ebiokhwekhonyela khulwa Amang'ana Amalahi tsana.

¹⁵Nebutswa ise sindarumikhila obunyali yibu bwosi tawe. Kata simandikanga okhubanza mbu kakholwe khwise tawe. Bwakhaba obulahi okhufwa okhuyomba omundu wosi okhulola okhweitsomia khwanje nikhuli amang'ana kabutswa.

¹⁶Mbula nende obunyali okhweitsomia ningamba Amang'ana Amalahi, okhuba ndi nelikobi okhukamba. Ne nditsibolelwa nimba nirakamba Amang'ana Amalahi kano.

¹⁷Nimba nikhola mbwo khulwa okhulalila khwanje omwene, ndakhanyoola omurungo, nebutswa nimba nirakhola khulwa okhulalila khwanje, nomulimo okwandahebwa.

¹⁸Kho omurungo kwanje nisina? Nobulakhuule bwokhukamba Amang'ana Amalahi butswa sila omurungo kwosi, nirabbanza omurungo khulwa okhukamba Amang'ana Amalahi.

¹⁹Ndi omulakhule khubandu bosi, nebutswa ndekholanga omuhambe wabosi kho nyol'le Kristo abandu abenji.

²⁰Olwa kholanga emilimo mu Bayahudi, ndekhola singa Omuyahudi, kho nyoole Abayahudi. Olwa kholanga emilimo halala nabali hasi wa Malako ka Musa ndekhola singa oli hasi wa Malako, kho mbanyoole kata olwe ise mwene rali hasi wa Malako tawe.

²¹Khubetsimbia tsindi abali esioba wa Malako, ndekholanga singa oli esioba wamalako. Ne nirali esioba wamalako imbeli wa Nyasaye, nebutswa tooto mwene ndi hasi wamebaalo ka Kristo, kho nyoole abarali Abayahudi.

²²Khubatekhele mubasubili, ndekholanga singa omutekhele mubusubili mbu mbanyoole abali abatekhele. Ndekholanga oweliuba liosi khubandu bosi, munjila tsiosi kho nyoole injila eyokhuhonia abalala khubo.

²³Kholanga yako kosi khulwa Amang'ana Amalahi, kho nase mbe omusanji mutsikhabi tsiakwo.

²⁴Siahene mumanyile mbu abelukhanga tsimbilo mbapiemana nabenji, nebutswa mulala yenyene niye onyoolanga esihanwa. Kho, mwilukhe mbwo, kho munyoole esihanwa.

²⁵Siomundu opiemananga mutsimbilo alondananga nende amalako amatinyu, kho anyoole olusimbi oluramenyanga. Nebutswa ifwe khukholanga yako khulwo okhunyoola olusimbi lweinziayo.

²⁶Niko akachila nzilukhanga tsimbilo mbwo, nindi nende okhunaya khwobulechi. Nimbwo khandi khupananga, ne sikhupananga ahakhaya butswa tawe.

²⁷Nebutswa ngufuhasianga omubili kwanje ninguruka kupu, mbu olwa ndiba nimal'le okhukambila abandu bandi, nase omwene ndabule okhulekhwa esioba.