Read lunyore 2 BAKORINTHO 1 Bible Online

2 BAKORINTHO 1 - lunyore bible

2 BAKORINTHO 1

¹Ise Paulo, omurumwa wa Yesu Kristo khulwobuyanzi bwa Nyasaye, halala nende omwana wefwe Timoteo, khumuhandichilanga inywe abasubilanga khu Nyasaye abali Korintho, halala nende abandu ba Nyasaye bosi abali habundu hosi mu Akaya.

²Nyasaye Papa wefwe nende Omwami Yesu Kristo bamuhelesie esirenda nomulembe.

³Nyasaye khandi Papa wo Mwami wefwe Yesu Kristo yetsomibwe; Papa wetsimbabasi, khandi Nyasaye okhuhelesianga okhuhotselesia khwosi.

⁴Ye akhuhotselesianga m'manyakhano kefwe kosi kho nefwe khube abanyala okhuhotselesia abandi m'manyakhano kosi khulwo obuhotselesi bwa Nyasaye yakhuhotselesia n'nabwo.

⁵Singa butswa khusanganga mukhusalila khwa Kristo, nimbwo khandi okhubir'ra mu Kristo khusanganga mukhuhotselesibwa khwa Nyasaye.

⁶Nikhuba nikhusalila, kali khulwa okhuhotselesibwa nokhuhonibwa khwenywe. Ne nikhuba nikhuhotselesibwa nenywe khandi mulahotselesibwa, nimunyoola tsingufu okhwefwila mukhusalila khulala n'nefwe.

⁷Kho obunayi bwakhuli n'nabwo mwinywe noburalilu. Khumanyile mbu olwa muli abasanji mukhusalila khwefwe nimbwo muli abasanji mukhuhotselesibwa khwefwe.

⁸Abaana befwe, khwenya khum'manyie amanyakhano akakhwanyoola mu Asia. Ebisiro biakhwatukhwa biakhusitohela okhubira esichelo, ma okhwola nikhuhinia khwo omwoyo khubulamu bwefwe.

⁹Khwafwana singa abandu abali nibakhalachiywe okhufwa. Nebutswa yaka kekholekha mbu khulekhe okhwesubila abene, nikarali khumusubile Nyasaye osimukusianga abafwa.

¹⁰Ye yakhuhonia musibi esikali esiokhufwa, ne alakhuhonia. Ne ifwe khunayanga khuye mbu alakhuhonia khandi,

¹¹olwa nenywe mukhukhonyanga okhusaaya. Kho abandu abenji okhusila balakhupila Nyasaye embwo khulwe ifwe khulwe esirenda esiakhunyooye khulwa amasaayo amenji.

¹²Khutsalikhanga mbu amakani kefwe kakhusubisianga mbu obulamu bwefwe musibala sino, ne okhusila muno obuhambani bwefwe n'nenywe bwemel'lwanga nobusubilwa nende esilongole esia Nyasaye ahaananga. Sikhwarukwa nobuchesi obwesinamubili tawe, nikarali nesirenda sia Nyasaye.

¹³Khumuhandichilanga amang'ana aka munyala okhusoma nokhukamanyilisia. Ndi nobusubili mbu mwakhakamanyilisia obulahi okhusila.

¹⁴Okhuba okhwola luno mwakhumanyilisia esichelo siti butswa. Khumanyile mbu Khwitukhu lio Mwami wefwe Yesu, mwakhakhusangal'le singa obwa nefwe khwakhamusangal'le.

¹⁵Ndali nobusubili obukali khuyaka kosi ma nindoosia okhwitsa okhumukonya olwokhuranga kho munyoole okhukasibwa halikhabili.

¹⁶Ndanaaya okhubir'ra owenywe nindi khuluchendo olwokhutsia Makedonia, khandi olwamba ningalukhanga okhurula Makedonia mbu nyoole obukhonyi bwoluchendo lwanje okhutsia Ebuyahudi.

¹⁷Kho mupaalanga olwa ndaloosianga mbwo ndali nimbula ahasinjiliye? Ne olwa ndoosianga mumapaalo kanje khe ndekhabilanga akanje butswa olwa mboola “Yee, yee” nende “Tawe tawe?”

¹⁸Singa obwa Nyasaye aboolanga obwatooto, lisubisio liefwe khuinywe siliali “Yee” nohomba “Tawe.”

¹⁹Okhuba Yesu Kristo Omwana wa Nyasaye, owe ise, na Timoteo nende Silivano khwamukambila, siali ye ouli “Yee” nende “Tawe” butswa tawe. Nebutswa muye ni “Yee” khasotso.

²⁰Okhuba Kristo niye “Yee” mumasubisio kosi aka Nyasaye. Niko akachila nikhuboola mbu “Amina” mu Kristo khuluyali lwa Nyasaye.

²¹Mu Kristo Yesu, Nyasaye akhuralisianga ifwe halala n'nenywe, nakhutsukhil'la amafura; nakhwahula.

²²Yakhura khwo esihambil'lo nakhuha omwoyo uwe mumioyo chiefwe, abe esiesingo siefwe.

²³Nyasaye nomukobokheli wanje mbu mboolanga akatooto — ye wamanya omwoyo kwanje. Sindaitsa Korintho khandi tawe, sichila ndenya okhumubeela tsimbabasi.

²⁴Sikhutemanga okhumunichilisia khu akamukwana okhusubila tawe. Khwamanya mbu mwaralila mubusubili. Khukhonyananga n'nenywe okhunyoola obusangali bwenywe.