Read lunyore 2 BAKORINTHO 10 Bible Online

2 BAKORINTHO 10 - lunyore bible

2 BAKORINTHO 10

¹Ise Paulo muhombelesianga omwene mubuhoma nende tsimbabasi tsia Kristo. Ise owabandu baboolanga mbu ndi omuhoma nindi n'nenywe, nebutswa omululu nimbulaho;

²musaaya mbu olwanzitsa murambachia okhuba omululu; okhuba ndi nobwatooto mbu nyala okhuba omululu khubalala abapaalanga mbu khurumikhilanga amakani kesibala.

³Tooto khwamenya musibala, ne sikhulwananga lihe esinasibala tawe.

⁴Ebilasan'no biefwe ebielihe sibili ebinasibala tawe ngarali nebietsingufu tsia Nyasaye ebiakhurumikhilanga okhulibul'la tsiminga tsiosi. Khulibul'langa amahingane kosi akobubehi.

⁵Khandi khukwisianga esiesikarisio siosi esia abandu besunga baleranga khulwa okhwikal'la obumanyi bwabandu khuka Nyasaye. Khutemanga okhusukhania amapaalo kabandu okhuyanzisia Kristo.

⁶Olwa muba nimumal'le okhumanyia mbu muli abahulili bahabwene, ifwe khwerechekhele okhuhana esinyasio khumundu wosi wesikala marwi.

⁷Inywe muhenganga khwikondo liesioba liebindu. Omundu naba nasubila mbu nowa Kristo, yetsul'le mbu singa olwali owa Kristo, nefwe khandi khuli aba Kristo.

⁸Ne nindakheitsoomia okhusilana khulwo obunyali obwo Mwami yakhuha khulwo okhumwombokha, nikhurali okhumusambul'la, sindakhasimba omurwe tawe.

⁹Ne sinyenya ndolekhe mbu ndemanga okhumurisia netsibarwa tsianje tawe.

¹⁰Abandu bakhaboola mbu, “Etsibarwa tsia Paulo netsisiro, khandi netsindulu; nebutswa nali n'nefwe omwene, nomutofu ne amang'anake kafwana akarali esindu tawe.”

¹¹Abandu bafwana mbwo betsul'le mbu akakhuboolanga mutsibarwa nikhuraliho niko akakhukholanga nikhuliho.

¹²Sikhutsalikhanga okhwechelania nende abandi khubo abehilanga ikulu abene tawe. Ne abene yabo abekhalachilanga, nibechela abene khubichelo biabwe babula obuchesi.

¹³Nebutswa ifwe sikhuleitsomia okhubira esichelo tawe. Khuloola khusichelo siomulimo okwa Nyasaye yakhuchel'la, ne yaka karetsanga halala emilimo chiefwe mwinywe.

¹⁴Ne khulwa mbu nenywe muli musichelo siefwe, sikhwakheitsoomisie okhusilana olwa khwetsa, nikhumukambila Amang'ana Amalahi aka Kristo tawe.

¹⁵Sikhweitsomianga okhubira esichelo khumilimo echiakholwa nabandu bandi tawe. Nebutswa okhunaya khwefwe khuli mbu, obusubili bwenywe bumetekhe okhukhula, kho khube abanyala okhukhola emilimo emikhongo hakari wenywe musichelo sia Nyasaye yakhuchel'la.

¹⁶Kho khulatsilil'la okhukamba Amang'ana Amalahi mubibala bindi ehale khwinywe, ma khubule okhweitsoomichisia emilimo chiabandu bandi bakhola habundu handi tawe.

¹⁷Nebutswa singa Amahandiko kaboolanga, “Omundu owenya okhweitsoomia, yeitsoomie khuko Mwami akhol'le.”

¹⁸Sali uyo oweitsoomia omwene ohuchil'lwanga na Nyasaye tawe, nebutswa uyo owo Mwami yetsomianga.