Read lunyore 2 BAKORINTHO 11 Bible Online

2 BAKORINTHO 11 - lunyore bible

2 BAKORINTHO 11

¹Ndekombanga mbu mwakhesimilisisie khu ise kata olwa ndi omuhingwa hatititi. Mwatsa mwesimilisie khu ise.

²Ise muhendel'langa okhusila singa obwa Nyasaye amuhendel'langa; inywe muli singa omukhaana omusiyikhu owandabakha khumusatsa mulala naye ni Kristo mwene.

³Ritsanga mbu haundi amapaalo kenywe kanyala okhukaatwa nimulekha esilongole sienywe nende obuyanzi bwenywe khu Kristo singa obwe inzokha yakaata Hawa nokhubehelesia khwayo.

⁴Okhuba muhuchil'langa owitsanga namukambila Yesu owabukhan'ne nende Yesu owe ifwe khwamukambila, ne nimuhuchil'la omwoyo owabukhan'ne nende owa mwanyoola, nohomba Amang'ana Amalahi akabukhan'ne nende aka mwahuchil'la, okhurula khwifwe.

⁵Simbalanga mbu ndi omuti okhuyomba abarumwa abakhulundu benywe yabo tawe.

⁶Fwana obusitsa obwokhul'loma mbula n'nabwo, nebutswa obuchesi ndi n'nabwo. Khwamumanyia ebindu biosi, munjila tsiosi habwene.

⁷Ise ndakhola obubi nindetutuyia, mbu inywe mufumibwe, sichila ndamukambila Amang'ana Amalahi ka Nyasaye sila omurungo?

⁸Ndanuula abasubili bandi olwa bambetsanga obukhonyi khulwa okhumurumikhila inywe.

⁹Olwa ndali n'nenywe, sindamuyekhela omundu wosi khulwa okhubula amapesa tawe. Abasubili basiefwe abarula Makedonia bander'ra siesindu siosi esiandenyanga. Ndelinda mbu ramusitohela munjila yosi tawe, khandi ndatsitsachil'la okhuba mbwo imbeli owamengele.

¹⁰Khulwo obwatooto bwa Kristo obuli mu ise, subisianga mbu, abulaho mu Akaya onyala okhunzikal'la okhweitsomia khwanje khuno tawe.

¹¹Esichilanga nimboola mbwo nisina? Kali sichila sindamuyanza tawe? Nyasaye wamanya mbu ndamuyanza.

¹²Ndatsitsachil'la okhukhola akakholanga luno, kho ndekhe okhubaha obweyangu abarumwa yabo abarunanga obweyangu obwokhweitsoomia mbu bakholanga emilimo singa ifwe.

¹³Abandu yabo nabarumwa abobubehi, abakholi bemilimo chiobukaati, abefwananianga okhuba abarumwa ba Kristo.

¹⁴Ne sikali akokhuchenyia tawe, sichila kata Setani yefwananianga okhuba om'malaika wobulafu!

¹⁵Kho silili ling'ana eliokhuchenyia nikakhaba mbu abakholibe yabo bakhefwanania okhuba abakholi bobulunji tawe. Esihesi siabwe bakhanyoole okhulondokhana nende ebikhole biabwe.

¹⁶Mboolanga khandi: omundu wosi arapaala ndi omuhingwa tawe. Ne nimuba nimupaala mbwo, mumbukule singa omuhingwa nase mbe nesiokhweitsoomichisia khwo hatititi.

¹⁷Akamboolanga sikali aka Nyasaye yakhenyele mboole tawe; mwing'ana yili eliokhweitsomia n'nomanga singa omuhingwa.

¹⁸Abandu abenji beitsomianga munjila yesinasibala. Kho nase ndakhepaaka.

¹⁹Inywe muli abachesi niko akachila nimwefwila abahingwa nobusangali.

²⁰Mwefwilanga kata nende omundu omukhola abahambe nohomba omundu wokhumwibila, nohomba omureka, nohomba omuchiaya, nohomba omwala tsimbi mumoni.

²¹Ndi nende es'simba murwe okhuhuchil'la mbu khwali abatofu okhukhola amang'ana yako. Omundu wosi naba naliho onyala okhweitsoomichisia esindu, nase nyala okhusieitsomichisia. Mboolanga singa omundu omuhingwa.

²²Yabo na Baheburania? Nase ndi Omuheburania. Yabo na Baisiraeli? Nase ndi Omuisiraeli. Nebisoni bia Aburahamu? Nase ndi es'soni sia Aburahamu.

²³Nabarumikhili ba Kristo? Ise mbayomba muburumikhi bwabwe. (Mboolanga singa omulalu). Ise ndakhola emilimo emitinyu okhusila. Ndamenya mubuhambe hali akhenji. Ndakhupwa hali khenji okhusila, Ndali ahembi khulufu hali khenji.

²⁴Ndanywekhwa tsisala amakhumi kataru natsirano natsine etsia Abayahudi, hali kharano.

²⁵Ndakhupwa netsindabusi na Baroma hali khataru, nindaswa namachina l'lala. Emeeli yafunikha nindeyinikha munyanza hali khataru, om'basu nobutukhu ndali munyanza.

²⁶Mutsinjendo tsianje tsinyinji ndanyoola amanyakhano okhurula khumichela, amanyakhano okhurula khubanuuli, eminyakhano okhurula khu Bayahudi basianje, nende okhurula khubetsimbia tsindi, nende okhurula khubomumatokho, nomusitsiimi, nomunyanza, nende okhurula khubalina abobubehi.

²⁷Ndakhola emilimo butinyu, ndahonga butukhu sila tsindoolo hali akhenji. Ndali neinzala halala nobuluho, ndahonga okhulia ninzikhala mbusindu sila ingubo.

²⁸Ne okhuyomba kosi, nditikhananga khubasubili bosi sielitukhu.

²⁹Omundu wosi nali omutofu, nase nimba omutofu. Omundu wosi niyesirasibwa mutsimbi nase nzitsula nokhusinyikha.

³⁰Nikakhaba mbu ndeitsomie, kho ndakheitsomichisia obutofu bwanje.

³¹Nyasaye khandi Samwana Omwami Yesu — eliiralie litsomibwenge inziayo! Wamanya mbu simbehanga tawe.

³²Olwa ndali Damasiko omukhongo welitookho, owali hasi womuruchi Areta, yarechekha abasikari mubwinjil'lo bwelitookho lia Damasiko mbu bandile.

³³Nebutswa ndechisibwa mwidilisa, musikapo, khuluhinga nimbona m'makhonoke.