Read lunyore 2 BAKORINTHO 12 Bible Online

2 BAKORINTHO 12 - lunyore bible

2 BAKORINTHO 12

¹Ise okhwola ndeitsoomie kata nilirali ling'ana lilahi tawe. Nebutswa ndaboolakhulibisulo nende okhubisukha okhwo Omwami yambelesia.

²Ndamanya omundu omukristo owabukulwa nahilwa khwikulu liakhataru emihika likhumi nachine echiabir're (nikali yaka kekhola nohomba nikali yalola libisulo simanyile tawe. Nyasaye umanyile.)

³Ngalukhilangamwo mbu, manyile mbu omundu uyo yabukulwa nahilwa mu Paradiso. (Khandi yaka nikali okhwekhola nohomba niliali libisulo simanyile tawe. Nyasaye umanyile.)

⁴Ne ebwene iyo yahulila amang'ana akaraboolekha, ebindu ebiomunwa okwomundu kuranyala okhuboola tawe.

⁵Kho ndakheitsoomia khulwa omundu singa uyo. Nebutswa khubwanje omwene sindakheitsoomia tawe, nebutswa khulwe ebindu ebimanyianga obutofu bwanje.

⁶Ninyenya okhweitsomia, sindakhaba omuhingwa tawe, sichila mba nimboolanga akatooto. Ne sindakheitsomia tawe, okhuba sinyenya omundu yambukul'le hekulu okhuyomba akalolanga ise nikhola nohomba akahul'langa ise nimboola tawe.

⁷Nebutswa kho mbule okhuchingukha mukhweitsomia khulwa amang'ana amakhongo akandabisul'lwa yako, ndahebwa okhutsuunwa khwesitonda siomubili, esiekholanga singa omurumwa wa Setani owanyasie nokhunzikal'la mbu ndekhe okhweitsoomia okhubira esichelo.

⁸Ndasaaya Omwami hali khataru khulwe esindu yisio nimureeba asihinie khu ise.

⁹Naye niyambool'la mbu, “Esirenda sianje nisio esiotakhanga, sichila obunyali bwanje bumetekhanga tsingufu olwa ibe orali onyala.” Kho ndakhasangala, nindeitsoomia khulwo okhubula tsingufu kho obunyali bwa Kristo bumenye mu ise.

¹⁰Khulwa Kristo, sangal'langa okhubula tsingufu, sangal'langa amanyeko, obutambi, okhukhupibwa esibi nende mumatinyu. Okhuba olwamba nindi omutofu, nilwo olwandi netsingufu.

¹¹Ngwiye omuhingwa ne ninywe abachil'le nimba mbwo. Ma ninywe abakwan'ne okhunzitsoomia. Ne kata nirali sindu, sindi omuti okhuyomba “Abarumwa” abachoomekhe benywe yabo tawe!

¹²Akamangalimwa nende akokhuchenya akamanyianga mbu ndi omurumwa kekholekha mwinywe mukhwefwila khwosi.

¹³Ndakhol'la mbwena amakanisa kandi obulahi okhuyomba obwa ndali okhumukhol'la inywe? (Ise sindaali okhumuyekhela khulwa okhubula amapesa tawe.) Ndamubukul'la mbwena hasi okhuyomba obwa ndabukula amakanisa kandi? Ndamuyekhela khulwa okhwenya obukhonyi bwamapesa? Kakhaba khulwa mbu sindamukhol'la bulahi tawe. Mwatsa mumbeele khulwe ling'ana libi yili!

¹⁴Luno nolwakhataru ninderechekhanga okhwitsa khwinywe. Ne sinamutukhe ebisiro tawe. Sirunanga emianduchienywe tawe nikarali runanga inywe abene. Abaana sibakwan'ne okhubikhila abebuli babwe libikhilo tawe, nikarali abebuli nibo abakwan'ne okhubikhila abaana babwe libikhilo.

¹⁵Ise ndakhasangala okhuhinia siesindu esiandi n'nasio kata nende ise omwene khulwo obulahi bwemioyo chienywe. Kho olwamuyanzanga okhusila muno, nenywe munyanzanga hatititi butswa?

¹⁶Kho muhuchil'le mbu ise sindaali okhumusitohela khulwa obukhonyi bwamapesa tawe. Nebutswa omundu alaboola mbu ndali omulwenyukhu nimutila nobubehi bwanje.

¹⁷Ndamunuula khwo esindu okhubir'ra mubarumwa abandamurumila inywe?

¹⁸Ndatsuuba Tito nimuruma halala nomusubili wasiefwe undi betse khwinywe. Tito yakhamunulakhwo esindu noho? Sikhwaali namakani malala? Khandi sikhwachenda mumwoyo mulala yikwo?

¹⁹Haundi mwakhapaala mbu okhwola luno ifwe khwesoolanga abene imbeli wenywe. Tawe! Khul'lomanga amang'ana yaka singa Kristo yakhal'lomele imbeli wa Nyasaye, ne kosi akakhukholanga abalina banje aba ndayanza nakokhumwombokha inywe.

²⁰Ritsanga mbu olwanzitsa haundi sindakhamunyoole obwa ndekombanga tawe, nenywe khandi mwakhanyoola ise obwa murekombanga tawe. Ritsanga mbu ndakhanyoola tsimemba, isatsa, lirima, okhwabukhana, okhunyekana, obumonyani, okhutsaalikha nende indiri.

²¹Ndi noburi mbu khase olwa ndakhetse khandi Nyasaye wanje yakhanditiyia imbeli wenywe, nase ndakhelil'la khubenji abali okhukhola tsimbi khale ma abasili okhweyama akesifwabwi, obwekombi bwabwe nende obuheyi bwosi obwa bakhola.