Read lunyore 2 BAKORINTHO 13 Bible Online

2 BAKORINTHO 13 - lunyore bible

2 BAKORINTHO 13

¹Yilu nilwo olwakhataru ninzitsanga okhumukonya. Singa Amahandiko kaboolanga, “Sieling'ana liokhuyaalana liloosibwe nobukobokheli bwabandu babili nohomba bataru.”

²Ndali okhuchetsiyia abali okhukhola tsimbi nende abandi bosi olwa ndali yaho olwakhabili. Nebutswa khandi nimbwo mboolanga luno kata nimbulaho; Mbool'langa yabo abakhola tsimbi nibasili okhwekalukhania nende abandi bosi mbu olwamba ninzitsa sindakhababeele tsimbabasi tawe.

³Mwenyanga okhulola esimanyilo mbu Kristo al'lomanga okhubir'ra mu ise. Kristo sali omutofu khwinywe tawe; nebutswa obunyali bubwe bukholanga emilimo mu inywe.

⁴Okhuba kata nikali mbu yabambwa khumusalapa mubutofu, nebutswa ali mwoyo khulwa obunyali bwa Nyasaye. Nefwe khandi khuli abatofu mu Kristo; nebutswa mubuhambani bwefwe n'nenywe, khwakhabe mwoyo na Kristo khulwo obunyali bwa Nyasaye.

⁵Mweitsotse abene ma mulole nimuba nimumenyanga mubusubili, mwechele abene. Simumanyile mbu Yesu Kristo ali mu inywe tawe? Ngarali mbwo kho mwakwa.

⁶Ndi nobusubili mbu inywe mumanyile ifwe sikhwaramwa tawe.

⁷Khusaayanga Nyasaye mbu murakhola khwo obubi bwosi tawe. Sikali kho khulwa mbu khwenyanga ifwe khulolekhe mbu khuli abalechi tawe, nikarali inywe mukhole akali habwene kata nikakhalolekha mbu khwaramwa.

⁸Sikhunyala okhwikal'la obwatooto tawe, nikarali okhulandia obwatooto.

⁹Khusangalanga olwa khuli abatofu; nenywe muli netsingufu. Kho khumusaayilanga khandi mube habwene.

¹⁰Mandikanga ebarwa yino nindi ehale okhurula khwinywe, kho olwa nanzitse khwinywe nambule okhuba omululu mubunyali obwo Mwami yambelesia — sibuli obunyali obwokhusambula tawe, nikarali nobwokhwombokha.

¹¹Abaana befwe, eliokhumal'likha ndielino mbu mulindwe. Murunilisie okhuba habwene, mulonde amang'ana kanje, muhul'lisanie abene khubene, mumenye mumulembe. Ne Nyasaye wobuyanzi nomulembe alaba n'nenywe.

¹²Musiesanie nobuyanzi bwobuta.

¹³Abasubili basiefwe bosi yino bamusiesianga.

¹⁴Esirenda sio Mwami Yesu Kristo, nobuyanzi bwa Nyasaye, nobuhambani bwo Mwoyo Omutsienukhu, bibetsenje n'nenywe mwesi.