Read lunyore 2 BAKORINTHO 2 Bible Online

2 BAKORINTHO 2 - lunyore bible

2 BAKORINTHO 2

¹Ndachooma mumakani kanje okhubula okhwitsa khwinywe mbu ndekhe okhumura musibeela.

²Okhuba nimba nimubeelesia niwina owakhasangasia, narali uyo owambelesisie?

³Niko akachila ndamuhandichila ebarwa iyo mbu olwa nanzitse nambule okhuba nesibeela khulwe yabo abakwan'ne okhusangasia. Manyile mbu, ise nisangala, nenywe khandi nimusangala.

⁴Ndamuhandichila namakani amasiro nende esihenda mwoyo, nende okhulakaya amasika amenji; lichoomolie yako siliali okhumubeelesia inywe tawe, nikarali liali okhumumanyia mbu ndamuyanza okhusila.

⁵Omundu wosi naba niyalera esibeela khuwasie, kho siyaimbelesia ise sienyene tawe nikarali yamubelesia kata inywe mwesi, (mboolanga yako kho ndekhe okhuba omululu pa khuye.)

⁶Esinyasio siomundu uyu amal'le okhunyoola okhurula khubwinji bwenywe simuhel'le.

⁷Luno khane mumulekhele nimumutinyilisia mbu alekhe okhubeelela nahinia omwoyo khubindu biosi kupu.

⁸Kho musaayanga mumumanyie mbu siahene mwamuyanza.

⁹Lichoomo lianje okhumuhandichila ebarwa nokhumuteema nende okhwenya okhumanya nikali mwerechekhele okhulonda amang'ana kanje kosi.

¹⁰Omundu wosi owamulekheye ling'ana liosi nase khandi mulekheye. Okhuba olwa mba nindekhela omundu ling'ana liosi, eliamba nimulekheye, mba nimulekheye khulwenywe imbeli wa Kristo,

¹¹khe khwikal'le Setani okhukhura hasi wobunyali bwe, okhuba khwamanya obwa obuloosie bwe singa buli.

¹²Olwa ndoola Troa okhukamba Amang'ana Amalahi ka Kristo, ndanyoola mbu Omwami yali niyekuye esiliango siokhukamba Ebuharabu yiyo.

¹³Nebutswa Omwoyo kwali okhunyakhana sichila sindamunyoola omusubili wasiefwe Tito naliho tawe. Kho ndasebulana nabandu yo ma ninzia Makedonia.

¹⁴Nebutswa Nyasaye aboolelwe embwo! Okhuba Nyasaye akhwemel'langa khasotso mukhusangala khwobulechi bwa Kristo. Nyasaye akhurumikhilanga okhulandia obumanyi bwa Kristo singa esiuya esilahi habundu hosi.

¹⁵Ifwe khuli esiuya esilahi esiobwali obwa Kristo ahaananga khu Nyasaye, khuyabo abahonibwanga nende yabo abatibanga.

¹⁶Esiuya yisio nokhufwa khuyabo abatibanga, nebutswa nobulamu khuyabo abahonibwanga. Niwina owakhanyala okhuhesia omulimo yikwo kwosi?

¹⁷Ifwe sikhuli singa abandi abenji ababatsa abakholanga obukhala neling'ana lia Nyasaye tawe. Ifwe khukambanga nesilongole imbeli wa Nyasaye, singa abandu aba Nyasaye yaruma singa abarumikhili ba Kristo.