Read lunyore 2 BAKORINTHO 3 Bible Online

2 BAKORINTHO 3 - lunyore bible

2 BAKORINTHO 3

¹Kho khuchiakanga khandi okhweitsomia abene noho? Nohomba khwenyanga khube netsibarwa etsiokhwitsoomia khwinywe singa abandu bandi, nohomba kata etsirula khwinywe?

²Inywe abene muli ebarwa yokhwitsoomibwa khwefwe, eyahandikwa mumioyo chiefwe, khulwa okhumanyikha nokhusomwa nabandu bosi.

³Kali kololi mbu inywe muli ebarwa ya Kristo mwene yahandika ma nachiruma okhubir'ra khwifwe. Ebarwa yiyi siyahandikwa nobwino tawe nikarali nende Omwoyo wa Nyasaye oli mwoyo; siyahandikwa khurubaho rwamachina tawe, nikarali khumioyo chiabandu.

⁴Khuboolanga yaka sichila khuli nolutswoni mu Nyasaye okhubir'ra mu Kristo.

⁵Sibulaho esindu siosi mwifwe esiakhachila khuboole mbu khuli abanyala okhukhola omulimo yiku. Nebutswa obunyali bwefwe bwosi burulanga khu Nyasaye;

⁶niye owakhukhola khube abanyala okhurumikha khuindakano imbia. Indakano yiyi sieli yamalako akahandikwa tawe, nikarali neindakano yo Mwoyo. Lilako eliahandikwa lileranga okhufwa, ne Omwoyo ahaananga obulamu.

⁷Lilako liakunzwa mutsibarwa khurubaho rwamachina ne obukhongo bwa Nyasaye bwalolekha olwa liahanwa. Kata nikali okhwang'al'la khwo mumoni mwa Musa khwali nikhuhwelel'langa, khwali okhukali okhusila ma kata Abaisiraeli sibaali abanyala okhurangala mumoni mwa Musa tawe. Ne nikaba Amalako akaleranga okhufwa olwa kali nobunyali, ketsa mubukhongo singa yibwo,

⁸kho oburumikhi bwo Mwoyo sibuli nobukhongo okhusila?

⁹Nikaba oburumikhi obuleranga okhuhonibwa bwakhabe obukhongo; kho oburumikhi obuleranga okhubalwa okhuba abalunji sibulaba obwobukhongo okhusila muno?

¹⁰Luno khulwa oburumikhi bwobukhongo obukali okhusila obuliho, oburumikhi bwoluyali obwaliho khale bwamala okhuhwaho.

¹¹Nikaba mbu oburumikhi obweinyinga ndututu bwali nobukhongo, khe oburumikhi oburahwetsangaho sibulaba obukhongo okhusila?

¹²Ifwe khuboolanga neikholo nyomu khulwa mbu khuno nikhwo okhunaaya khwefwe.

¹³Sikhuli singa Musa, owefuunikha olububi mumoni, kho abandu ba Isiraeli balekhe okhulola obumal'likhi nokhuhwetsekhel'la khwokhwang'al'lakhwe tawe.

¹⁴Ne amakani kabwe kakholwa amatinyu; ne kata okhwola olwaleelo amakani kabwe kasifuunikhilwenge nolububi olwa basomanga ebitapu bieindakano yakhale. Ne olububi yilwo luhinibwanga olwomundu ahambananga na Kristo.

¹⁵Yee, okhwola olwaleelo olwa basomanga ebitapu bia Musa, olububi lusifuunikhanga amakani kabwe.

¹⁶Nebutswa omundu olwa amukabukhila Omwami, ne olububi yilwo luhinibwaho.

¹⁷Ne Omwami no Mwoyo, khandi aha Omwoyo wo Mwami ali, habwene yaho obalakhuule bubetsangaho.

¹⁸Kho ifwe fwesi abobweni bwefwe burafuunikhwa, khwakhanga obukhongo bwo Mwami Nyasaye singa abali musilang'i. Ne obukhongo yibwo oburulanga khu Mwami ouli Omwoyo khukhukalukhanianga khufwane n'naye mukhufwanakhwe okhurula khubukhongo bulala okhwola khubundi obukali okhusila.