Read lunyore 2 BAKORINTHO 4 Bible Online

2 BAKORINTHO 4 - lunyore bible

2 BAKORINTHO 4

¹Nyasaye mutsimbabasi tsitsie wakhuhelesia omulimo kuno khukhole, khulwe yako sikhufwa omwoyo tawe.

²Obukholi bwosi abwes'simba murwe nende abwamasilisi khwalekha kupu; sikhuchendanga khandi mukhubehel'lesania kata okhusiamia ling'ana lia Nyasaye tawe. Nikarali munjila yokhubisula obwatooto khumenyanga mumoni mwa Nyasaye nikhutema okhwelolesia habwene khumioyo chiabandu.

³Okhuba Amang'ana Amalahi akakhukambanga nikaba nikabiswa, kabiswa khu yabo abakoranga bonyene.

⁴Yabo sibasubilanga tawe, sichila omunyasaye omubi wesibala yisi wabofusia emioyo chiabarali abasubili. Abakholanga balekhe okhulola obulafu obwakhanga khubo, obulafu oburulanga khu Mang'ana Amalahi akoluyali lwa Kristo oli okhufwana khwene okhwa Nyasaye.

⁵Ifwe sikhwekambanga abene tawe, nebutswa khukambanga Yesu Kristo singa ali Omwami, nefwe singa abarumikhi benywe khulwa Yesu.

⁶Nyasaye owaboola mbu, “Okhurula musiilima, obulafu bwakhakhe!” Niye Nyasaye omutelwa owakhola obulafu nibwakha mumioyo chiefwe nakhuhelesia obulafu bwokhumanyilisia oluyali lwa Nyasaye olwakhanga mumoni mwa Yesu Kristo.

⁷Kho ifwe abali nende libiikhilo lino khuli butswa singa tsindabu tsiamatoyi, kho kalolekhe kol'lani mbu obunyali obukhongo nobwa Nyasaye ne sibuli obwefwe abene tawe.

⁸Khunyakhananga khasotso, nebutswa sikhutubulwanga tawe; olundi khubetsanga na honzoni ne sikhufwitsanga omwoyo tawe,

⁹khuli nabasuku abenji ne sikhulemanga omulina tawe. Khukhupwanga nikhusalisibwa, ne sikhumalwanga tawe.

¹⁰Khuchinganga okhufwa khwa Yesu khasotso mumibili chiefwe echifwitsanga kho obulamu bwa Yesu buribukhile mumibili chiefwe.

¹¹Ifwe mubulamu bwefwe bwosi khuhanwanga khasotso khufwe khulwa Yesu, kho obulamu bubwe bulolekhe mumibili chiefwe echisasikhanga.

¹²Kho okhufwa khukholanga emilimo mwifwe, nebutswa obulamu mwinywe.

¹³Amahandiko kaboolanga, “Ndali okhusubila, niko akachila nimboola.” Mumwoyo mulala okwobusubili nefwe khandi khusubilanga niko akachilanga nikhuboola.

¹⁴Khumanyile mbu Nyasaye owasimukusia Omwami Yesu alikhusimukusia ifwe khandi halala nende Yesu nakhura imbeliwe halala n'nenywe.

¹⁵Amang'ana yaka kosi kali khulwe inywe, mbu olwe esirenda sia Nyasaye siol'langa abandu abenji okhusila ne nabo balakhupa embwo ingali khuluyali lwa Nyasaye.

¹⁶Khulwe yako sikhufwitsanga omwoyo tawe. Kata nikali emibili chiefwe nichiba nichibola, nebutswa mukari mumwoyo khukholwanga abayia sielitukhu.

¹⁷Omunyakhano okwakhunyoolanga nomutititi, khandi nokweinyinga indututu, nebutswa kukhurechekhelanga obukhongo oburahwa oburachelanibwa khumunyakhano tsana tawe.

¹⁸Ifwe sikhuhenganga khubindu ebilolekhanga, nikarali khubindu ebiralolekhanga. Ebindu ebilolekhanga nebienyinga indututu, nebutswa ebindu ebiralolekhanga nebieinziayo.