Read lunyore 2 BAKORINTHO 5 Bible Online

2 BAKORINTHO 5 - lunyore bible

2 BAKORINTHO 5

¹Khwamanya mbu inyumba eyakhumenyanga mwo iyi, omubili kwefwe khusibala, neba nesambulwa, Nyasaye alakhuha inyumba yindi mwikulu eya khulimenyamwo, inyumba eyomwene yombokha, eyakhamenye inziayo.

²Hano tooto mwene khubindanga olwakhusili munyumba iyi, nikhwekomba okhubikhwa obumenyo bwefwe obwomwikulu;

³nikhuba nikhubikhwa, sikhwakhanyoolwa nikhuli esiechenye tawe.

⁴Olwa khusili munyumba yino eyomusibala khubindanga nikhulakaya, sikali mbu khwenyanga okhunabulwa omubili kuno okwomusibala tawe, nikarali khuli nende okhwonyonywa okhubikhwa yikwo okurafwitsanga mbu okufwitsanga kulekwe nikukabukhanibwa nende obulamu.

⁵Nyasaye niye owakhurechekha khubukabukhani yibu nakhuha omwoyo singa esihambil'lo khukosi akayakhubikhila.

⁶Kho khubetsanga neikholo nyomu khasotso. Khwamanya mbu okhumenya mumubili yiku nokhuba ehale no Mwami.

⁷Okhuba khumenyanga khulwo obusubili, ne tawe khulwo okhulola.

⁸Khuli neikholo nyomu, ne khwakhenya okhurula ingo wefwe mumubili khutsie khumenye halala no Mwami hango hahe.

⁹Kho okhuyomba akandi kosi lichoomo liefwe nokhumuyanzisia kata olwakhumenya musibala muno nohomba mwikulu.

¹⁰Okhuba ifwe fwesi okhwola khusinjile imbeli wa Kristo, mbu akhukhalachile esiina. Siomundu anyoole amalahi nohomba amabi okhulondokhana nende akayakhola nali mumubili.

¹¹Khwamanya singa okhuria Omwami khuli okhulahi, ma kho khuhombelesianga abandu bandi. Nyasaye wakhumanya ifwe kupu khandi manyile mbu mumioyo chienywe mwaimanya ise.

¹²Sikhweitsoomianga khwinywe khandi tawe, nebutswa khumuhetsanga inywe esifune esilahi okhukhwepachila, kho mube nende elia mubakalusia yabo abepachilanga liiba eliomubili, elirali ifwo yomundu tawe.

¹³Okhuba kata nikhuba nikhulalukhile, kali khulwa Nyasaye, nohomba kata nikhuli nobuchesi habwene, kali khulwenywe.

¹⁴Obuyanzi bwa Kristo khwifwe bukhwemel'langa, ne luno khumanyile mbu olwa mulala yafwila bosi, kho bosi basanganga mukhufwa khwe.

¹⁵Yafwa khulwabandu bosi, mbu yabo abamenyanga baramenya khulwabwe abene tawe, nikarali bamenye khulwa ye owafwa khandi nasimukusibwa khulwabwe.

¹⁶Kho okhurula luno sikhukhalachilanga omundu wosi mumbila yomubili tawe. Ne kata nikaba khwabala Yesu mumela yomubili, luno sikhumubalanga mbwo khandi tawe.

¹⁷Omundu wosi naba nali mu Kristo nomundu omuyia, ebindu biakhale biabira, lole biosi nebiyia.

¹⁸Ebindu yibi biosi birulanga khu Nyasaye, owali okhuhambania ifwe khuye okhubir'ra mu Kristo nakhukhola abaana baabe okhurula khubasuku, nakhuha omulimo okhukhola abandi okhuba abalina baabe.

¹⁹Amang'ana kefwe kali mbu, okhubir'ra mu Kristo, Nyasaye yahambanianga abandu khuye omwene. Nyasaye siyali okhubala tsimbi tsiabwe khubo tawe, naye wakhuhelesia ling'ana eliokhuhambania abandu khuye.

²⁰Kho ifwe luno khul'lomanga musilenje sia Kristo singa ol'la Nyasaye amuhombanga okhubir'ra mwifwe. Khumusaayanga musilenje sia Kristo, mbu muhambanibwe khu Nyasaye.

²¹Kristo siyaali netsimbi tawe, nebutswa Nyasaye yamukhola abe owetsimbi khulwefwe, kho muye ifwe khusange mubukhongo bwa Nyasaye.