Read lunyore 2 BAKORINTHO 6 Bible Online

2 BAKORINTHO 6 - lunyore bible

2 BAKORINTHO 6

¹Mumilimo chiefwe halala nende Nyasaye, khumusaaya mbu murahuchil'le esirenda esiamwatoola khu Nyasaye sikore butswa tawe.

²Nyasaye aboolanga mbu: “Munyinga ekwan'ne ndakhuhul'la, olwe litukhu eliokhukhuhonia liola ndakhukhonya. Khulwe yako ino niyo esaa eyokhunyoola esirenda sia Nyasaye; lino nilio litukhu liokhuhonibwa.”

³Sikhwenya omundu wosi anyoole khwo esikha mumilimo chiefwe tawe, kho khuteemanga mbu khurabikha ebiesikarisio munjila yomundu wosi tawe.

⁴Nebutswa mumang'ana kosi akakhukholanga, khwemanyianga singa abarumikhi ba Nyasaye, mukhwefwila mumanyakhano, mubutakha, nende mumatinyu.

⁵Khwakhupwa, khwabikhwa mubuhambe, khwanyakhana emilimo, nikhurakona tsindoolo, khandi nikhuralia ebiokhulia.

⁶Khwemanyianga okhuba abarumikhi ba Nyasaye khulwo Omwoyo Omutsienukhu khandi khulwo obuyanzi bwefwe obwatooto khulwo obusiyikhu bwefwe nende obumanyi, nende obwefwili nende tsimbabasi,

⁷mukhul'loma khwatooto, nomubunyali bwa Nyasaye. Khuli nobulunji singa ebiesingo biefwe ebiokhusera lihe, nokhwesoola abene.

⁸Khwerechekhele okhufumibwa nende okhuchaywa, okhutulwa nende okhwitsomibwa. Khubalwa singa ababehi ne nikhuboolanga akatooto,

⁹singa abaramanyikhan'ne, nebutswa khwamanyikha khubosi, singa abafwitsanga nebutswa khuli mwoyo. Kata nikhuhebwanga esinyasio nebutswa sikhwirwanga tawe;

¹⁰singa abesibeela, nebutswa khusangalanga khasotso, singa abatakha, nebutswa khuhindihasianga abenji, singa ababula ebindu, nebutswa khuli nende siesindu.

¹¹Abalina banje abali Korintho, emioyo chiefwe nemilakhuule khwinywe. Khumubooleye kosi habulafu.

¹²Sikhuli nifwe abamwikaliye emioyo chiefwe nebutswa ninywe abakhwikaliye ifwe emioyo chienywe.

¹³N'nomanga n'nenywe singa khubaana banje; mukhumanyie amakani malala aka nefwe khumupaal'langa. Yikule emioyo chienywe khwifwe.

¹⁴Murahambanibwa mwikokolo elala nende abandu abarasubilanga tawe okhuba sikakhanyalikha tawe. Obulunji sibwakhahambana nobusiamu tawe. Nohomba obulafu sibwakhahambana nesiilima tawe.

¹⁵Kristo anyala mbwena okhuhul'lisania nende Setani? Omusubili ali nabulala sina nende orali omusubili?

¹⁶Ehekalu ya Nyasaye enyala mbwena okhuhul'lisania nende emisambwa? Okhuba ifwe khuli Ehekalu ya Nyasaye oli mwoyo; singa Nyasaye mwene yaboola, “Ndakhamenye mubo ninjenda mubo, Ndakhabe Nyasaye wabwe, nabo balaba abandu banje.”

¹⁷Khulwe yako Omwami aboolanga mbu, “Rule hakari wabwe, mweyahule okhurula khubo, muratilakhwo khusindu siosi esiesifwabwi tawe, nase ndalamuhuchil'la.

¹⁸Ise ndakhabe Papa wenywe, nenywe mwakhabe abaana banje, abasiani nabakhaana. Nimbwo Omwami Owokhunyala Biosi aboola.”