Read lunyore 2 BAKORINTHO 7 Bible Online

2 BAKORINTHO 7 - lunyore bible

2 BAKORINTHO 7

¹Amang'ana yaka kosi kasubisibwa khu ifwe, abalina banje. Khulwe yako chende khwesiye abene okhurula musifwabwi siosi esiomubili nende esiomwoyo, ma khube abatsienukhu kupu ma khumenye mukhuria Nyasaye.

²Mwikule emioyo chienywe khwifwe. Sikhwakholelakhwo omundu wosi obubi; sikhwayononia omundu wosi nohomba kata okhumukaata omundu wosi.

³Simboolanga ling'ana yili okhumukhalachila omundu esiina tawe, nikarali singa obwa ndamubool'la khale, mbu inywe muli abobuha obukali mumioyo chiefwe, khubetsanga halala khasotso kata mukhufwa nohomba mubulamu.

⁴Ndi nende obusubili obukhongo olwa mboolanga n'nenywe, ndepakanga muno khulwe inywe, mumanyakhano kefwe kosi nzitsuyemwo nende obuhotselesi; sangaal'le okhubirana.

⁵Kata olwakhwoola Makedonia sikhwahulukha tawe. Khwanyakhana mumbeka tsiosi. Khwaliho okhusoolana nabandu besioba, ne oburi bwali mumioyo chiefwe.

⁶Nebutswa Nyasaye ohotselesianga abenya okhufwa omwoyo, yakhutinyilisia mukhwitsa khwa Tito.

⁷Sikhwali okhwitsa khwa Tito khwonyene okhwakhutsuuba tawe, nikarali okhuhotselesia okhwa nenywe mwamuhotselesia. Yakhubool'la singa obwa muli namahofu okhundola, singa obwa muli nesibeela, singa obwa mwerechekhele okhuusola ma nase nimeta okhusangala okhusila.

⁸Ne kata nindamubeelesia nebarwa yanje, sikamendianga tawe. Ndakhahend'e omwoyo ebarwa niyakhamubelesisie hatututu.

⁹Ne luno ndi nobusangali, ne sindi nobusangali mbu mwabeelela tawe, nikarali okhubelela khwenywe khwachila nimwekalukhania munjila tsienywe. Nyasaye yayanzisibwa munjila ya mwasalil'lamwo, mbu mubule okhunyoola amasila mwing'ana liosi khulwe ifwe.

¹⁰Esibeela sia Nyasaye ayanzisibwanga n'nasio sileranga okhwekalukhania okhuleranga okhuhonibwa, ne okhwesirasia sikhuli mwo tawe. Nebutswa esibeela siesibala sileranga okhufwa.

¹¹Okhuba lole aka Nyasaye yakhola khulwa okhubelela khwenywe; khwamukhola okhuba abandu besinani nokhwonyonywa okhumanyia obwilonga bwenywe. Lole nokhwesambakasia sina okhuba mwinywe, nokhusinyikha sina, niburi sina, nokhwekomba sina, neimbalikha sina, kata nokhumala es'sialia sina! Inywe mwemanyisie munjila tsiosi mbu muli abasiyikhu m'mang'ana yaka.

¹²Kho kata olwa ndamuhandichila ebarwa iyo sikali khulwa obubi obwomundu yali nakhol'le nohomba obwomundu yali nakholeywe tawe. Nebutswa ndamuhandichila okhumumanyia kol'lani imbeli wa Nyasaye obwa muli nesinani okhwehana khulwe ifwe.

¹³Niko akachila nikhutinyilisibwa. Sikhwali okhutinyilisibwa khwonyene tawe, harali Tito khandi yakhusakulusia okhuyomba khwo nobusangali obwa yali n'nabwo okhurulana singa obwe inywe mwesi mwamusakulusia omwoyo!

¹⁴Ise ndepaka khulwe inywe khuye, sindamala simbe omurwe tawe. Khwamubool'langa obwatooto khasotso, ne obutsalikhi bwefwe okhumwitsoomia inywe imbeli wa Tito bwali okhukwa obwatooto.

¹⁵Ma mbwo obuyanzibwe obwo mwoyo khuinywe bumetekhanga okhusila olwa yetsul'langa obuhulili bwenywe mwesi, nende singa obwa mwamwinjisia noburi nende okhutechela.

¹⁶Ndi nende obusangali mbu nyala okhweleeta khwinywe mwing'ana liosi.