Read lunyore 2 BAKORINTHO 8 Bible Online

2 BAKORINTHO 8 - lunyore bible

2 BAKORINTHO 8

¹Abaana befwe, khwenyanga mumanye akesirenda sia Nyasaye yakhol'la amakanisa ka Makedonia.

²Abasubili bayo bateemwa okhusila nende amanyakhano aka babir'ramwo nebutswa obusangali bwabwe bwali obwinji okhusila ma nibasilaana okhuhaana namakhono amasiro kata olwa bali abatakha okhusila.

³Nyala okhukobokhela mbu bali okhuhaana singa obwa banyala kata okhuyombiakhwo. Khulwo okhuyanza khwabwe,

⁴bakhusaaya ma nibakhuhomba mbu bahebwe obweyangu bwokhuhambana mubukholi buno okhukhonya abandu ba Nyasaye abali Ebuyahudi.

⁵Ne yilio sil'li nilio ling'ana eliakhwanayanga lionyene tawe! Olwokhuranga behaana abene khu Mwami, ma nibehaana khwifwe khulwo obulalilo bwa Nyasaye.

⁶Kho khulwe yako, khwanichilisia Tito, owachiakia omulimo yikwo amalilisie obukholi ma amukhonye okhuhesia omulimo omuchoomekhe okwobuyanzi.

⁷Inywe muli abahinda mu siesindu: mubusubili, mukhuboola mubuchesi, musinani siokhukhonya, ma mubuyanzi bwenywe khwifwe. Kho nefwe khwenyanga musilane mumulimo kwobuyanzi kuno khandi.

⁸Simboolanga mbwo khulwa okhumulaka tawe, nebutswa khulwa okhumanyia obwa abandi abali nesinani esiokhukhonya, ndemanga okhumanyilisia nikali obuyanzi bwenywe nobwatooto.

⁹Inywe mwamanya esirenda sio Mwami wefwe Yesu Kristo, mbu kata ye olwa yali nende obuhinda, yekhola omutakha khulwe inywe, mbu inywe khulwo obutakhabwe, mukholwe okhuba abahinda.

¹⁰Ne khwing'ana lino, amapaalo kanje kali mbu, kakwan'ne inywe mumalilisie luno akamwachiaka omuhika okwahwa. Mwali abokhuranga okhuhuchil'la nokhukhola mbwo.

¹¹Niko akachila, mumalile omulimo yikwo, singa olwa mwali nokhwonyonywa okhwinji okhwokhuloosia, kho khole esinani mumalil'le elala obwa munyala.

¹²Nimuba nesinani mukhuhaana Nyasaye alahuchil'la esihanwa sienywe khu esiamuli n'nasio okhuhana ne tawe esiamurali n'nasio.

¹³Sindemanga okhwanguhia abandi khulwa okhumutukha ebisiro tawe,

¹⁴nebutswa munyinga yino olwa muli nebindu ebinji bwakhaba obulahi nimwakhakhonya yabo abali abatakha. Ne nenywe olwa muliba abatakha nabo nibali nebindu bakhamukhonye. Munjila iyi mukhol'lane mubuhelani.

¹⁵Singa Amahandiko kaboolanga, “Uyo owabunjelesia ebinji siyali nende ebisilan'ne tawe, naye owabunjelesia ebitititi sibiamuleema tawe.”

¹⁶Ne khukhupilanga Nyasaye embwo okhuha Tito omwoyo singa okwefwe okwokhumukhonya.

¹⁷Siyahuchil'la obuchetsiyi bwefwe bwonyene tawe nebutswa yali nokhwonyonywa okhutsia khwinywe mukhuhuchil'la khukhwe omwene.

¹⁸Halala n'naye, khurumanga omusubili wasiefwe oweifumaye mukhukamba Amang'ana Amalahi yalanda khubasubili bosi.

¹⁹Sieli ifuma iye yonyene tawe, nikarali khandi yelwa, niyahulwa nabasubili okhuchenda n'nefwe okhulandia omulimo kwobuyanzi kuno olwa khukholanga khulwo obukhongo bwo Mwami nokhumanyia lichoomo liefwe eliokhukhonya.

²⁰Khwenyanga khwebatsule, omundu wosi alekhe okhukhutula khulwe esihanwa es'siro sino esia khurumikhilanga.

²¹Lichoomo liefwe nokhukhola akali amalahi imbeli wo Mwami, ne imbeli wo Mwami yenyene tawe, nebutswa nende imbeli wabandu.

²²Kho halala nabasubili basiefwe yabo, khurumanga omusubili wasiefwe owakhwateema hali khase, ma nikhunyola nali owesinani okhukhonya mumang'ana amenji. Ne luno ali nesinani okhuyombiakhwo sichila ali nolutswoni olukali khwinywe.

²³Tito nowasianje, ne akholanga emilimo n'nase okhumukhonya inywe. Nebutswa abasubili bandi abetsanga halala n'naye nabakobokheli belikanisa, khandi baleranga oluyali khu Kristo.

²⁴Kho mubamanyie obuyanzi bwenywe, kho abasubili bosi basubile ma bamanye mbu khuli habwene okhwetsuuba khulwe inywe.