Read lunyore 2 BAKORINTHO 9 Bible Online

2 BAKORINTHO 9 - lunyore bible

2 BAKORINTHO 9

¹Sibulaho esichila muhandichile khwing'ana liobukhonyi oburumilwanga abandu ba Nyasaye.

²Manyile okhulalila khwa muli n'nakhwo okhukhonya kata ndeitsoomianga khulwe inywe imbeli wabandu ba Makedonia. Ndababool'la, “Abasubili basiefwe aba Akaya berechekha okhuchiaka omuhika okwahweye.” Ne esinani sienywe sichemuye obwinji bwabwe.

³Luno rumanga abasubili basiefwe yaba kho okhweitsoomia khwefwe khulwenywe mwing'ana yili khulekhe okhuba okhwa amang'ana amakhaya tawe. Nebutswa singa ndaboola, mulabe aberechekhu okhuhaana obukhonyi bwenywe.

⁴Karakhaba mbu olwa mba ninzitsa nende abandu ba Makedonia bandi, muranyoolekha nimusili okhwerechekha tawe, sichila khwakhasimba emirwe — sila okhuboola khwo es'simba murwe esiamwakhaba nimunyooye inywe abene tawe, okhuba khwakhaba nikhunayile khwinywe okhusila!

⁵Kho nduutsi nikali akobuha mbu saaye abasubili basiefwe baranjil'le okhwitsa khwinywe barechekhe esihanwa sienywe singa mwali okhusubisia. Kho esihanwa sibe esierechekhu olwanzitsa ma kalolekhe tooto mbu nesihanwa esiobwehani ne tawe esiokhuhachibwa.

⁶Mwitsul'le mbu oraakanga imwo indititi alachesa ebitititi, ne oraakanga imwo inyinji alachesa ebinji.

⁷Siomundu ahaane singa omwoyokwe kulaliye, arahana nokhukakhamana nohomba okhuhachibwa tawe, sichila Nyasaye ayanzanga omundu ohaananga nasangal'le.

⁸Nyasaye anyala okhumuha siomundu tsikhabi okhuyomba elienya lilie; kho hali khase mube nende ebindu biosi ebiamutakha khandi mulasilana n'nabio khulwa siomulimo omulahi.

⁹Singa Amahandiko kaboolanga, “Ahaananga namakhono amasiro khubatakha, esirendasie simenyanga inziayo.”

¹⁰Ne Nyasaye ohetsanga omulimi imwo nende obusuma bwokhulia yakhamuhe imwo yamwenyanga nachikhusia nameta okhwama khwayo okhulondokhana nokhuhana khwenywe okhwa amakhono amasiro.

¹¹Ye alamuhindihasia inywe munjila yosi khulwo obuhaani obwa amakhono amasiro, kho abandu abenji bamukhupile Nyasaye embwo khulwe esihanwa sienywe esiabanyoola okhubir'ra khwifwe.

¹²Okhuba oburumikhi buno obwa mukholanga sibuli mbu bukhonyanga obutambi bwabandu ba Nyasaye bonyene tawe nikarali khandi abandu abenji bametanga okhuboola embwo khu Nyasaye.

¹³Okhurulana khumilimo chino echilolekhanga muburumikhi bwenywe, abandu balamwitsoomia Nyasaye khulwo obusubilwa bwenywe okhuhuchiil'la Amang'ana Amalahi aka Kristo aka muribulanga, khandi khulwo obuhaani bwenywe obwamakhono amasiro khubo nende abandi bosi.

¹⁴Ma kalachila babe namahofu khwinywe, nibamusaayila khulwe esirenda sia Nyasaye esisilan'ne okhusila mwinywe.

¹⁵Chende khubool'le Nyasaye embwo khulwe esihanwasie esikhongo okhusila.