Read lunyore BAGALATIA 1 Bible Online

BAGALATIA 1 - lunyore bible

BAGALATIA 1

¹Ise Paulo owoburumwabwe burarula mubunyali bwabandu, nohomba khulwo obunyali bwomundu, nikarali bwarula khu Yesu Kristo, nende Nyasaye Papa owamusimukusia okhurula mubafu,

²halala nabasubili basiefwe bosi abandi n'nabo, khukahandichilanga amakanisa akali Galatia.

³Esirenda sibe khwinywe nomulembe okhurula khu Nyasaye Papa wefwe nende Omwami Yesu Kristo.

⁴Mukhukhukhola okhuba abalakhuule okhurula mwisuba libi eliliho yili, Kristo yehana omwene khulwe tsimbi tsiefwe, mubuhulili khubulalilo bwa Nyasaye wefwe khandi Papa.

⁵Oluyali lube khu Nyasaye inziayo! Amina.

⁶Mbuchile muno singa obwa mulekhele bwangu uyo owali okhumulanga musirenda sia Kristo, nimulonda amang'ana amalahi akeimbila yindi.

⁷Nebutswa sikali ho “amang'ana kandi amalahi” tawe, nikarali mboolanga yaka sichila baliho abalala abamutukatukanga nibenya okhukalukhania amang'ana ka Kristo.

⁸Nebutswa kata nikali ifwe nohomba om'malaika owakharula mwikulu niyakhamukambila amang'ana amalahi akabukhan'ne nende aka khwamukambila, alamwe bulamwa okhutsia mukhutiba.

⁹Khwakaboolakhwo khale, khandi luno mubool'langa, omundu wosi naba namukambila amang'ana kandi akabukhan'ne nende akamwahuchil'la alaamwe bulaamwa.

¹⁰Luno ndakhenya okhuhuchil'lwa na wina; nabandu nohomba na Nyasaye? Nohomba nyenyanga okhuyanzisia abandu? Kho nimba nisiyanzisianga abandu, sindakhaba nindi omurumikhili wa Kristo tawe.

¹¹Lekhe mubool'le, abaana befwe mbu, Amang'ana Amalahi aka ndamukambila mumanye mbu sikali nakomundu namundu tawe.

¹²Kata ise sindakanyoola okhurula khumundu namundu, kata omundu wosi sali niye owali okhunzibaal'la tawe. Yesu Kristo mwene niye owali okhumbisul'la.

¹³Mwahul'la akobulamu bwanje olwa ndali nindehana khubusubili bwa Bayahudi, singa ndakhupianga likanisa lia Nyasaye esibi, ma ndakhola akanyala okhuliononia.

¹⁴Ndali oweimbeli khu Bayahudi basianje abenji abelisuba lianje mukhwenasia khwanje khukobusubili Bwesiyahudi; ndali nindehaana okhusila khumiima chiabakuka befwe.

¹⁵Nebutswa Nyasaye, musirenda sisie yali okhunzela kata nisili okhwibulwa, ma niyananga okhumurumikhila. Kho olwa yachooma,

¹⁶okhubisula omwanawe khwise, khe mbe okamba Amang'ana Amalahi kaake mubetsimbia tsindi, sindatsiakhwo khumundu wosi khulwa okhunzechiyia tawe.

¹⁷Kata sindayanichila okhutsia Yerusalemu okhulola yabo abaaranjil'la okhuba abarumwa, ne mubukono bwene yibwo ndatsia Ebuharabu matetekhana, nolwe inyuma ningalukha Damasiko.

¹⁸Inyuma wemihika chitaru, ndatsia Yerusalemu okhunyoola amang'ana okhurula khu Petero, nimbayo n'naye khulwa amahonga kabili.

¹⁹Ne sindalolakhwo omurumwa undi wosi tawe, narali Yakobo omusiani wanga Omwami.

²⁰Akamandikanga nakatooto. Nyasaye wamanya simbehanga tawe!

²¹Khandi olwe inyuma ndatsia mumbeka tsia Siria nende Kilikia.

²²Olwene yilwo abasanji bamakanisa ke Buyahudi sibali okhuumanya ise mwene tawe.

²³Nikarali bali mbamanya butswa akabandu bandi bali nibaboolanga mbu, “Uyo owakhukhupianga esibi, luno akambanga obusubili bwene yibwo obwa yalinji okhuteema okhwononia!”

²⁴Ma nibetsoomia Nyasaye khulwe ise.