Read lunyore BAGALATIA 2 Bible Online

BAGALATIA 2 - lunyore bible

BAGALATIA 2

¹Inyuma wemihika likhumi nachine, ndakalukha Yerusalemu nende Baranaba; ndabukula Tito nikhutsia halala n'naye.

²Ndali okhutsia sichila Nyasaye yabisula khwise mbu ngwana okhutsia. Mwibukana eliali ahebisu nindi nabemeli belikanisa ndenoosia likambo lia Amang'ana Amalahi eliangambanga mubetsimbia tsindi. Sindayenya emilimo chiandakhola noho echiakholanga chibe echia butswa tawe.

³Tito owandali n'naye, kata nali Omuyunani, siyali okhuhachibwa mbu asebwe tawe.

⁴Kata abandi nibenya mbu kekholekhe mbwo. Nibekatianga okhuba abasubili basiabwe abandu yaba benjila mumukanda kwefwe singa abarunilisi khulwo obulakhuule okhurunilisia akobalakhuule bwakhuli n'nabwo okhubir'ra mubuhambani nende Yesu Kristo. Benya bakhukhole abahambe.

⁵Sikhwahuchilisania n'nabo kata nahati mbu obwatooto bwamang'ana amalahi bumenye khulwenywe.

⁶Ne khubene yabo abali okhufwana singa abemeli, mboolanga yaka sichila sikalombanga obwabukhani bwosi khwise kata nibalinji abemeli nohomba nibaralinji abemeli, Nyasaye sahenganga likondo liomundu tawe. Mboolanga, sibaali neliabameta khumang'ana kanje tawe.

⁷Mubukono yibwo mbu Nyasaye yali niyambelesia omulimo kwokhukambila Abetsimbia amang'ana amalahi singa butswa obwa yahelesia Petero omulimo kwokhukambila Abayahudi Amang'ana Amalahi.

⁸Okhuba khulwo obunyali bwa Nyasaye, ndakholwa omurumwa khubetsimbia singa butswa obwa Petero yakholwa omurumwa khu Bayahudi.

⁹Yakobo, Petero, nende Yohana abali neifuma singa abemeli, bamanyilisia mbu Nyasaye waimbelesia omulimo yiku omuchoomekhe; kho bang'usana amakhono nende Baranaba halala n'nase, singa esimanyilo mbu fwesi khwalinji abalala. Khwahuchil'la mbu Baranaba nende ise khutiyile mu Betsinzibulo ne nabo batiyile mu Bayahudi.

¹⁰Esiabakhureba sionyene siali mbu okhwola khwitsulile abatakha abali mumukanda kwabwe, ling'ana yili ndali nesinani okhulikhola.

¹¹Nolwa Petero yola Antiokia, ndamufukula habulafu sichila yali nesikha.

¹²Olwa abandu bandi abali nibarumilwe na Yakobo bali mbasili okhwolayo, Petero yali nalitsanga nende Abetsimbia bandi. Ne olwa abandu yabo bola, yakalukha inyuma niyeyahula, siyalia nende abetsimbia khandi tawe, sichila yali nariye yabo abasanganga mukes'sebo.

¹³Kata Abayahudi bandi basanga nende Petero khulwo oburi bwabwe. Naye Baranaba yalekwa nende obukalama bwabwe.

¹⁴Ne olwa ndalola mbu sibakholanga habwene singa akatooto aka amang'ana amalahi kenyanga tawe, ndabool'la Petero imbeli wabwe bosi, “Ibe oli Omuyahudi ne wamenyelenje singa owetsimbia, tawe singa Omuyahudi; onyala mbwena okhuteema okhuhachia Abetsimbia okhumenya singa Abayahudi?”

¹⁵Mukhwibulwa, ifwe khuli Abayahudi, ne tawe “Abetsimbia aboni.”

¹⁶Ne khumanyile mbu omundu akholwanga omulunji khu Nyasaye butswa okhubir'ra mubusubili mu Yesu Kristo, tawe khulwo okhukhola akamalako kaboolanga. Nefwe khandi khwasubila mu Yesu Kristo, kho khube abalunji khu Nyasaye okhubir'ra mubusubili bwefwe mu Kristo, ne tawe khulwo okhukhola akamalako kenyanga. Okhuba omundu wosi sabetsanga omulunji khu Nyasaye mukhukhola akamalako kaboolanga tawe.

¹⁷Nikaba nikali olwa khuteemanga okhuba abalunji khu Nyasaye khulwo obuhambani bwefwe mu Kristo, khunyoolekhanga nikhuli aboni, singa butswa obwa Abetsimbia bali, kho yaka kaboolanga mbu Kristo akhonyel'langa mukhukholwa khwetsimbi noho? Kata nahati tawe.

¹⁸Nimba ninjiaka okhwombokha khandi akandali okhusambula kho manyikhanga obwandi omufukuli wamalako.

¹⁹Okhubir'ra mu Malako yako, ise ndafwa. Amalako kene kali okhunzira, khembe mwoyo khulwa Nyasaye. Ndali okhubambwa halala nende Kristo,

²⁰ne sindi nise oli mwoyo tawe, nikarali Kristo omenyanga mwise. Ne obulamu yibu obwamenyanga luno menyanga khulwa obusubili okhubir'ra mu Mwana wa Nyasaye, owanyanza nahana obulamubwe khulwanje.

²¹Sulanga okhwambakhana esirenda sia Nyasaye. Nebutswa omundu naba nakholwa omulunji okhubir'ra mumalako, kamanyianga okhufwa khwa Kristo nokhwa butswa.