Read lunyore BAGALATIA 3 Bible Online

BAGALATIA 3 - lunyore bible

BAGALATIA 3

¹Inywe Abagalatia abahingwa! Niwina owamuloka? Inywe abokhufwa khwa Yesu Kristo khumusalapa khwalolesibwa mutsimoni tsienywe habulafu!

²Mumbool'le ling'ana yili lionyene: mwanyoola Omwoyo wa Nyasaye khulwa okhukhola akamalako kenyanga, nohomba khulwo okhuhulila Amang'ana Amalahi nende okhukasubila?

³Mwakhanyala mbwena okhuba abahingwa mbwo? Mwachachila mu Mwoyo wa Nyasaye; ne luno murunanga okhumaliil'la mubunyali bwenywe?

⁴Obumanyilisi bwenywe bwosi sibwamanyia khwo esindu tawe? Tooto okhumanyia esindu khwali butswa?

⁵Nyasaye amuhetsanga Omwoyowe nakhola akamangalimwa mwinywe sichila mukholanga akamalako kenyanga nohomba muhul'langa Amang'ana Amalahi ma mukasubila?

⁶Kanil'lekhwo obumanyi bwa Aburahamu; singa obwa Amahandiko Amatsienukhu kaboolanga, “Yasubila Nyasaye, ma khulwo obusubilibwe Nyasaye yamubala okhuba omulunji.”

⁷Mukwana okhumanyilisia mbu abali ebisoni bia Aburahamu nibo abandu abali nobusubili.

⁸Amahandiko Amatsienukhu karooba khale mbu Nyasaye yakhakhole Abetsimbia abalunji khulwo obusubili. Ma Amahandiko Amatsienukhu kekholel'la okhulandia Amang'ana Amalahi khu Aburahamu: “Okhubir'ra mu ibe abandu bosi bomusibala bakhanyoole ikhabi.”

⁹Aburahamu yasubila ma nalamilwa ikhabi; kho bosi abusubila yabo balilamilwa ikhabi singa obwa Aburahamu yali.

¹⁰Yabo abeleetanga khubuhulili bwa Malako balamenya musilaamo; okhuba Amahandiko Amatsienukhu kaboolanga mbu, “Omundu uyo wosi orahul'langa amang'ana kosi akahandikwa musitapu esia Malako, ali musilamo sia Nyasaye.”

¹¹Luno kali kol'lani mbu abulaho omundu obal'lwa obulunji imbeli wa Nyasaye khulwa Amalako tawe, sichila Amahandiko Amatsienukhu kaboolanga, “Omulunji alamenya khulwo obusubili.”

¹²Amalako sikali esindu khubusubili tawe. Mubukono bwako Amahandiko Amatsienukhu kaboolanga, “Omundu uyo okholanga akamalako kaboolanga kosi yakhabe mwoyo.”

¹³Kristo yakwa owesilaamo khulwe ifwe okhukhununula okhurula musilamo sia Malako kaleranga; okhuba Amahandiko Amatsienukhu kaboolanga mbu “Omundu wosi owasungwa khumusaala ali hasi wesilaamo sia Nyasaye.”

¹⁴Kristo yakhola yaka kho ikhabi eyayasubisia Aburahamu ehebwe Abetsimbia okhubir'ra mu Yesu Kristo, khe khulwo obusubili khunyoole Omwoyo owakhwasubisibwa na Nyasaye.

¹⁵Abaana befwe nyenyanga okhumuhelesia esimanyilo esia bulitukhu: Olwa abandu babili bahuchilisania khwing'ana ma bare mubuhandiche ake indakano tsana, abulaho omundu onyala okhuchifunaka nohomba okhuchimeta khwo esindu tawe.

¹⁶Kho Nyasaye yaha Aburahamu lisubisio ye nende owolwibulolwe. Amahandiko sikaboolanga mbu, nende “Abetsukhulu” tawe akaboolanga mbu abandu abenji tawe nebutswa mulala, mbu “Omwitsukhulu” ne niye Kristo.

¹⁷Elianjoomanga okhuboola ndieli mbu Nyasaye yalomba obulakane nende Aburahamu ma nasubisia okhubulinda. Amalako akahanwa olwe inyuma olwemihika etsimia tsine namakhumi kataru, sikakhanyala okhufunaka indakano ya Nyasaye yalomba ma kononie lisubisio lia Nyasaye tawe.

¹⁸Kho nikakhaba esihanwa sia Nyasaye esiobulame sieleetanga khu Malako, kho sikasieleta khwisubisio lilie khandi tawe. Ne kata mbwo, kali khulwe lisubisio lilie mbu Nyasaye yahana esihanwa yisio khu Aburahamu.

¹⁹Kho busina khube nende Amalako? Kametwa khwo khulwo okhumanyia okhukhola tsimbi nisina, ne kali okhuchoomwa mbu kamenye okhwola olwa omwitsukhulu wa Aburahamu, owali okhusubisibwa yakhetse. Amalako kahanwa nabamalaika, nende omundu owalingi singa omwemeli.

²⁰Ne omwemeli siyenyekha olwomundu aliho mulala yenyene tawe; ngarali Nyasaye ni mulala.

²¹Kho yaka kamanyianga mbu Lilako lifukulanga amasubisio ka Nyasaye noho? Tawe; kata hati! Okhuba nikakhabeye abandu bakhanyooye Amalako akakhaler're obulamu, khe siomundu yakhakhol'lwe omulunji khu Nyasaye khulwa okhuhesia Lilako.

²²Nebutswa Amahandiko kaboolanga mbu esibala siosi sili hasi wobunyali bwetsimbi; ma kho esihanwa esiasubisibwa khulwo obusubili mu Yesu Kristo sihanwa khu yabo abasubilanga.

²³Neinyinga yobusubili nesili okhwola, Amalako kali nikakhwikal'la, nikhuli singa ababohe okhwola olwobusubili bwene yibwo bwakhabe nibubisukhile.

²⁴Ma kho Amalako kali nikakhulinda ifwe, okhwola olwa Kristo yali okhwitsa, mbu khukholwe abalunji okhubir'ra mubusubili.

²⁵Luno olwobusubili bwitsile, Amalako sikasikhulinda tawe.

²⁶Kali okhubir'ra mubusubili mbu mwesi muli abaana ba Nyasaye, mubuhambani nende Yesu Kristo.

²⁷Mwali okhubaputiswa okhwinjila mubulala nende Kristo kafwana butswa singa abebikhile Kristo.

²⁸Saliho Omuyahudi noho Omuyunani, omuhambe noho omulakhule, owes'saatsa noho owesikhasi tawe, mwesi muli mulala mubuhambani nende Yesu Kristo.

²⁹Nimuba nimuli aba Kristo, kho muli abetsukhulu ba Aburahamu, ma mwakhanyoole esia Nyasaye yasubisia.