Read lunyore BAGALATIA 4 Bible Online

BAGALATIA 4 - lunyore bible

BAGALATIA 4

¹Kho mboole mbu omulamilwa ikhabi olwa asili omwana, siyabukhan'ne nende omuhambe tawe, kata nikali emiandu chiosi nechichie.

²Olwa asili omwana baliho abandu abamuhendelanga nende okhulinda amang'ana kaake okhwola khunyinga yasamwana yalaka.

³Nefwe khandi, khwali abahambe boburuchi bwemioyo chiesibala. Olwa khwali nikhusili okhwola khubukhuli bwomwoyo.

⁴Nolwe inyinga yali niyol'le, Nyasaye yaruma Omwanawe mwene niyebulwa nomukhasi. Ma namenya hasi wamalako Kesiyahudi,

⁵okhununula yabo abali hasi wamalako kho ifwe khube abaana ba Nyasaye.

⁶Khulwo okhumanyia mbu inywe muli abaanabe, Nyasaye yaruma Omwoyo kwo Mwanawe mumioyo chiefwe, Omwoyo okwalanjisia mbu “Abba! Papa!”

⁷Kho siosili omuhambe khandi tawe ngarali oli omwana uwe. Ne khulwa mbu oli omwana uwe, alikhuhelesia biosi ebiali n'nabio khulwa abaana baabe.

⁸Khale simwali okhumumanya Nyasaye tawe, mwalinji abahambe bebilonge ebirali abanyasaye tawe.

⁹Ne lunondi olwa mumal'le okhumanya Nyasaye kata ngwan'ne okhuboola mbu Nyasaye wamumanya, kho, kakhaba mbwena mukalukhe inyuma khuburuchi bwemioyo emitofu oburahela tawe? Busina mwekombanga okhuba abahambe bachio khandi?

¹⁰Mukalihianga amatukhu kandi nende emiesi, nende tsinyinga, nende emihika.

¹¹Ndi noburi khwinywe! Kanyala okhuba mbu emilimo chianje chiosi khulwenywe chiabeyenge echia butswa?

¹²Muhombanga abaana befwe, mube singa ise. Nekata mbwo ise ndi singa inywe. Musili okhukhol'la khwo obubi bwosi tawe.

¹³Mwitsul'langa esiachila nimukambila Amang'ana Amalahi olwokhuranga; esifune siali mbu ndali nindwala.

¹⁴Ne kata mbwo liiba liomubili kwanje niliali liteemo khwinywe, simwayisula nohomba okhunjaaya tawe nebutswa mwanyinjisia singa Om'malaika wa Nyasaye; mwanyinjisia singa Yesu Kristo.

¹⁵Mwali abasangalu okhusila! Nisina esiayekholekhele? Ise mwene nyala okhuboola mbu khane mwakhatsomoye tsimoni tsienywe abene, nimwakhanyal'le ma mulambelesia.

¹⁶Khe ndakwiye omusuku wenywe olwa mubool'langa akatooto?

¹⁷Abandu bandi yabo balolesianga esitsanzo esieyinikhu mwinywe, nebutswa amapaalo kabwe sikali amalahi tawe. Bosi barunanga okhumwabukhania n'nase khe mube nesitsanzo mubo singa esianabo bali n'nasio mwinywe.

¹⁸Luno nobulahi okhuba nesitsanzo esieyinikhu singa mbu, nikaba nikali esifune nesilahi — yaka nakatooto amatukhu kosi, ne tawe butswa olwandi n'nenywe lwonyene.

¹⁹Abaana banje, abayanzwa! Khandi, singa butswa nyina abaana abetsanga neinumwa, nimbwo khandi nase mbulilanga okhutsuunwa khulwenywe, okhwola olwa mukwa abalondi ba Kristo abatooto.

²⁰Ndakhekombele okhuba n'nenywe luno, ma ndakalukhania khwo liiba lianje khwinywe. Ndi nesihenda mwoyo esinji khulwenywe.

²¹Lekhe mureebe khwo, inywe abekombanga okhuba hasi wa Malako: simuhul'langa obwa Amalako kaboolanga tawe?

²²Kaboolanga mbu Aburahamu yali nabasiani babili, mulala owomukhasi omurumikhili, noundi owomukhasi omulakhule.

²³Omusiani uwe owebulwa nomukhasi omurumikhili uyo yebulwa munjila eng'ayile, ne owomukhasi omulakhuule yebulwa okhulondokhana nelisubisio lia Nyasaye.

²⁴Amang'ana kano kahulilikhanga singa esimanyilo; abakhasi babili yabo bali etsimuma tsibili. Owabaanabe bebulwa muburumikhili ni Hagari, ne akobokhelanga emuma eyali okhuhanwa khusikulu sia Sinai.

²⁵Hagari akobokhelenga esikulu sia Sinai esili Ebuharabu, sifwanana singa litookho lia Yerusalemu elili mubuhambe halala nende abaana balio bosi.

²⁶Ne Yerusalemu yomwikulu neindakhule ne niyo mama wefwe.

²⁷Amahandiko Amatsienukhu kaboolanga, “Sangala, ibe omukhasi orebulanga abaana, lakaya nolanjisia nobusangali ibe oratsunungwa neinumwa, Okhuba omukhasi omulekhwa yakhabe nabaana abenji okhuyomba abo uyo oli nomusaatsa.”

²⁸Kho lunondi, abaana befwe, muli abaana ba Nyasaye abali abobusubisie singa Isaka yali.

²⁹Mumatukhu yako omusiani owebulwa owomubili yamukhupia esibi uyo owebulwa khulwo Omwoyo wa Nyasaye; ma nimbwo kali kata lunondi.

³⁰Nebutswa Amahandiko Amatsienukhu kaboolanga mbwena? Kaboolanga, “Khunga omukhasi omurumikhili uno nende omwanawe, okhuba omwana womukhasi omurumikhili salilaamilwa obulame halala no mwana womukhasi omulakhule tawe.”

³¹Kho luno, abaana befwe, sikhuli abaana bomukhasi omurumikhili tawe, nebutswa abomukhasi omulakhule.