Read lunyore BAGALATIA 5 Bible Online

BAGALATIA 5 - lunyore bible

BAGALATIA 5

¹Obulakhuule nibwo obwakhuli n'nabwo, ne Kristo niye owakhukhola okhuba abalakhuule! Kho khasinjile singa abandu abalakhule, ma murahuchil'la okhukwa ababohe khandi tawe.

²Lole! Ise Paulo mubool'langa mbu, nimuba nimuhuchil'la okhusebwa abene, kamanyianga mbu Kristo siyakhaba owobukhonyi bwosi khwinywe tawe.

³Khandi nzechiyianga omundu wosi owakhahuchil'la omwene okhusebwa khatimba ahesie Amalako kosi.

⁴Abandi khwinywe abateemanga okhukholwa abalunji khulwo okhulinda Amalako, mwamala okhweyahula abene okhurula khu Kristo. Muli ehale nesirenda sia Nyasaye.

⁵Singa khwifwe okhunaaya khwefwe khuli mbu Nyasaye yakhakhukhole okhuba abalunji khuye; ma yaka niko akakhulindil'langa khulwo obunyali bwo Mwoyo wa Nyasaye atiyanga okhubir'ra mubusubili bwefwe.

⁶Olwa khuli mubuhambani nende Yesu Kristo, okhusebwa nohomba okhubula okhusebwa sikhuleeranga obwabukhani bwosi tawe; esikholanga nobusubili obutiyanga okhubir'ra mubuyanzi.

⁷Mwali nimutsitsachil'langa obulahi okhusila! Niwina owamwikal'la okhuhesia akatooto? Yamuhombelesia mbwena?

⁸Yako sikaali okhukholwa na Nyasaye owamulanga tawe.

⁹“Namamela amatititi butswa akachilanga omuhayila nikusimba,” singa obwa baboolanga.

¹⁰Nebutswa ndi nobusubili mwinywe mbu obulamu bwefwe mu Mwami bumbetsanga olutswoni mbu simulabakhwo namapaalo kandi lukano nakanje tawe. Ne khandi omundu uyo omunyasianga, kata abe wina, yakhanyoole esinyasio okhurula khu Nyasaye!

¹¹Singa ise, abaana befwe, nimba nisikambanga mbu akes'sebo kasienyekha, busina sikhupibungwa esibi? Nikaba yaka nakatooto kho obukambi bwanje khukomusalapa kwa Kristo sibwakhalera omunyakhano tawe.

¹²Ndakhekombele abandu yabo abamunyasianga bakhatsiye butsia; lekhe batsitsachil'le okhwelata abene!

¹³Singa Inywe baana befwe mwalangwa mube abalakhule. Nebutswa muralekha obalakhuule bwenywe bukwe olubir'ro lwokhulekha obwekombi bwenywe obwemibili okhumuruka tawe, ngarali mulekhe obuyanzi bumulombe murumikhilanenje abene khubene.

¹⁴Okhuba Amalako kosi kahesibwa mwing'ana elala, mbu “Oyanze owasio singa obwa weyanzanga omwene.”

¹⁵Ne nimuba nimulumananga singa tsinyama nambulimo nimusalisanianga abene khubene, muhenge bulahi khase mwakhamalana abene khubene.

¹⁶Akamboolanga ngaka: mulekhe Omwoyo yemel'le obulamu bwenywe, ne murahesia obwekombi obwomubili tawe.

¹⁷Okhwekomba khwomubili khufukulanga okhwenya khwo Omwoyo ne okhwekomba khwo Omwoyo khufukulanga okhwekomba khwomubili. Okhuba biombi bifukulananga, ma yaka kamanyianga mbu simunyala okhukhola akamwenyanga okhukhola tawe.

¹⁸Nimuba nimwemel'lwa nende Omwoyo, simulaba abahambe ba Malako khandi tawe.

¹⁹Emilimo chiomubili chili habulafu mbu: obuheyi, nende ebikholwa ebirali ebilahi, obusambale,

²⁰okhwekayakaya emisambwa, obulosi. Abandu okhuba abasuku, okhukhupana, nibaba abeimbalikha, abelirima, abemani, beyabukhania mumikanda lukano lukano,

²¹nibaba abokhusiendekha, abakholwi, abalangu nende okhukhola ebindu bindi ebifwana singa yibio. Muchetsiyianga singa ndakholanga khale: Yabo abakholanga amang'ana akafwana mbwo sibakhabe nobweyangu mu Bwami bwa Nyasaye tawe.

²²Ne, ebiamo bio Mwoyo mbiebino, obuyanzi, obusangali, omulembe, obwesimilisi, tsimbabasi, obulahi, obusubilwa,

²³obuhoma, okhwelinda omwene. Sil'liho lilako elikayanga amang'ana akafwana yaka tawe.

²⁴Ne yabo abali aba Yesu Kristo bamala okhwira okhwonyonywa nokhwekomba khwomubili.

²⁵Omwoyo wakhuhelesia obulamu; okhwola khwemel'lwe khandi no Mwoyo.

²⁶Khulekhe okwepaaka butswa nikhurindilana, nikhusiendekhelana.