Read lunyore BAGALATIA 6 Bible Online

BAGALATIA 6 - lunyore bible

BAGALATIA 6

¹Abaana befwe omundu naba nanyoolekha mububi bwosi, inywe abali abo Mwoyo mukwan'ne mumukol'losie ne okhwola mukhole mbwo munjila indahi. Ne nenywe mwelinde khase mwakhatemwa.

²Mukhonyanenge okhuchinga ebisiro bienywe abene khubene, ne munjila iyi mulahesia lilako lia Kristo.

³Omundu niyepaalanga singa obwali esindu, ne narali esindu, yekaatianga omwene.

⁴Siomundu achele emiima chichie omwene. Nichiba nichili emilahi kho abe nokhweitsoomia khukhwe yenyene, narechelanianga khumang'ana ako oundi yakhola tawe.

⁵Okhuba siomundu alachinga ebisiro bibie omwene.

⁶Owibaal'lwanga ling'ana liesikristo okhwola asange mubindu biosi ebilahi nende omwibaali uwe.

⁷Murekaatia abene tawe; abulaho onyala okhutsekhel'la Nyasaye. Omundu achesanga esiarakanga.

⁸Okhuba naba naraaka khumubili kukwe omwene khumubili alichesa obwonekhu. Nebutswa orakanga esio Mwoyo khu Mwoyo alichesa obulamu oburahwa.

⁹Kho khurachonya okhukhola amalahi tawe; sichila nikhuba nikhurahinia khwo omwoyo inyinga nayoole olwa nakhuchese.

¹⁰Kho singa olwakhuli nobweyangu khukhol'lenje abandu bosi amalahi, nokhusila muno khubasubili basiefwe mu Kristo.

¹¹Lole obwa mandichile etsinyokuta tsingali nomukhono kwanje omwene.

¹²Abandu bamuhachianga okhusebwa nibo abekombanga okhwelolesia nende okhwehila imbeli khumang'ana kesioba butswa. Bakholanga mbwo, khulwa mbu balekhe okhukhupibwa esibi khulwo omusalapa kwa Kristo.

¹³Kata abene yabo abasebwanga sibalindanga Amalako tawe; benyanga musebwe kho benyol'le oluyali mukhusebwa khwenywe.

¹⁴Ne khulwe Ise nyala okhweyitsoomichisia omusalapa kwo Mwami wefwe Yesu Kristo; khulwa omusalapakwe esibala siafwa khuise, nase ndafwa khusibala.

¹⁵Sikahendianga esindu siosi omundu nasebwa nohomba narasebwa tawe; ling'ana liobuha nokhuba esilonge esiyia.

¹⁶Omulembe netsimbabasi bibe khu yabo abalondanga lilako yili mubulamu bwabwe, nende khubandu ba Nyasaye bosi!

¹⁷Nimalilanga: omundu wosi alekhe okhunyasia khandi tawe sichila tsimbala tsiandi n'natsio mumubili kwanje tsimanyianga mbu ndi omuhambe wa Yesu.

¹⁸Esirenda sio Mwami wefwe Yesu Kristo sibe n'nenywe mwesi, abaana befwe. Amina.