Read lunyore BAEFESO 2 Bible Online

BAEFESO 2 - lunyore bible

BAEFESO 2

¹Khale inywe mwesi mwalinji abafu mu Mwoyo khulwe esikala marwi sienywe nende tsimbi tsienywe.

²Olwene yilwo mwachendanga muliiba libi eliesibala sino; nimulonda omuruchi wobunyali bwemioyo echiomumiiya, uyu niye omwoyo owamihanga n'nondi mubandu abarahulilanga Nyasaye.

³Nefwe fwesi khwali singa yabo, nikhumenyanga mubwekombi bwemibili chiefwe, nikhukhola amang'ana akokhuyanzisia emibili nende amapaalo kefwe. Mumela yefwe eyomubili, ifwe singa abandu bandi bosi khwali nikhwakhalachila okhuhebwa esinyasio mwirima lia Nyasaye khulwe tsimbi tsiefwe.

⁴Nebutswa tsimbabasi tsia Nyasaye netsinyinji, khandi obuyanzibwe khwifwe nobwinji;

⁵mbu kata olwa khwali abafu khulwe tsimbi tsiefwe, yakhuleera mubulamu halala nende Kristo. Kali khulwe esirenda sia Nyasaye, mbu inywe mwahonibwa.

⁶Okhubir'ra mu Kristo, Nyasaye yakhusimukusia halala n'naye khwamihe halala n'naye musibala siomwikulu.

⁷Nyasaye yakhola mbwo mbu achile abandu bosi bamanye obukhongo bwamakana bwesirenda sisie mubuyanzi obwa yakhuyanza mu Yesu Kristo.

⁸Kali khulwe esirenda sia Nyasaye mbu mwahonibwa munjila yobusubili. Sikali khulwe emilimo chienywe emilahi tawe; harali nesihanwa sia Nyasaye;

⁹sikali khulwe ebikhole bienywe abene tawe; kho omundu areyitsoomia khulwe yisio tawe.

¹⁰Nyasaye wakhukhola khube singa khuli, yakhulonga mu Yesu Kristo khukhole ebikhole ebilahi ebia yali niyakhurechekhela okhubikhola.

¹¹Inywe Abetsimbia tsindi oburulanda mwitsul'le obwa mwalinji khale; mwalangwanga “Abarasebwa” nende Abayahudi, “Abasebwa.” (Nibo abasebwa emibili namakhono kabandu butswa.)

¹²Khale lwene yilwo, inywe mwali ehale okhurula khu Kristo. Mwali abacheni ne simwali khwo khubelwa ba Nyasaye tawe. Simwabal'lwa khwo mutsindakano etsiali okhweleta khumasubisio ka Nyasaye khubandube tawe. Mwamenya musibala nimubula obunayi, kata simwali khwo nende Nyasaye tawe.

¹³Nebutswa luno, mu Yesu Kristo inywe abalinji ehale mwaleerwa ahembi khulwo okhufwa khwa Kristo.

¹⁴Kristo mwene wakhuleer'ra omulembe ma wahambania Abayahudi nende abandu betsimbia tsindi okhuba mulala. Khulwo omubilikwe omwene, yalikul'la lisisi eliali niliababukhania, niliabakhola abasuku.

¹⁵Yahiniaho lilako lia Bayahudi, halala nende amebaalo kalio mbu okhurulana khutsimbia tsibili yitsio alombemwo omwene, oluyia l'lala oluyia oluleera omulembe.

¹⁶Khulwo khufwa khukhwe khumusalapa Kristo yera obusuku bwabwe; khulwo omusalapa yahambania tsimbia tsiombi mumubili mulala nabalelera khu Nyasaye.

¹⁷Kho Kristo yetsa nakamba Amang'ana Amalahi akomulembe khwinywe mwesi — inywe Abetsimbia abali nimuli ehale okhurula khu Nyasaye, nende khu Abayahudi abali nibali ahembi khuye.

¹⁸Mu Kristo nimwo omwa fwesi Abayahudi nabetsimbia khunyala okhwinjisibwa mu Mwoyo mulala imbeli wa Papa.

¹⁹Kho inywe Abetsimbia, simuli abacheni kata abaramanyikhan'ne khandi tawe, nebutswa muli abebule halala nabandu ba Nyasaye, khandi abandu abeinyumba ya Nyasaye.

²⁰Inywe khandi mwombokhwa khumuse okwarebwaho nende abarumwa nende abaroobi, naye Yesu Kristo omwene niye lichina liobukhonyi obukali.

²¹Niye ohambanianga halala omwombokho kwosi nakukhola okhukhula nikuba Ehekalu inzienukhu khu Mwami.

²²Muye nenywe khandi nimwo omwa mwesi mwombokhwanga halala nende abandi mbu mube esimenyo sia Nyasaye mu Mwoyo uwe.