Read lunyore BAEFESO 3 Bible Online

BAEFESO 3 - lunyore bible

BAEFESO 3

¹Khulwe esifune yisi Ise Paulo, omubohe wa Yesu Kristo khulwenywe Abetsimbia, saayanga Nyasaye.

²Okhwola mube nimwahul'la siahene mbu Nyasaye khulwe esirendasie waimbelesia omulimo kuno khole khulwo obukhala bwenywe.

³Nyasaye yambisul'la lichoomo lilie eliebisu ma niyamanyia ise akelichoomo tsana. Ndali okhumuhandichilakhwo hatititi khumang'ana tsana,

⁴ne nimusoma aka muhandichiye mwitsa okhulola obumanyi bwanje khukelibiso elia Kristo yilio.

⁵Khale abandu bosi sibabool'lwakhwo libiso yilio tawe, ne luno Nyasaye yabisuliye abarumwabe nabaroobibe abatsienukhu okhubir'ra mu Mwoyo.

⁶Libiso tsana ndielino mbu, Abetsimbia tsindi banyoola halala nende Bayahudi tsikhabi tsia Nyasaye munjila ya Amang'ana Amalahi. Abetsimbia bali ebitonye biomubili mulala tsana, khandi nabasanji mwisubisio elia Nyasaye yasubisia okhubir'ra mu Yesu Kristo.

⁷Nase ndakholwa omukholi owa Amang'ana Amalahi khulwe esihanwa siesirenda esia Nyasaye yambelesia okhubir'ra mubunyalibwe obukholanga emilimo.

⁸Ise ndi omutititi okhusila khubandu ba Nyasaye bosi; kata mbwo Nyasaye yambelesia esirenda mbu ngambile Abetsimbia Amang'ana Amalahi akobuhinda bwa Kristo oburanyala okhuchelwa tawe,

⁹khandi njile abandu bosi balole obwa Nyasaye yahesia libiso lilie. Nyasaye owalonga ebindu biosi yabisa libiso yilio okhurula khale,

¹⁰kho mbu munyinga ino munjila yelikanisa, abamalaika abarukanga khandi abali obunyali bwokhwikulu bamanyibwe obuchesi bwa Nyasaye obuli mutsimbila tsiabwo tsiosi.

¹¹Nyasaye yakhola yaka okhulondokhana nende okhulalila khukhwe okhwa yahesisia mu Yesu Kristo Omwami wefwe.

¹²Ne mu Yesu Kristo khandi okhubir'ra mubusubili obwa khuli n'nabwo muye, khuli nolutswoni nikhwomanga ikholo okhutsia imbeli wa Nyasaye.

¹³Kho musaayanga mbu murafwa emioyo khulwo okhusalila okhwanyolanga khulwe inywe tawe; yako nakobukhala khwinywe.

¹⁴Khusifune yisi sikamanga okhusaaya imbeli wa Papa,

¹⁵khuye ochilanga sieinyumba yosi mwikulu nende musibala nibamenya.

¹⁶Saayanga Nyasaye okhurula khubuhinda bwoluyalilwe amuhelesie obunyali mu Mwoyo uwe mbu mukufuhale mumioyo chienywe.

¹⁷Khandi saayanga mbu Kristo amenyenge mumioyo chienywe khulwo obusubili. Saayanga mbu mube nemisi nimuralila mubuyanzi,

¹⁸kho mbu inywe halala nende abandu ba Nyasaye bosi munyal'lwe okhumanya obwo obuyanzi bwa Kristo buli obubambukhu, khandi noburambi bweikulu, nobwa hasi.

¹⁹Khandi mumanye obuyanzi bwe obwaramana okhumanyikha, ma nende imbikho ya Nyasaye yene.

²⁰Khuye owa khulwe tsingufu tsitsie tsikholanga emilimo mwifwe, anyala okhukhola amang'ana amakhongo okhusila okhuyomba kosi akakhunyala okhusaba kata okhupaalakhwo,

²¹khu Nyasaye ahebwe oluyali lwosi mukanisa khandi mu Yesu Kristo okhwola tsinyinga tsiosi inziayo! Amina.