Read lunyore BAEFESO 5 Bible Online

BAEFESO 5 - lunyore bible

BAEFESO 5

¹Khulwe yako, mulonde mumakulu ka Nyasaye, singa olwa muli abaana ba Nyasaye aba yayanza okhusila.

²Muchendenje mubuyanzi, singa Kristo yakhuyanza, ma niyehaana omwene khulwe ifwe singa omusango okuhunyanga esuswa indahi khandi esihanwa esisangasianga Nyasaye.

³Khulwa mbu muli abandu ba Nyasaye simukwan'ne okhubal'lwa mumang'ana kobusambale, nakesifwabwi kosi, kata obulangu tawe.

⁴Kata amang'ana akes'simba murwe, kata okhwelakanakania, kata tsisambo, yako kosi sikakwan'ne mu inywe tawe. Harali mukwan'ne okhukhupanga embwo khu Nyasaye.

⁵Okhuba mumanyile tooto mbu, omuheyi kata owesifwabwi kata omulangu, kata omwekayakayi wemisambwa, salikhwo nobulaame mu Bwami bwa Kristo nende Nyasaye tawe.

⁶Omundu wosi aramukaata namang'ana makhaya tawe; khulwa amang'ana singa kano oburima bwa Nyasaye bwakhetse khubesikala marwi.

⁷Kho murasanjilananga nabandu singa yabo tawe.

⁸Khale inywe mwamenyanga musiilima, nebutswa olwa mwamala okhukholwa abandu bo Mwami, okhwola muchendenge singa abaana bobulafu:

⁹Okhuba obulafu buleranga singa lichesa liabwo obulahi bwosi, nobulunji khandi nobwatooto.

¹⁰Muteme okhumanya ako Mwami yenyanga mukhole.

¹¹Murasanjilana mubikhole biesifwabwi ebiabandu bakholanga ebibula obukhala tawe, habula mubikondekhele.

¹²Amang'ana kabakholanga m'masilisi nakes'simba murwe kata sinyala okhukarala khwo tawe.

¹³Nebutswa olwa amang'ana kosi kamanyibwa mubulafu, kho imela yabwe yatooto elamanyikhana habulafu;

¹⁴obulafu nibwo obubisulanga ebindu biosi habulafu. Nisio esichila nikaboolwa mbu, “Buukha, ibe okonanga tsindoolo, Osimukukhe okhurula mubafu, Naye Kristo alakhwakhila.”

¹⁵Khulwe yako, mwetembelesie singa obwa mumenyanga. Muramenya singa abandu abarali nobuchesi, habula singa yabo abachesi.

¹⁶Murumikhile bulahi obweyangu bwosi obwamuli n'nabwo sichila amatukhu kano namabi.

¹⁷Kho murabba abahingwa, nebutswa muteeme okhumanya obulahi ako Mwami yenyanga mukhole.

¹⁸Murakholwe newaini tawe, okhuba elamuhingoyia butswa, habula mwitsule Omwoyo Omutsienukhu.

¹⁹Mubool'lanenje abene khubene mumang'ana ketsisaburi netsinyembo etsiokhwitsoomia nende etsiomwoyo; mwembe tsinyembo tsisaburi nende nemioyo chienywe chiosi.

²⁰Mukhupilenje Nyasaye Papa wefwe embwo amatukhu kosi khulwe ebindu biosi, muliira lio Mwami wefwe Yesu Kristo.

²¹Mwelelenje abene khubene khulwa oluyali lwenywe khu Kristo.

²²Inywe abakhasi, mwelele khubasaatsa benywe singa mwelelanga khu Mwami.

²³Okhuba omusaatsa ali nobunyali khumukhasi uwe singa Kristo naye ali nobunyali khwikanisa, Kristo omwene niye omuhonia wabandu belikanisa tsana nalio nomubili kukwe.

²⁴Ne singa obwe likanisa lielelanga khu Kristo, nimbwo abakhasi bakwan'ne okhwelela khubasaatsa babwe mumang'ana kosi.

²⁵Inywe abasaatsa, muyanze abakhasi benywe, singa obwa Kristo yayanza likanisa, nahaana obulamubwe khulwalio.

²⁶Yakhola mbwo okhuhaana likanisa khu Nyasaye khulwe ling'ana lilie namal'le okhulisiya nalisaabile mumaatsi,

²⁷mbu yehelesie omwene likanisa mubulahi bwalio bwosi lisiyikhu nilibula esikha, nilibula khwo esipala kata likhanya, nohomba kata esindu siosi esirali esihesikhu.

²⁸Abasaatsa bosi bakwan'ne okhuyanza abakhasi babwe singa obwa bayanzanga emibili chiabwe abene. Omusaatsa oyanzanga omukhasi uwe yeyanzanga omwene.

²⁹(Omundu wosi sasinyikhilanga omubili kukwe omwene tawe harali akukakulanga nakutenda singa Kristo akhol'langa likanisa;

³⁰okhuba ifwe khuli ebiimo biomubili kukwe.)

³¹Singa Amahandiko kaboolanga, “Khusifune yisi omusaatsa alalekha samwana nende nyina, ma ahambane nomukhasiwe, nabo babili balaba omubili mulala.”

³²Khuli nende obwatooto obukhongo obwa amang'ana yaka kabisulanga, obwa nase manyilisianga mbu kachoomele khu Kristo nende likanisa lilie.

³³Nebutswa khandi kali khu buli mundu khwinywe: buli Omusaatsa amuyanzenje omukhasi uwe, singa yeyanzanga omwene, omukhasi naye amuhe omusaatsawe oluyali.