Read lunyore BAFILIPI 2 Bible Online

BAFILIPI 2 - lunyore bible

BAFILIPI 2

¹Obulamu bwenywe mu Kristo bumukufuhasianga, ne obuyanzi bubwe bumuhotselesianga. Omwoyo wamuhambania abene khubene, ma muli netsimbabasi nokhubeel'lana abene khubene.

²Kho muhombanga okhwitsusia obusangali bwanje mukhuba namakani amalala, nokhusanga mubuyanzi bulala, nokhuba mulala mumwoyo nende mumakani malala.

³Murakhola ling'ana liosi nomwoyo kwokhwerun'na nohomba khulwa okhutsalikha tawe, nebutswa mwetutuyie abene khubene, siomundu alolenje abasie nabalahi okhumuyomba.

⁴Siomundu arahendela obulahi bubwe omwene tawe, habula ahendele obulahi bwabasie.

⁵Mubetsenje nomwoyo okwa Yesu Kristo yalikhwo n'nakwo:

⁶Ye yalinji nokhufwana Nyasaye, nebutswa siyapaalakhwo mbu anyala okhuhelana nende Nyasaye khulwa okhuhachilisia tawe.

⁷Habula khulwa okhwenya khukhwe omwene, yalakhuula biosi ebia yali n'nabio, nabukula imbila yomuhambe. Nalolekha singa omundu, ma nalolekha mukhufwana khwomundu.

⁸Yetutuyia niyekhola omuhulili okhwola mukhufwa, ye, okhufwakhwe khumusalaba.

⁹Khulwe yako, Nyasaye yamuchingula ikulu okhusila, namuhelesia eliira eliyombele amera kandi kosi.

¹⁰Kho, muluyali lweliira lia Yesu, ebilonje biosi ebiomwikulu, nende khusibala nende ebili hasi wesibala biakhasikame khumasikamo kabio,

¹¹ne siomundu alieyama mbu Yesu Kristo no Mwami, khu luyali lwa Nyasaye Papa.

¹²Kho abalina banje, singa mwali abahulili khu ise olwa ndali n'nenywe, kali akobuha obukali mbu mube abahulili muno olwa ndi ehale n'nenywe. Mutsilil'le okhutiya noburi, nende okhutechela okhuhesia obuhoni bwenywe,

¹³sichila Nyasaye atiyilanga mwinywe okhuhesia okhulalila khwe, nokhukhola lichoomo lilie omwene.

¹⁴Kholenje amang'ana kosi sila okhwekaana kata okhuhingana tawe.

¹⁵Kho mube abesilongole abali abahoma khandi abaana ba Nyasaye abahesikhu, abamenyanga musibala esia bandu abasiamu khandi aboni. Okhwola mwakhe khubo singa etsiyasulwe etsiakhanga mwikulu,

¹⁶olwa mubahetsanga ling'ana elileeranga obulamu. Nimukhola mbwo, nemba nende esiokhweyitsoomisiakhwo Khwitukhu lia Kristo, sichila kakhamanyia mbu okhutiika khwanje nokhutiya khwanje sikhwali okhwabutswa tawe.

¹⁷Haundi amatsahi kobulamu bwanje nakatsukhwe singa esihanwa khumusango okwobusubili bwenywe buhananga khu Nyasaye. Nikali mbwo kho ndi nokhwekhoya khandi sangalanga n'nenywe mwesi.

¹⁸Nenywe mwesi mbwo, okhwola mwekhoye nimusangala n'nase.

¹⁹Omwami naba nayanza, nayanga okhuruma Timoteo khwinywe bwangu, khe nemibwe omwoyo okhuhul'la amang'ana kenywe.

²⁰Okhuba sindi nende oundi wosi owomwoyo singa okukwe onyala okhumuhendela tawe.

²¹Abandi bosi bahendelanga amang'ana kabwe abene, ne tawe yako aka Yesu Kristo.

²²Nebutswa inywe mumanyile obwa yabeye nobukhala obukali khwise, obwa ye n'nase khufwana singa omwana na samwana, khwatiyile halala khulwa Amang'ana Amalahi.

²³Kho naayanga okhumuruma khwinywe bwangu singa nambe nindutsi obwa nakafwane khwise.

²⁴Khandi subilanga mu Mwami mbu nase mwene nambe onyala okhwitsa khwinywe.

²⁵Ndaluutsi mbu nakobuha okhumurumila omwana wefwe Epafuradito owatiya nalwana halala n'nase, khandi owatiyile singa omurumwa wenywe mubukhonyi bwenywe khu ise.

²⁶Ali namahofu khwinywe mwesi, ma ahendanga omwoyo sichila mwali nimuhuliye mbu nomulwaye.

²⁷Okhuba tooto yali omulwaye, ahembi okhufwa. Nebutswa Nyasaye yamubeela tsimbabasi, ye yenyene tawe, habula nende khu ise khandi, mbu ndekhe okhumetekha nesibeela esinji.

²⁸Niko akachila nindekomba okhusila okhumuruma khwinywe, mbu musangale khandi olwa mumulola ma esibeela sianje sikore.

²⁹Khandi mumwinjisie nobusangali bwosi, singa omwana wenywe mu Mwami. Abandu bosi abafwana singa ye mubahelesie oluyali,

³⁰sichila yara obulamubwe mubutinyu ma naba ahembi okhufwa khulwe emilimo chia Kristo, mbu yakhonye ake inywe murakhakhol'le tawe.