Read lunyore BAFILIPI 3 Bible Online

BAFILIPI 3 - lunyore bible

BAFILIPI 3

¹Eliesihesi abaana befwe, musangale mu Mwami. Sikamendia okhukalukhila mukandamuhandichila khale tawe, nakabe akobukhala khwinywe nikhola mbwo.

²Mube abachesi khubakholi bebindu ebibi, mube abachesi khutsimbwa yitsio, abandu abahachilisianga okhwekhalakanga omubili.

³Nifwe abasebwa okhusebwa khwatooto tawe bo, okhuba khwekayakayanga Nyasaye khulwa Omwoyo uwe ne nikhusangala mubulamu bwefwe mu Yesu Kristo. Sikhusubilanga akomubili tawe.

⁴Nase ndakhanyal'le okhusubilanga akomubili mubindu yibio. Omundu naba napaala mbu anyala okhusubila akomubili, ise muyomba mubifune bianje.

⁵Ndasebwa khwitukhu liamunane, mukhwibulwa ndi Omuisiraeli, owolwibulo lwa Benjameni, Omuheburania lichina. Mukhulonda Amalako aka Bayahudi, ndali Omufarisayi.

⁶Khandi ndali nolutswoni okhukhupia abandu belikanisa esibi. Okhulondokhana nende obulunji bwomundu okhuhul'la Amalako, sindali nesikha tawe.

⁷Ne yako kosi aka ndakhabal'le singa akobukhala khwise, ngabalanga singa amandu butswa khulwa Kristo.

⁸Sikali yako konyene tawe; mbalanga kosi akandakhola singa amandu butswa, khulwa obumanyi bwa Yesu Kristo Omwami wanje obuli obwobukhala po. Khulwa ye, ndalekhana nabuli sindu. Ne mbalanga kosi singa amakokha butswa, khe nobukhala okhuba owa Kristo,

⁹ma mambane kupu n'naye. Sindikhwo nobulunji bwanje omwene khandi tawe obunyoolekhanga khulwa okhuhul'la Amalako. Luno ndi nende obulunji obunyoolekhanga munjila yokhusubila Kristo, obulunji oburulanga khu Nyasaye obweletanga khubusubili.

¹⁰Elianyenya okhusila nokhumanya Kristo, nobunyali obwokhusimukukhakhwe, nokhusanga mukhusalilakhwe, nokhuba singa ye mukhufwakhwe,

¹¹mbu nikaba nikanyalikha nase ndisimukusibwa okhurula mubafu.

¹²Sindelolanga mbu mal'le okhuleka nohomba mal'le okhuba omuhesikhu tawe. Mambachil'langa okhunyoola esihanwa; khusifune yisi Yesu Kristo omwene yali okhukhola ise okhuba omulondi uwe.

¹³Abaana befwe, tooto simpaalanga mbu mal'le okhuleka tawe; harali eliakhola nelala mbu okhwibil'la akali inyuma wanje, nikhola esinani okhwola khukali imbeli.

¹⁴Kho nzilukhanga ninjoomele okhwola khusihesi, ma nyoole esihanwa esiokhuleka, nisio omulango okwa Nyasaye akhulanjilanga mu Yesu Kristo okhutsia mubulamu ikulu.

¹⁵Ifwe fwesi abamala okhukhula mu Mwoyo khube namakani amalala. Nebutswa abalala khwinywe nibakhaba namakani akabukhan'ne, Nyasaye alamubisul'la habulafu.

¹⁶Kata nikali mbwena, lekha khutsilil'le imbeli okhulondokhana namalako akakhwalonda okhwola luno.

¹⁷Mutsilil'le okhulonda esilolelo sianje, abaana befwe. Muhulile yabo abalondanga injila eya habwene eya khwamumanyia.

¹⁸Ndali okhumubool'la ling'ana yili hali khenji, ne khandi ndikalukhilangamwo nindakaya amasika: baliho abandu abenji abobulamu bwabwe bubakholanga abasuku bokhufwa khwa Kristo khumusalapa.

¹⁹Balamalil'la mu Kehena, sichila Nyasaye wabwe nokhwekomba khwemibili chiabwe. Behilanga imbeli khukabakwan'ne okhusimbila emirwe, khandi bapaalanga okhukhola akabandu abesibala sino bakholanga.

²⁰Ifwe khuli aboluyia olwomwikulu, ne khandi khulindil'langa omuhoni wefwe, Omwami Yesu Kristo okhwitsa, okhurula mwikulu.

²¹Alikalukhania emibili chiefwe emitofu echifwitsanga, nachikhola nichifwana omubili kwoluyalilwe omwene, narumikhilanga obunyali obuchila nanyala okhura ebindu biosi hasi woburuchibwe.