Read lunyore BAFILIPI 4 Bible Online

BAFILIPI 4 - lunyore bible

BAFILIPI 4

¹Khulwe yako abaana befwe mako obwa ndamuyanza khandi ndi namahofu khwinywe! Mako obwa muusangasianga, khandi mako obwa mwekhoyelanga inywe! Nimbwo abaana befwe abandayanza mukwan'ne muralilenge mu Mwami.

²Mombanga ibe Euyodia nende Sunutuke nimuyanza muteeme okhuhul'lisania singa abambotswa mu Mwami.

³Nawe omulina owasianje omusubilwa, nyenyanga obakhonye abakhasi yaba; okhuba bakholanga emilimo halala n'nase obutinyu okhulandia Amang'ana Amalahi halala nende Kilementi nende abakholi basianje bandi bosi abamera kabwe kali musitapu sia Nyasaye esiobulamu.

⁴Musangale mu Mwami amatukhu kosi, khandi mboolanga sangale.

⁵Mube abahoma mumakani kenywe khubandu bosi. Omwami yetsanga bwangu.

⁶Murabba nesihenda mwoyo khusindu siosi tawe, nebutswa mumasaayo kenywe kosi musabe Nyasaye akamwenya, ne musabenje nomwoyo okwokhukhupa embwo.

⁷Ne omulembe kwa Nyasaye okubira okhumanyilisia khwefwe khwosi, kulamulindanga emioyo chienywe nende amapaalo kenywe mu Kristo Yesu.

⁸Eliesihesi abaana befwe, mwitsusie amapaalo kenywe nende amang'ana kosi akali amalahi akakwan'ne okhwitsoomibwa: amang'ana akali akatooto, akobuchesi, akobulunji, amasiyikhu, akokhulera obuyanzi, nende yako kosi akali akoluyali ol'lahi.

⁹Mure mubikhole akamweka okhurula khwise, amang'ana kosi akamwahul'la khwise nende aka mwalola khwise. Ne Nyasaye ohananga omulembe alabetsanga n'nenywe.

¹⁰Sangalanga mu Mwami sichila olweinyuma lwoluhono or'rambi munyala okhunyoola obweyangu okhumanyia mbu mumendel'langa. Simboolanga mwalekha okhundenda tawe, nebutswa simwali nobweyangu obwokhukhola mbwo.

¹¹Khandi simboolanga mbwo sichila ndelolanga singa owebil'lwa tawe, okhuba ndayeka okhukhwana nende esiandi n'nasio.

¹²Ndamanya obwa kafwana okhuba omutakha webindu, khandi ndamanya obwa kafwana okhuba omuhinda webindu. Ndayeka libiso yili kho mbu ahamba nindi hosi, esaa yosi khwane nende esiandi n'nasio, munzikura nohomba munzala, mubuhinda nohomba mubutakha.

¹³Nyala okhukhola amang'ana kosi khulwo obunyali obwa Kristo yambetsanga.

¹⁴Nebutswa mwali nomwoyo omulahi okhukhonya olwa ndali mumanyakhano kanje.

¹⁵Inywe Abafilipi mwesi mumanyile mbu olwa ndarula Makedonia ninywe likanisa lionyene eliali okhukhonya; yilwo nilwo olwa ndachiaka okhukamba Amang'ana Amalahi. Ninywe mwenyene abanombela ebihanwa biamapesa.

¹⁶Olwa ndali okhwenya obukhonyi nindi Tesalonike mwarumilayo okhuyomba l'lala.

¹⁷Sikali mbu nyenyanga ebihanwa bionyene tawe; nikarali esianyenyanga nebikhole ebilahi bimeetekhe khubiamwakhola.

¹⁸Luno kano namang'ana akamanyianga ndali okhunyoola ebindu biosi ebiamwarumila, khandi nebinji okhusilana! Ndi nende ebindu okhubira esichelo okhuba Epafuradito yander'ra ebihanwa biosi okhurula khwinywe. Nebihanwa ebili singa omusango okuhunyanga obulahi, okwahuchil'lwa khandi okhuyanzisia Nyasaye.

¹⁹Ne Nyasaye wanje alamukabul'la kosi akamutakha okhurula khubuhinda bubwe obwinji okhubir'ra mu Yesu Kristo.

²⁰Kho luno Nyasaye wefwe niye Papa, abe noluyali inziaiyo! Amina.

²¹Musiesisie abandu ba Nyasaye bosi mu Yesu Kristo. Abaana befwe abandi n'nabo hano bamusiesisie.

²²Abandu ba Nyasaye bosi hano okhusila muno abomungo mwomuruchi bamusiesisie.

²³Esirenda sio Mwami Yesu Kristo sibe n'nenywe mwesi.