Read lunyore BAKOLOSAI 1 Bible Online

BAKOLOSAI 1 - lunyore bible

BAKOLOSAI 1

¹Ise Paulo, omurumwa wa Yesu Kristo, khulwa okhwenya khwa Nyasaye halala nende Timoteo omwana wefwe, khumuhandichilanga

²inywe abandu ba Nyasaye abali Kolosai abali abaana befwe abasubilwa mu Kristo. Esirenda nende emilembe chia Nyasaye Papa wefwe bibe khu inywe.

³Ifwe khukhupanga embwo khasotso khu Nyasaye, Samwana Omwami wefwe Yesu Kristo olwa khumusaayilanga.

⁴Khwahul'la akobusubili bwenywe mu Kristo Yesu, khandi akobuyanzi bwamuli n'nabwo khubandu ba Nyasaye bosi.

⁵Olwe likambo liatooto, elili Amang'ana Amalahi, liamwitsila olwokhuranga mwahulila akobunaayi bwalio. Kho obusubili bwenywe nende obuyanzi bwayeleeta khukamunayanga akamwabikhilwa bulahi mwikulu.

⁶Amang'ana Amalahi katsitsachil'langa okhumuler'ra tsikhabi ma kalandanga musibala siosi, singa butswa obwa kameetekhanga mwinywe okhurula litukhu eliamwaranga okhuhulila akesirenda sia Nyasaye ma nimusimanya mubwatooto bwasio bwosi.

⁷Mweka esirenda sia Nyasaye okhurula khu Epafura, omurumikhi wasiefwe omuyanzwa oli omufulukhani omusubilwa wa Kristo khulwefwe.

⁸Wamala okhukhubool'la akobuyanzi obwo Mwoyo yamuhelesia.

⁹Niko akachila khumusaayilanga khasotso okhurula olwa khwahulila akenywe. Khurebanga Nyasaye amwitsusie nobumanyi khukobulalilo bubwe, nende obulwenyukhu bwosi nende obumanyilisi obwo Mwoyo uwe ahaananga.

¹⁰Ma mube abanyala okhumenya obwo Mwami yenyanga ne hali khasotso namukholenge akayanzisianga Omwami. Obulamu bwenywe nabuleere tsimbila tsiosi etsiobukholi obulahi ma namukhule mukhumumanya Nyasaye.

¹¹Mukholwe abakufu nende tsingufu tsiosi etsirulanga mubukhonyi bwobunyali bubwe, kho mube abanyala okhwefwila ebindu biosi nende obwesimilisi,

¹²khandi nende obusangali mukhupile Papa embwo, owamunyal'la okhusanga khuka Nyasaye yabikhila abandu baabe mubwami bwobulafu.

¹³Yakhuhonia okhurula mubunyali bwesiilima, nakhura mubwami bwo Mwanawe omuyanzwa.

¹⁴Muye khuli nokhununulwa khwefwe, mbu tsimbi tsiefwe tsilekheywe.

¹⁵Kristo nokhufwana okhulolekhanga okhwa Nyasaye oralolekhanga. No mwana musiani owebulwa wokhuranga, omukhongo okhuyomba ebialongwa biosi.

¹⁶Okhuba muye ebindu biosi biali okhulombwa, ebili mwikulu nende ebili khusibala, ebindu ebilolekhanga nende ebiralolekhanga; nimulimwo obunyali bwomwoyo, abaami, abaruchi, nende abobunyali. Nyasaye yalomba ebindu biosi ebiomwikulu nende ebiomusibala okhubir'ra muye khandi khululwe.

¹⁷Kristo yaliho ebindu biosi nibiraabaho tawe, ne muye ebindu biosi bionganibwanga halala.

¹⁸Niye omurwe kwomubili, nakwo nelikanisa. Niye obuchachilo bwobulamu bwomubili. Niye Omwana wambeli wokhuranga owasimukusibwa okhurula mubafu mbu abe oweimbeli mubindu biosi.

¹⁹Okhuba khwali okhwenya khwa Nyasaye mbu Omwana abe neliiba liosi elia Nyasaye.

²⁰Okhubir'ra mu Mwana, Nyasaye yachooma okhuhambania ebindu biosi khuye. Yalera omulembe okhubir'ra mukhufwa khwo Mwanawe khumusalapa ma kho nahambania ebindu biosi ebili musibala nende mwikulu khuye omwene.

²¹Olundi mwalinji ehale okhurula khu Nyasaye ma mwalinji abasuku baabe khulwe ebindu ebibi ebiamwakhola nende okhupaala.

²²Ne luno, khulwa okhufwa khwomubili khwo Mwana uwe, Nyasaye wamukhola okhuba abalina baabe, kachile amuleere inywe nimuli abatsienukhu abarali nesikha imbeli uwe,

²³mukwan'ne okhutsitsachil'la mubusubili, nimuralila, khumusinji omuralilu khandi okwatooto, ma murahuchil'la okhutechesibwa okhurula khukhunaya okhwamwanyoola olwa mwahul'la Amang'ana Amalahi. Kali khulwa amang'ana yaka mbu Ise, Paulo, ndakwa omurumwa wako; amang'ana yaka akakambwa khumundu wosi musibala.

²⁴Ne luno sangalanga khulwa okhusalila khwanje khulwe inywe, okhuba mukhusalila khwanje khwomubili, khonyel'langa okhuhesia esiali nisiasikala mukhusalila khwa Kristo, khulwo omubili kukwe nikwo okuli likanisa.

²⁵Nase Nyasaye niye owali okhuukhola omurumikhili welikanisa, ma, niyambelesia omulimo yiku okhukhola khulwenywe. Nomulimo kwokhukamba ling'ana lia Nyasaye mubweyinikhu,

²⁶elili libiso eliayabisa okhurula khubandu bosi mumatukhu kali kakhale, ne luno liabisulwa khubandube.

²⁷Obuloosie bwa Nyasaye nokhubisula libiso lilie limanyikhe khubandu baabe, libiso liobuhinda ma elioluyali eliali n'nalio khulwa abandu bosi. Ne libiso tsana lili mbu, Kristo ali mwinywe, eliboolanga mbu mwakhasange muluyali lwa Nyasaye.

²⁸Kho khukambanga Kristo khusiomundu. Khuchetsiyianga nikhumwibaal'la mubuchesi bwosi, mbu khuhane siomundu khu Nyasaye nali omundu wahela nali mu Kristo.

²⁹Yaka nikenya kekhole nyakhananga mubutinyu, nirumikhilanga obunyali netsingufu etsia Kristo ahaananga ma etsitiyanga mu ise.