Read lunyore BAKOLOSAI 2 Bible Online

BAKOLOSAI 2 - lunyore bible

BAKOLOSAI 2

¹Lekhe mubool'le singa obwa ndatiya butinyu khulwenywe khandi khulwe yabo abali Laodikia, nokhuyabo bosi abasili okhundolakhwo moni namoni.

²Kholanga mbu kho betsusibwe nolutswoni ma babe abakhweswa halala mubuyanzi, ma babe nobusubisie khubuhinda bwosi obwokhumanyilisia khwa habwene khuleranga. Munjila yiyi bakhamanye amabiso ka Nyasaye, akali mbu Kristo mwene,

³niye olufungo olwikulanga amabere kabiswa kosi akobuchesi nakokhumanya khwa Nyasaye.

⁴Mboolanga ling'ana yili mbu omundu wosi arakhamukaata namahangasi kobubehi kata kabe amalahi akafwana mbwena.

⁵Kata nimbulaho m'mubili nebutswa mbetsanga n'nenywe mumwoyo, ma sangalanga okhulola obwa okhwetembelesia khwenywe khuli okhulahi khandi obwo obusubili bwenywe buli oburalilu mu Kristo.

⁶Olwa mwahuchil'la Kristo Yesu singa Omwami, mumenye mubulala muye.

⁷Muyile emisi chienywe muusi muye mubohe obulamu bwenywe khuye, ma muralile mubusubili bwenywe, singa obwa mwebaalilwa. Ma mwitsule nokhukhupa embwo.

⁸Mwelinde mbu omundu wosi aramukhola abahambe khulwa obukaati obwabutswa obwo obuchesi bwabandu, oburulanga khubwibaali obwahanwa hasi nende abandu khandi obwarula khuburuchi bwemioyo chiesibala ne oburarulanga mu Kristo.

⁹Khulwa omwitsulu kweliiba lia Nyasaye limenyanga mu Kristo, muliiba lilie liesinamundu,

¹⁰nenywe mwahebwa obulamu obwitsulu mubuhambani muye. Niye oweikulu woburuchi obwomwoyo nende obunyali.

¹¹Mubuhambani nende Kristo mwali okhusebwa, tawe es'sebo esiakholwa nabandu, nebutswa es'sebo esialombwa nende Kristo, esichilanga nimukholwa abalakhuule okhurula mubunyali bwomundu uyu omwoni.

¹²Olwa mwabaputiswa, mwayabilwa na Kristo, ne mukhubaputiswa mwasimukusibwa halala na Kristo okhubir'ra mubusubili bwenywe mubukholi bwa Nyasaye, owasimukusia Kristo okhurula mukhufwa.

¹³Khale nenywe mwali nimwafwa esinamwoyo khulwe tsimbi tsienywe khandi khulwa mbu mwali Abetsimbia abaraali na Malako. Nebutswa luno Nyasaye wamusimukusia halala na Kristo ma wakhulekhela fwesi tsimbi tsiefwe.

¹⁴Yasilisia amahandiko amabi akamakobi kefwe nende amalako akakhwayaal'lwa, nakafukula nakafuuba elubeka nakabamba khumusalapa.

¹⁵Ne khumusalapa, Kristo yelakhuula okhurula mubunyali bwoburuchi bwemioyo nende obwobunyali; yabikhol'la esilolelo siakol'lani nabalechelesia nabemel'langa singa ababohe munjilaye yobulechi.

¹⁶Khe omundu wosi aralomba amalako khulwa ebiokhulia nohomba ebiokhunywa, nohomba khulwa akamatukhu amatsienukhu nohomba lisabo liomwesi nikulabile, nohomba eliesabato.

¹⁷Ebindu biosi ebifwana mbwo nesiinikha butswa esiebindu biamang'ana aketsanga; obwatooto ni Kristo.

¹⁸Murahuchil'la omundu wosi okhumukhalachila owelolanga okhuba omukhongo khulwa akobusukhi obuchomekhe obwayalola khandi ohandil'langa khubwetutuyi bwobubehi nende obwekayakayi khubamalaika tawe. Sila esifune siosi, omundu singa omwene uyu, yechinjil'la munjila ye yesinamundu,

¹⁹ma walekha okhuhanda khu Kristo, oli omurwe kwomubili. Hasi hobulindi bwa Kristo omubili kwosi kufwitwanga nikwonganibwa halala mubwongelo bwakwo nende ebiongan'no, ma kukhulanga singa obwa Nyasaye yenyanga kukhule.

²⁰Mwafwa halala nende Kristo ma mwalakhulwa okhurula muburuchi bwemioyo chiesibala. Busina muhuchil'langa amalako singa akaboolanga,

²¹“Murakabukule,” kata “Muratsanzama,” “Muratilakhwo khukandi”?

²²Yaka kosi kal'lomanga khubindu ebirali nobukhonyi olwa bimal'le okhurumikhilwa; namalako butswa akalombwa nomundu nende amebaalo kabandu.

²³Amalako singa yaka kalolekhanga okhuba singa akobuchesi, nende okhwekayakaya khwako okhwokhuhachibwa, nokhwetutuyia khwokhwekaatia, nende okhusalisibwa khwomubili, nebutswa kabula obukhala mukhwekaya khwokhwonyonywa khwomubili.