Read lunyore BAKOLOSAI 3 Bible Online

BAKOLOSAI 3 - lunyore bible

BAKOLOSAI 3

¹Mwasimukusibwa halala nende Kristo, kho rune ebindu ebili mwikulu, owa Kristo yekhalanga muluruba lulwe khumukhono musaatsa kwa Nyasaye.

²Chomie amakani kenywe khubindu ebili mwikulu, karabba khubindu biomusibala muno tawe.

³Okhuba mwafwa, nobulamu bwenywe bwabiswa nende Kristo mu Nyasaye.

⁴Obulamu bwenywe bwakupu ni Kristo, ne olwalibisukha, nilwo olwa nenywe khandi mulibisulwa halala nende okhusanga n'naye oluyali lulwe.

⁵Khe mwire obwekombi obunasibala obuli mwitiya mwinywe; singa obuheyi, akesifwabwi, okhwonyonywa, nokhwekomba okhubi, nesikhayilwe esili okhwekayakaya emisambwa.

⁶Khulwe ebindu ebifwana mbu lirima lia Nyasaye liakhetse khubandu abesikala marwi.

⁷Munyinga yindi nenywe mwamenyanga mukhwekomba okhufwana mbwo, olwa mwamenyanga mubulamu obufwana mbwo.

⁸Nebutswa luno okhwola mulekhe ebindu yibi biosi: lileko, oburima, obusuku, obuchiikhi nende amanyeko akarulanga muminwa chienywe.

⁹Murabool'lane obubehi tawe okhuba mwamala okhulekha ifwo yenywe ya khale, halala nokhukhola khwayo,

¹⁰ma mwayebiikha ifwo imbia. Yili neliiba liyia elia Nyasaye omulombi atsienulanga khase mukhufwana khwelikondo lilie liene, kho amuleere inywe kupu mukhumumanya.

¹¹Mumbila yene iyio, bubulaho obwabukhani hakari ho Muyunani nende Omuyahudi, owasebwa nohomba orasebwa, owasoma nende orasoma, omurende nohomba omwibule nebutswa Kristo nowabosi khandi ali mu bosi.

¹²Muli abandu ba Nyasaye; yamuyanza ma namwela okhuba abatsienukhu khululwe. Khe mwebiikhe abene omwoyo okwokhubel'lana, okwetsimbabasi, okwokhwetutuyia, nobuhoma, nokhwesimilisia.

¹³Mwefwil'lanenje abene khubene nimulekhelana olwa mulala khwinywe ali neling'ana nende owasie. Okhwola mulekhelanenje singa obwo Mwami yamulekhela.

¹⁴Okhuyomba yako kosi mumetekhwo obuyanzi obuhambanianga ebindu biosi halala mubuhambani bwahabwene.

¹⁵Omulembe kwa Kristo amuhelesianga kuliho okhumwemel'la mumapaalo akamulomba; Nyasaye wamulonga m'mubili mulala okhwitsa khumulembe yiku. Ma mukhupe embwo.

¹⁶Ling'ana lia Kristo mubuhinda bwalio okhwola limenye mumioyo chienywe. Mwibaale nimuchetsihania mubuchesi bwosi. Mwembe etsisaburi nende tsinyembo tsiokhwitsoomia, nimwembela Nyasaye nimukhupa embwo mumioyo chienywe.

¹⁷Siesindu esiamukholanga noho esiamuboola, okhwola mukholenje muliira lio Mwami Yesu nimukhupa embwo okhubir'ra muye khu Nyasaye Papa.

¹⁸Abakhasi mwelele khubasaatsa benywe sichila niko akamukwan'ne okhukhola singa abakristo.

¹⁹Abasaatsa, muyanze abakhasi benywe ne murabba abalulu khubo tawe.

²⁰Abaana, nomulimo kwenywe okwesikristo okhuhulilanga abebuli benywe sichila akene yako niko akayanzisianga Nyasaye.

²¹Abebuli, murachema abaana benywe babe nelileko khase bakhesikoka.

²²Inywe Abahambe, muhul'lenje abaami benywe abesibala mumang'ana kosi, tawe olwa bamuhengelesianga lwonyene sichila mwenyanga obukholi bwokhuyanzisia, nebutswa mukholenge nomwoyo omulahi khulwa esilongole sienywe, khulwo Omwami.

²³Ne liosi eliamukhola, mukhole nimureyekhwo omwoyo singa abakhol'langa Omwami ne tawe singa abakhol'langa abandu butswa.

²⁴Mwitsul'le mbu Omwami yakhamuhe singa omurungo yako aka yabiikhila abandu baabe. Okhuba Kristo niye Omukhongo mwene owamurumikhilanga.

²⁵Khandi siomundu okholanga obubi alarungwa khububi bwakholanga, sichila Nyasaye akhalachilanga siomundu obuhelani