Read lunyore 1 BATESALONIKE 2 Bible Online

1 BATESALONIKE 2 - lunyore bible

1 BATESALONIKE 2

¹Abaana befwe, inywe abene mumanyile mbu okhwitsa khwefwe khwinywe sikhwali okhwabutswa tawe.

²Nebutswa kata nikaba mbu khwali nikhusaliye khandi nikhunyekelwe olwa khwali Filipi singa mumanyile, khwali nolutswoni mu Nyasaye wefwe okhumukambila Amang'ana Amalahi ka Nyasaye hakari wobufukuli obwinji.

³Okhukamba khwefwe sikhuli okhwokhukosia nohomba khwesifwabwi nohomba okhwokhubehelesia omundu wosi tawe.

⁴Harali khuboolanga obwa Nyasaye yenyanga, sichila ye wakhubala abakwan'ne okhusubilwa na Mang'ana Amalahi. Sikhutemanga okhuyanzisia abandu tawe, harali okhumuyanzisia Nyasaye omanyile amakani kemioyo chiefwe.

⁵Inywe mumanyile obulahi bwene mbu ifwe sikhwayitsa khwinywe namang'ana akokhubehelesia, nohomba akokhufunikhila obulangu tawe — Nyasaye nomukobokheli wefwe!

⁶Sikhwaruna oluyali okhurula khubandu, kata khu inywe nohomba khubandi bosi tawe, nebutswa khwakhanyal'le okhumubanza amang'ana nalebe kata olwa khuli abarume ba Kristo.

⁷Nebutswa khwamuyanza olwa khwali mwinywe singa obwa nyinabaana alelanga abaanabe omwene.

⁸Kho, khulwo obuyanzi bwefwe khwinywe, sikhwayehinia okhumuha Amang'ana Amalahi ka Nyasaye konyene tawe, nebutswa khwehinia okhuhana obulamu bwefwe abene. Mwali okhukhuyanzisia okhusila!

⁹Okhuba mwitsul'langa abaana befwe, obwa khwakhola emilimo butukhu nom'basu, nikhunyakhana! Khwatiya obutukhu nom'basu mbu khulekhe okhumusitohela nyinga khumukambilanga Amang'ana Amalahi ka Nyasaye.

¹⁰Inywe muli abakobokheli befwe halala na Nyasaye mbu ifwo yefwe khwinywe abasubilanga yali inzienukhu, inunji, khandi sila obusiamu.

¹¹Mumanyile obwa khwamuchetsiyia siamulala khwinywe singa obwa samwana akhol'langa abaana baabe omwene.

¹²Khwamutsuba, nikhumuhotselesia, nende okhumulaka, mbu mumenye obulamu obwokhumuyanzisia Nyasaye, omulanganga okhuhambana mu Bwamibwe nomubukhongobwe.

¹³Siliho esifune sindi esichilanga nikhumukhupila Nyasaye embwo khasotso. Olwa khwamuler'ra ling'ana lia Nyasaye, mwalihul'la nimulihuchil'la; tawe singa ling'ana liabandu harali singa obwa lili tooto ling'ana lia Nyasaye, elikholanga emilimo mwinywe abasubilanga.

¹⁴Abaana befwe, amang'ana amatelwa kekholekha khwinywe singa obwa kekholekha khumakanisa ka Nyasaye akali mu Buyahudi khubandu bebwene iyio abali aba Yesu Kristo. Mwakhupibwa esibi nabandu aboluyia lwenywe, singa obwa nabo bakhupibwa esibi na Bayahudi basiabwe;

¹⁵abeera Omwami Yesu nende abaroobi bosi, ma nibakhukhupia ifwe esibi. Abandu yabo sibamuyanzisia Nyasaye tawe, khandi nabasuku babandu bosi!

¹⁶Bateema okhukhwikal'la mbu khurakamba khu Betsimbia amang'ana akakhachila bahonibwe tawe. Mukhukhola mbwo, bali nibahesianga esichelo sietsimbi tsiabwe etsia bakholanga amatukhu kosi. Ne luno lirima lia Nyasaye limal'le okhubetsela olwokhumal'likha!

¹⁷Ne abaana befwe, olwa khwabukhanibwa n'nenywe khumatukhu matititi mumubili ne tawe mumwoyo, khwali namahofu amenji ne khwekomba muno okhumulola khandi mumoni mwenywe.

¹⁸Khwekomba okhukalukha khwinywe. Ise omwene, khubwanje ndateema luusi na khase okhwitsa, nebutswa Setani yakhusibila.

¹⁹Okhuba nibena abali okhunaya khwefwe nohomba obusangali kata olusimbi lwefwe olwokhweyitsomia imbeli wo Mwami wefwe Yesu, olwalitsa? Simuli ninywe?

²⁰Okhuba ninywe oluyali lwefwe, khandi obusangali bwefwe!