Read lunyore 1 BATESALONIKE 3 Bible Online

1 BATESALONIKE 3 - lunyore bible

1 BATESALONIKE 3

¹Khulwe yako sikhwakhatsililiye okhwefwila okhuba ehale n'nenywe khandi tawe. Kho khwalola mbu nobulahi khusikale fwenyene Atsene

²ne nikhuruma omwana wefwe Timoteo omukholi wasiefwe muburumikhili bwa Nyasaye mukhukamba Amang'ana Amalahi ka Kristo okhumukufuhasia khandi okhumukhonya mubusubili bwenywe,

³mbu omundu wosi khwinywe alekhe okhukalukha inyuma mubusubili khulwa okhukhupibwa esibi yikhwo. Okhuba inywe abene mwamanya okhukhupibwa esibi yikhwo khuli halala nobulalilo bwa Nyasaye.

⁴Okhuba tooto mwene, olwa khwali n'nenywe khwekholel'la okhumubool'la khale mbu, nakhukhupibwe esibi, ne singa mumanyile, yako niko akekhola.

⁵Niko akachila niruma Timoteo khwinywe. Sindakhatsililiye okhwefwila tawe, kho ndamuruma okhumanyilisia akobusubili bwenywe. Siahene kakhabeye mbu Setani yakhaba namuteemele ma emilimo chiefwe echiakhwakhola mwinywe nichiba echiabutswa!

⁶N'nondi Timoteo ucheleye khwifwe narula khwinywe, ne yakhuler'ra amang'ana amalahi akobusubili bwenywe nobuyanzi bwenywe. Ukhubooleye mbu mukhwitsul'langa bulahi amatukhu kosi, nimuli namahofu okhukhulola, singa obwa nefwe khuli n'nako okhumulola.

⁷Kho abaana befwe mumanyakhano kefwe kosi nende mukhukhupibwa esibi khuhotselesibwanga khulwe inywe okhubir'ra mubusubili bwenywe.

⁸Okhuba luno khuli mwoyo, inywe nimuba nimuralila mubulamu bwenywe mu Mwami.

⁹Luno khunyala okhukhupa embwo khu Nyasaye khulwe inywe. Khumukhupilanga embwo khulwo obusangali obwa khusangalanga khulwenywe imbeli wa Nyasaye wefwe.

¹⁰Butukhu nom'basu khusaayanga Nyasaye nomwoyo kwefwe kwosi mbu akhuhuchil'le khumulole moni namoni, nikhuhesia yako akamutakhanga mubusubili bwenywe.

¹¹Kho luno Nyasaye khandi Papa wefwe omwene, halala no Mwami Yesu, bakhwikul'le injila khwitse khwinywe.

¹²Khandi Omwami amunyal'le okhumeetekha nimusilana mubuyanzi obwa abene khubene, nende okhuyanza abandu bosi ma bube obwinji singa obwo obuyanzi bwefwe khu inywe buli.

¹³Munjila iyi ye alaralisia emioyo chienywe, nenywe mulaba abakol'lokhu khandi abatsienukhu imbeli wa Nyasaye khandi Papa wefwe olwa Omwami wefwe Yesu yakhetse halala nende abatsienukhu baabe bosi.