Read lunyore 1 BATESALONIKE 4 Bible Online

1 BATESALONIKE 4 - lunyore bible

1 BATESALONIKE 4

¹Kho eliokhumal'likha, abaana befwe, mweka okhurula khwifwe obwa mukwana okhumenya kho muyanzisie Nyasaye. Tooto mwene nimbwo mumenyanga. Ne luno khumusaayanga nikhumuhomba mbu mutsilil'le muliira lio Mwami Yesu musilane mukhukhola mbwo.

²Okhuba mumanyile amalako aka khwamuha mubunyali bwo Mwami Yesu.

³Nyasaye yenyanga mube abatsienukhu khandi ababoholole kupu okhurula mubuheyi.

⁴Siamulala khwinywe akwana okhumanya obwokhumenya nomukhasiwe mubutsienukhu nende oluyali olulahi,

⁵oburakhola obwonyonywi bwokhwekomba singa Abetsimbia tsindi abaramumanya Nyasaye.

⁶Kho omundu wosi aramwonela kata okhumukhol'la omwana wabwe obubi khwing'ana lino tawe. Khwaseka okhumubool'la khandi khwamuchetsiyia mbu Omwami yakhamale es'sialia khu yabo abakholanga yako.

⁷Nyasaye siyakhulanga khumenye obulamu bwesifwabwi tawe, nebutswa khumenya mubutsienukhu.

⁸Kho omundu wosi owakhasuula amebaalo yaka sasulanga omundu tawe, habula Nyasaye omuhetsanga Omwoyo uwe Omutsienukhu.

⁹Libulaho elichila muhandichile khukokhuyanza abasubili basienywe. Inywe abene mwechesibwa nende Nyasaye okhuyanzananga.

¹⁰Ne tooto, mumanyianga obuyanzi khubaana befwe bosi abali Makedonia yosi. Abaana befwe, khumuchetsiyia mbu musilane okhukhola mbwo.

¹¹Munaye okhumenya obulamu obuholelu. Siomundu ahenge amang'anake omwene nokhukhola emilimo namakhonoke, singa obwa khwamulaka olwokhuranga.

¹²Munjila iyi namunyoole oluyali ol'lahi okhurula khuyabo abarali abasubili, khandi sinamutakhe obukhonyi okhurula khumundu wosi khukamutakhanga tawe.

¹³Abaana befwe, khwenyanga mumanye obwatooto obwe yabo abamala okhufwa kho mulekhe okhubeelela singa yabo ababula obunayi.

¹⁴Khusubilanga mbu Yesu yali okhufwa ma nasimukukha, khandi nimbwo khusubilanga mbu Nyasaye yakhakalusie halala na Yesu yabo bosi abamala okhufwa nibamusubilanga.

¹⁵Lino eliakhumubool'langa neliechesio lio Mwami: mbu ifwe abasili mwoyo khwitukhu liokhwitsa khwo Mwami, sikhwakhabaranjil'le yabo abamala okhufwa tawe.

¹⁶Khuliba nomulangisio kwokhulaka halala nomwoyo kwom'malaika omukhulundu nomwoyo kwolwika lwa Nyasaye, ma Omwami mwene alekha okhurula mwikulu. Yabo abafwa nibasubilanga mu Yesu balasimukukha mbelio;

¹⁷ma ifwe ababa nikhusiliho mwoyo olwene yilwo khulabukulwa halala n'nabo mumalumbesi okhwakana no Mwami mumiiya. Ma kho khulabetsanga no Mwami mbwo amatukhu kosi.

¹⁸Kho muhotselesanienje emioyo nende amang'ana kano.