Read lunyore 1 BATESALONIKE 5 Bible Online

1 BATESALONIKE 5 - lunyore bible

1 BATESALONIKE 5

¹Abaana befwe, libulaho elichila khumuhandichile khumang'ana aketsinyinga nemihika, olwa Omwami yakhakalukhe.

²Okhuba inywe abene mumanyile bulahi mbu Litukhu lio Mwami liakhetse singa omwibi yetsanga butukhu.

³Olwa abandu baboola mbu, “Omulembe kuliho, khandi buli sindu sili bulahi” nilwo matetekhana olwokhumalwa khulakwa khubo singa inumwa yitsa khumukhasi oli inda; ne abandu sibalahonokokha tawe.

⁴Nebutswa inywe abaana befwe, simuli musiilima tawe, khandi Litukhu yilio liramukosa singa omwibi tawe.

⁵Inywe mwesi muli abandu bobulafu, khandi abandu bom'basu. Sikhuli abobutukhu, kata abesiilima tawe.

⁶Kho khurakona tsindoolo singa abandu bandi tawe; nebutswa khubetsenje meso khandi abetsimoni ndafu.

⁷Abakonanga tsindoolo bakonanga butukhu, nabo abakholwanga namalwa bakholwanga namalwa butukhu.

⁸Ne ifwe olwa khuli abom'basu khukwana okhuba tsimoni ndafu. Khwebiikhe obusubili nobuyanzi singa ebitsengwa biokhusilifu, obunayi bwobuhonia nabwo singa esikutu.

⁹Nyasaye siyakhwahula okhusalisibwa muburimabwe tawe, nebutswa yakhuraho khunyoole okhuhonibwa okhubir'ra mu Mwami wefwe Yesu Kristo,

¹⁰owakhufwila mbu khumenyenje halala n'naye kata olwa khuli abalamu, nohomba kata olwa khufwa.

¹¹Khulwe yako, muhotselesanienje, nimwombokhana abene khubene singa obwa mukholanga.

¹²Abaana befwe, khumusaaya mbu muhane oluyali olulahi khu yabo abakholanga emilimo hakari wenywe, abamwemel'langa nibamwibaal'la mubulamu Bwobukristo.

¹³Mubahelesie oluyali olukhongo nimubayanza khulwe emilimo chiabakholanga. Mumenyenge nomulembe abene khubene.

¹⁴Abaana befwe, khumuhomba mbu muchetsiyie abakara, mutinyilisie abafwiye emioyo, mukhonye ababula tsingufu, nimwesimilisia khubandu bosi.

¹⁵Mulole mbu omundu wosi ararunga owasie obubi khubundi tawe, nebutswa amatukhu kosi mulole mbu mukholanga amalahi abene khubene, khandi khubandu bosi.

¹⁶Musangale amatukhu kosi,

¹⁷musaayenje amatukhu kosi,

¹⁸mukhupenge embwo mumang'ana kosi. Yaka niko aka Nyasaye yenyanga okhurula khwinywe mu Yesu Kristo.

¹⁹Murekal'la Omwoyo Omutsienukhu tawe.

²⁰Murachiaya amang'ana koburoobi tawe.

²¹Muchele amang'ana kosi, nimuhanda khukali amalahi,

²²ma mwehanye khububi bwetsimbila tsiosi.

²³Nyasaye ohaananga omulembe amukhole abatsienukhu munjila tsiosi ma alindenje omwoyo namakani, nende emibili chienywe chiosi okhuba sila esikha okhwola olwo Omwami wefwe Yesu Kristo alitsa.

²⁴Nyasaye omulanganga alakakhola, okhuba ye nomusubilwa.

²⁵Abaana befwe, mukhusaayilenjekhwo.

²⁶Musiesie abasubili bosi nobuyanzi bwobuta.

²⁷Muhombanga mubunyali bwo Mwami mbu, musomele abaana befwe bosi ebarwa yino.

²⁸Esirenda sio Mwami wefwe Yesu Kristo sibe n'nenywe.