Read lunyore YOSHWA 1 Bible Online

YOSHWA 1 - lunyore bible

YOSHWA 1

¹Olunyuma lwokhufwa khwa Musa, omurumikhili wo MWAMI, OMWAMI yal'loma khumukhonyel'li wa Musa olangwanga Yoshwa omwana wa Nuni.

²Yamubool'la mbu, “Omurumikhili wanje Musa ufwiye. Werechekhe luno, ibe nende Abaisiraeli bosi, ma mwambukhe omuchela kwa Yorodani mutsie musibala esiamuhelesianga.

³Singa ndabool'la Musa, mal'le okhukhuhelesia ibe nende abandu banje bosi liloba liosi lia namusenekhwo.

⁴Tzinzakho tsienywe natsiole okhurula khusitsimi esili enandete okhwola khubikulu bia Lebanoni ebili esinyolu; okhurula khumuchela omukhongo okwa Efurate okuli ebukwe, okhubir'ra musibala sia Bahiti okhwola khunyanza ya Mediterenia eli emasaba.

⁵Yoshwa, saliho owakhakhuleke oluhono lwosili omulamu tawe. Ndakhabe n'nawe singa obwa ndabeyenje nende Musa. Ndakhabe n'nawe khasotso; sindikhulekhakhwo tawe.

⁶Obe orekhwo esinani ma obe neikholo, sichila wakhabe omwemeli wabandu yaba nibenjilanga musibala yisi esiandasubisia abakuka babwe.

⁷Obe butswa owesinani, ma obe neikholo; ma olole mbu ulondile Amalako kosi akomurumikhili wanje Musa yakhuhelesia. Orakhachaayakhwo esitonye siosi esia Malako tawe ma nobetsenje omulechi buli habundu aha notsitsenge.

⁸Olole mbu esitapu sia Malako sisomwanga khasotso mubwekayakayi bwenywe. Osisome mubweyinikhu om'basu nobutukhu, ma olole mbu ulondile amalako kosi akahandikwa mwo. Ma nohindihale khandi nonyole amalahi mukosi akokholanga.

⁹Witsul'le mbu mal'le okhulaka orekhwo esinani ma obe neikholo! Orabba noburi nohomba okhwesikoka tawe, sichila Ise, OMWAMI Nyasaye uwo ndi n'nawe hosi ahotsitsanga.”

¹⁰Ma Yoshwa nalaka abemeli

¹¹batsie nibabir'ra mukambi nibabool'la abandu mbu, “Rechekhe ebiokhulia, sichila mumatukhu kataru namube nimwambukhanga omuchela kwa Yorodani okhwinjila musibala esio MWAMI Nyasaye wenywe amuhelesianga.”

¹²Yoshwa yabool'la abolwibulo lwa Rubeni nende Gadi nende enusu yabolwibulo lwa Manase mbu,

¹³“Mwitsul'le singa Musa, omurumikhili wo MWAMI, yamubool'la mbu OMWAMI Nyasaye wenywe namuhe esibala yisi esili ebukwe womuchela kwa Yorodani singa ingo wenywe.

¹⁴Abakhasi benywe nabaana benywe nabamenye hano halala, netsing'ombe tsienywe. Nebutswa abasikari benywe, aberechekhele khulwe lihe nabambukhe okhutsia injelekha imbeli wa Baisiraeli basiabwe babe abokhubakhonya.

¹⁵Nababakhonye okhwola nababe nibenjiye nokhubukula lilola elili emasaba womuchela kwa Yorodani aho MWAMI Nyasaye wabwe yabahelesia. Namal'le okhuhaana omulembe khubetsinzibulo etsia Isiraeli tsiosi, nilwo olwa nenywe namukalukhe okhumenya hano musibala sienywe abene esia Musa, omurumikhili wo MWAMI yamuhelesia esili ebukwe wa Yorodani.”

¹⁶Bakalusia Yoshwa nibaboola mbu, “Nakhukhole amang'ana kosi akokhubooleye khandi nakhutsitsenge habundu hosi aha nokhurumenje.

¹⁷Nakhulondenge amang'anako singa khwalondelenge aka Musa khasotso, ma OMWAMI Nyasaye uwo abe n'nawe singa obwa yabeyenge nende Musa!

¹⁸Omundu wosi owanobe nende honzoni khukobunyali bubwo nohomba owanofukulekhwo liosi liosi khumalako kaako nayerwe. Obe owesinani khandi oweikholo nyomu.”