Read lunyore YOSHWA 10 Bible Online

YOSHWA 10 - lunyore bible

YOSHWA 10

¹Adonisedeki, omuruchi wa Yerusalemu yahul'la mbu Yoshwa yali nalekele litookho lia Ai ma nalilumuluye liosi nende omuruchi walio. Khandi yahul'la mbu abandu ba Kibeoni bali nibalombele omulembe nende Abaisiraeli ma bali nibamenyanga halala n'nabo.

²Abandu ba Yerusalemu babengukha okhuyaka sichila Kibeoni liali litookho likhongo singa elala khumatookho akalinji nomuruchi. Liali likali okhuyomba Ai, ne abandu balio bali abalwani abalulu.

³Kho Adonisedeki yaruma amang'ana kano khu Hohamu omuruchi wa Heburoni, Piramu omuruchi wa Yarimutsi, Yafia omuruchi wa Lakishi, nende khu Debiri omuruchi wa Ekiloni;

⁴naboola mbu, “Yitse muukhonye okhuseera Kibeoni, sichila abandu balio balombele indakano nende Yoshwa halala na Baisiraeli.”

⁵Abaruchi barano yaba aba Baamori, mbu abaruchi ba Yerusalemu, Heburoni, Yarimutsi, Lakishi, nende Ekiloni, basangana halala mwihe, nibafumbila Kibeoni ma nibaliseera.

⁶Abandu ba Kibeoni barumila Yoshwa ling'ana mukambi Giligali nibamubool'langa mbu, “Orakhulekha tawe, Omwami! Yitsa bwangu okhukhonye! Khuhonie! Abaruchi ba Amori bosi abamenyanga mubikulu bahamban'ne mwihe ma bakhuseer're!”

⁷Kho Yoshwa nende abasikari bosi, nibatsokan'ne nende abalwani abalulu, bachiaka okhutsia okhurula Giligali.

⁸OMWAMI nabool'la Yoshwa mbu, “Orabbaria tawe. Mal'le okhukhuhelesia obulechi. Kata mulala khubo sinabe onyala okhumulwana tawe.”

⁹Obutukhu bwosi Yoshwa nabasikaribe bachenda okhurula Giligali okhutsia Kibeoni, ne baseera Abaamori bungoyingoyi.

¹⁰OMWAMI yakhola Abaamori okhuba neindenga ingali olwa balola abasikari ba Baisiraeli. Abaisiraeli babasinzila ha Kibeoni ma nibabakhunga okhukongoma esikulu nibabira Betsi Horoni, nibatsilil'langa okhuseera okhwola Aseka nende Makeda akali enandete.

¹¹Olwa Baamori bali nibelukhanga khusikongomo okhurula khumukanda kwa Baisiraeli, OMWAMI yakhola amachina amakali akeifula okhukwa khubo oluchendo lwosi okhwola Aseka. Abenji beerwa nende amachina keifula okhuyomba aberwa na Baisiraeli.

¹²Litukhu lio MWAMI yaheelamwo abandu ba Isiraeli obulechi khu Baamori, Yoshwa yal'loma khu MWAMI imbeli wa Baisiraeli naboola. “Eliuba, sinjila hekulu ha Kibeoni yaho; Omwesi, sinjila hekulu khulibanda lia Aijaloni.”

¹³Eliuba liasinjila butswa habwene yaho ne omwesi sikwayesundakhwo tawe okhwola olwe lihanga lialeka abasuku balio. Yaka kahandiikwa musitapu sia Yashari. Eliuba liasinjila hakari welikulu ma siliayeela khulwe litukhu liosi tawe.

¹⁴Sikayekholakhwo mbwo khale tawe; khandi kasili okhwekholekhakhwo litukhu lindi akafwana singa yako olwo MWAMI yahulila ma nakhola akomundu namundu butswa. OMWAMI yalwan'na Abaisiraeli!

¹⁵Inyuma weyaka, Yoshwa nende omukandakwe okwelihe bakalukha mukambi Giligali.

¹⁶Abaruchi barano ba Amori, bali nibelukhile ne bali nibebisile mulwanga oluli Makeda.

¹⁷Omundu yabanyoola, ma nabool'la Yoshwa ahabali nibebisile.

¹⁸Ma naboola, “Kongomiekhwo amachina amakali katsie mubwinjil'lo bwoluhangaywa. Mureho abalindi,

¹⁹nebutswa inywe abene murekhalaho tawe. Mutsilil'le okhubalondel'la ma mubaseere okhurul'la inyuma, murabbahuchil'la okhwinjila mumatookho kabwe tawe! OMWAMI Nyasaye wenywe umuheye obulechi khubo.”

²⁰Yoshwa nende abandu ba Isiraeli babera, nebutswa abalala nibanyoola ahokhuhonela mukari wamasisi kelitookho ma sibayirwa tawe.

²¹Ma abandu ba Yoshwa bosi bakalukha mukambi Makeda nibali abalamu. Kata siyaliho omundu wosi musibala owakhal'lomele obubi khu Baisiraeli tawe.

²²Ma Yoshwa nababool'la, “Yikule obwinjil'lo bwo luhangaywa ma munder're abaruchi barano yabo.”

²³Kho oluhangaywa lwekulwa, ne abaruchi ba Yerusalemu, Heburoni, Yarimutsi, Lakishi, nende Ekiloni baleerwa esioba

²⁴ma nibahilwa aha Yoshwa yali. Yoshwa nalanga Abaisiraeli bosi nabo nibeetsa khuye ma nalaka abakhongo abali nibatsiye n'naye betse khuye ma bare ebilenje biabwe khumakosi kabaruchi. Nibakhola mbwo.

²⁵Ma Yoshwa nabool'la abakhongo baabe mbu, “Muraria nohomba okhwesikoka tawe. Mube nesinani khandi abeikholo sichila yaka niko ako MWAMI atsitsanga okhukhol'la abasuku benywe bosi.”

²⁶Ma Yoshwa niyeera abaruchi nabasunga khumisaala chirano, ma emibili chiabwe nichihongakhwo okhwola mukolooba.

²⁷Eliuba niliyeelanga Yoshwa yahaana lilako, ma emibili chiabwe nichiakulwa nichifubwa muluhangaywa omwabali nibebisilenje khale. Amachina amakali karebwa mubwinjil'lo bwoluhangaywa ma kasiliho okhwola leelo.

²⁸Yoshwa yaseera ma naleka Makeda nende omuruchi walio litukhu yilio. Yali okhwira siomundu mwitookho yimwo. Siyaliho omundu owalekhwa nali omulamu tawe. Yakhol'la omuruchi wa Makeda singa obwa yakhol'la omuruchi wa Yeriko.

²⁹Olunyuma lweyaka, Yoshwa nende omukanda kukwe okwelihe barula Makeda nibatsia Libuna ma nibaliseera.

³⁰OMWAMI khandi yakhola Abaisiraeli nibaleka litaala yilio nende omuruchi walio. Sibalekhakhwo omundu wosi tawe, nebutswa beera siomundu wosi owalimwo. Bakhola omuruchi akabali nibakhol'lakhwo omuruchi wa Yeriko.

³¹Olunyuma lweyaka, Yoshwa nende omukanda kuukwe okwelihe barula Libuna nibatsia Lakishi, nibalibotokhana ma nibaliseera.

³²OMWAMI yahaana obulechi khu Baisiraeli nibaleka Lakishi mwitukhu liakhabili eliobulwani. Singa butswa obwabali nibakhol'le Libuna, sibalekhakhwo omundu wosi tawe, nebutswa beera siomundu mwitookho.

³³Horamu omuruchi wa Keseri yeetsa akhonywe Lakishi, nebutswa Yoshwa yamuleka halala nomukanda kukwe okwelihe ma siyalekhakhwo omundu wosi khubo nalimwo tawe.

³⁴Olwalondakhwo, Yoshwa nomukanda kukwe okwelihe barula Lakishi nibatsia Ekiloni, nibalibotokhana ma nibaliseera.

³⁵Balileka mwitukhu elala ma nibeera siomundu wosi owalimwo, singa butswa obwabali nibakholeye litookho lia Lakishi.

³⁶Olunyuma lweyaka, Yoshwa nende omukanda kukwe okwelihe barula Ekiloni nibatsia mubikulu okhwola Heburoni, nibaliseera

³⁷ma nibaleka. Bali okhwira omuruchi nende siomundu wosi owali mwitookho yilio kata khandi mumatookho kandi akali ahembi nende Heburoni. Yoshwa yalaka mbu litookho limululwe liosi, singa obwa yali nakhol'le khu Ekiloni. Sialiho omundu wosi owasikala nali omulamu tawe.

³⁸Ma Yoshwa nende omukanda kukwe okwelihe nibasukhana khu Debiri nibaliseera.

³⁹Balileka nende omuruchi walio nende amataala kandi kosi akali ahembi n'nalio. Nibeera siomundu wosi owaliho. Yoshwa yakhola khu Debiri nende omuruchi walio akayali nakholeye Heburoni nende Libuna nende omuruchi walio.

⁴⁰Yoshwa yaleka esibala siosi nalekel'la abaruchi besibala siokhusikulu, esikongomo siebukwe, nende hasi webikulu biemasaba ma kata nende yabo abokhusibala esiomu elubeka lwemasaba. Siyalekhakhwo omundu wosi tawe; siomundu yali okhwirwa. Yaka niko aka Omwami Nyasaye wa Baisiraeli yali niyalaka.

⁴¹Obulechi bwa Yoshwa bwali okhurula Kadeshi Barinea khulubeka lwemasaba okhwola Gasa nende okhwola mulusoma lwa Gosheni, nende okhutsia Gibeoni elili esinyolu.

⁴²Ma Yoshwa nabukula abaruchi bosi nende esibala siabwe siosi khunyinga ndala, sichila OMWAMI Nyasaye wa Baisiraeli yali nalwaniye Abaisiraeli.

⁴³Olunyuma weyaka Yoshwa nende omukanda kukwe okwelihe bakalukha okhutsia mukambi aha Giligali.