Read lunyore YOSHWA 11 Bible Online

YOSHWA 11 - lunyore bible

YOSHWA 11

¹Olwa amang'ana kobulechi bwa Isiraeli kol'la Omuruchi Yabini owa Hasori, yaruma oburume khumuruchi Yobabu wa Madoni, khubaruchi ba Shimuroni nende Akishafu,

²nende abaruchi bomubikulu ebili esinyolu, mwibanda lia Yorodani enandete we inyanza ya Galilaya, hasi webikulu nende ahembi neinyanza ya Dori.

³Yaruma oburume khu Bakanaani abali khutsimbeka tsiosi etsia Yorodani, nende khu Baamori, Abahiti, Abaperisi nende Abayebusi musibala siebikulu kata Abahiwi abamenya hasi wesikulu sia Herimoni musibala sia Misipa.

⁴Bali okhwitsa nende abasikari abali omukanda kwabandu belihe nende abandu abenji singa omuyekhe kwokhunyanza. Bali khandi nende etsisululi tsinyinji nende amakaari ketsisululi.

⁵Abaruchi yaba bosi bahambania halala tsingufu tsiabwe ma nibalomba ekambi hamuchela kwa Meromu balwane nende Isiraeli.

⁶OMWAMI nabol'la Yoshwa, “Orabbaria tawe. Mukamba esaa singa yino nambe nimal'le okhubeera bosi khulwa Isiraeli. Noremake etsisululi tsiabwe emisi nende okhusamba amakaari kabwe aketsisululi.”

⁷Kho Yoshwa nende abandu baabe bosi babaseera bungoyingoyi hamuchela kwa Meromu.

⁸OMWAMI yahelesia Abaisiraeli abulechi; Abaisiraeli babaseera nibabalondel'la okhwola mwibanda lia Misipa elili ebukwe. Obulwani bwatsilil'la ma siyaliho kata mulala khubasuku owasikala nali mwoyo tawe.

⁹Yoshwa yakhola khubo ako MWAMI yali nalakile; yaremaka etsisululi tsiabwe ma nasamba amakaari kabwe aketsisululi.

¹⁰Yoshwa yakalukha inyuma, naleka litookho lia Hasori ma niyeera omuruchi walio. (Mumatukhu yako Hasori liali likufu okhusila okhuyomba amahanga yako kosi khubwami yibwo bwosi.)

¹¹Bali okhwira siomundu wosi owaliho; siyaliho owasikala nali omulamu tawe, ma litookho nilisambwa nomul'lo.

¹²Yoshwa yafumila amatookho yaka kosi nende abaruchi bako, niyeeranga siomundu, singa Musa omurumwa wo MWAMI yali niyalaka.

¹³Kata mbwo, Abaisiraeli sibasambakhwo kata elala khumatookho akombokhwa khubikulu tawe, nilirali Hasori, elia Yoshwa yasamba.

¹⁴Abandu ba Isiraeli babukula ebindu ebiali ebiobuha nende tsing'ombe okhurula mumatookho ma nibabilekha khulwa okhubirumikhila. Bamala nibeera siomundu wosi; siyaliho owasikala nali mwoyo tawe.

¹⁵OMWAMI yali niyahaana amalako kaake khumurumwa uwe Musa, ne Musa yali niyakahana khu Yoshwa ma Yoshwa nakalonda. Nakhokhola siesindu singa OMWAMI yali niyalaka Musa.

¹⁶Yoshwa yaleka liloba liosi eliokhusikulu nende elili hasi wesikulu, eliesinyolu nende elienandete, elubeka lwa Gosheni lwosi nende elubeka olwomu enandete walio nende olubanda lwa Yorodani.

¹⁷Tsingongo etsia babukula tsiali okhurula khusikulu sia Halaki esili enandete ahembi Edomu, okhwola Baaligadi litookho lili esinyolu mwibanda lia Lebanoni enandete wesikulu sia Herimoni.

¹⁸Yoshwa yalwana lihe nabaruchi besibala yisi khulwo oluhono olurambi, nebutswa yabafumila bosi nabera.

¹⁹Litookho elialomba omulembe nende abandu ba Isiraeli liali Gibeoni, aha abalala khu Bahiwi bamenya. Abandi bosi bali okhulekwa mwihe.

²⁰OMWAMI yali nabakhol'le okhuba nesinani okhulwana Abaisiraeli, kho babe abanyala okhulamwa bamulele kupu ma bosi berwe sila tsimbabasi. Yaka niko ako MWAMI yalaka Musa.

²¹Olwene yilwo Yoshwa yatsia namulula olwibulo lwabakufu olwalangwa Anakimu olwamenya musibala sie bikulu mu Heburoni, Debiri, Anabu nende mubibala biomusikulu biosi ebia Yuda nende Isiraeli. Yoshwa yabimuma biosi nende amatookho kabwe.

²²Abulaho omundu muba Anakimu owasikala musibala sia Isiraeli; batititi butswa, nibo abasikala mu Kasa, Katsi, nende Ashitoti.

²³Yoshwa yaleka esibala siosi singa obwo MWAMI yalaka Musa. Yoshwa yasihaana khu Baisiraeli singa esiabwe ma nasikabania mubitonye, silala khu buli lwibulo. Ma abandu nibahulukha mukhulwana lihe.