Read lunyore YOSHWA 13 Bible Online

YOSHWA 13 - lunyore bible

YOSHWA 13

¹Luno Yoshwa yali naali omusakhulu okhusila. OMWAMI namubool'la, “Oli omusakhulu okhusila, nebutswa esibala siokhubukulwa sisili esinji.

²Tsisoma tsiosi etsia Bafilisiti nende Geshuru,

³ma khandi tsisoma tsiosi etsia Abimu etsili enandete liloba elichiakila (okhurula khumuchela kwa Shihori okuli khulwakho lwe Misiri okhutsia Esinyolu khulwakho lwa Ekironi. Liloba yili liabalwanga okhuba elia Abakanaani. Abaruchi ba Bafilisiti bamenyanga Gasa, Ashitoti, Ashikeloni, Katsi, nende Ekironi.)

⁴Sisili butswa siosi esibala sia Kanaani, nende Meara (esia Basidoni bamenyanga mwo) okhwola Afeki khulwakho lwa Baamori;

⁵esibala sia Bakebali; Lebanoni siosi okhutsia ebukwe, okhurula Baaligadi esili enandete wesikulu sia Herimoni okhwola khulung'anyi lwa Hamatsi.

⁶Yimu mulimwo tsisoma tsiosi etsia Basidoni abamenyele musibala siebikulu hakari webikulu bia Lebanoni nende Misirefotsi Maimu. Nambinie abandu yaba bosi esioba olwa abandu ba Isiraeli nababe nibesundanga imbeli. Okhwola okabul'le abandu ba Isiraeli esibala, singa butswa ndakhulaka okhukhola.

⁷Luno kabula esibala yisi khubandu betsinzibulo tsirano natsine nende enusu yolwibulo lwa Manase basibukule singa esiabwe.”

⁸Abolwibulo lwa Rubeni nende Gadi nende enusu yolwibulo lwa Manase bali nibamala okhunyoola esibala esia Musa omurumikhili wo MWAMI, yali niyabahelesia; siali ebukwe womuchela kwa Yorodani.

⁹Olusoma lwabwe lwatsia okhwola Aroeri (khundulo khwelibanda lia Arinoni) nende litookho elili hakari welibanda yilio ma nilibamwo nesipaapi okhurula Medeba okhwola Diboni.

¹⁰Lwatsia okhwola khulwakho lwa Amoni ne nilubamwo amatookho kosi akali nikarukwanga nende Sihoni omuruchi wa Amori, owaruchilanga mwitookholia Heshiboni.

¹¹Mwalimwo Gileadi, tsimbeka tsia Geshuru nende Maaka; esikulu sia Herimoni siosi, nende Bashani siosi, okhwola Saleka.

¹²Mwalimwo obwami bwa Ogu, owokhumal'likha khubandu ba Refaimu, owaruchilanga mumatookho ko owali Ashitarotsi nende Etirei. Musa yali niyaleka abandu yaba ma niyabakhunga.

¹³Ne kata mbwo, Abaisiraeli sibaali okhukhunga abandu ba Geshuru nende Maaka tawe; basimenyanga mu Isiraeli okhwola leelo.

¹⁴Musa siyaali niyahakhwo abolwibulo lwa Lawi omukunda tawe. OMWAMI yali niyabool'la Musa mbu banyoolenje emisango emisambe echihanwanga khulusambwa okhuhanwa khu MWAMI Nyasaye wa Isiraeli chibe omukabwa kwabwe.

¹⁵Musa yali niyahaana esitonye silala sieliloba khubetsinyumba tsiabolwibulo lwa Rubeni sibe esiabwe.

¹⁶Olusoma lwabwe lwatsia okhwola khu Aroeri (khuluchinga lwelibanda lia Arinoni) nende litookho elili hakari welibanda yilio ne nililimwo esipaapi siosi esiabotokhana Medeba.

¹⁷Lialimwo Heshiboni nende amatookho kosi akali musipaapi. Amatookho tsana kali Diboni, Bamotsi Baali, Betsi Baalimeoni,

¹⁸Yahasi, Kedemotsi, Mefatsi,

¹⁹Kiriatsaimu, Sibima, Seretsishahari elili khusikulu esili mwibanda;

²⁰Betsipeori, elili khubikongomo biesikulu sia Pisiga, nende Betsi Yeshimotsi.

²¹Mwalimwo amatookho kosi akomusipaapi nende obwami bwosi obwa Sihoni omuruchi wa Baamori, owaruchilanga mwitookho lia Heshiboni. Musa yamuleka, kata nende abaruchi ba Midiani bano! Ewi, Rekemu, Suri, Huri, nende Reba. Yabo bosi bali nibarukakhwo esibala siomuruchi Sihoni.

²²Khu Aberwa na Abaisiraeli yalimwo omufumu walangwa Balaamu omwana wa Beori.

²³Omuchela kwa Yorodani kwali khulwakho lwelubeka lwemasaba wolwibulo lwa Rubeni. Yaka kali amatookho nende amataala akahanwa khubetsinyumba tsiabolwibulo lwa Rubeni kabe omukabwa kwabwe.

²⁴Musa yali khandi niyahaana esitonye sieliloba khubetsinyumba tsiolwibulo lwa Gadi sibe omukabwa kwabwe.

²⁵Olusoma lwabwe lwalimwo Yaseri nende amatookho ka Gileadi kosi, enusi yesibala sia Amoni okhutsia Areori, elili ebukwe wa Rabba.

²⁶Esibala siabwe siali okhurula Heshiboni okhwola Ramatsi Misipa nende Betonimu, okhurula Mahanaimu okhwola khulwakho lwa Lodebari.

²⁷Mwibanda lia Yorodani mwalimwo Betsi Haramu, Betsinimira, Sukotsi, nende Safoni, nende liloba lindi liosi eliobwami obwa Sihoni omuruchi wa Heshiboni. Olwakho lwabwe olwemasaba lwali omuchela kwa Yorodani ikhwola khunyanza ye Galilaya eli esinyolu.

²⁸Yaka kali amatookho nende amataala akahanwa khubetsinyumba tsiolwibulo lwa Gadi kabe omukabwa kwabwe.

²⁹Musa yali niyahaana esitonye sieliloba khubetsinyumba tsienusu yolwibulo lwa Manase sibe omukwa kwabwe.

³⁰Olusoma lwabwe lwali okhwola khu Mahanaimu ma lwalimwo Bashani yosi, obwami bwosi bwa Ogu, omuruchi wa Bashani, khumataala kosi amakhumi kasasaba aka Yairi mu Bashani.

³¹Kalimwo enusu yesitonye sia Gileadi kata nende Ashitarotsi nende Edirei, amatookho amakali Bashani esili mu bwami bwa Ogu. Yaka kosi kahaanwa khu enusu yetsinyumba tsiolwibulo lwa Makiri omwana wa Manase.

³²Nimbwo Musa yakabula esibala esili ebukwe wa Yeriko nende Yorodani olwa yali musipaapi sia Moabu.

³³Musa siyahaanakhwo liloba liosi khubandu bolwibulo lwa Lawi tawe. Yababool'la mbu omukabwa kwabwe nakubetsenje khubihanwa ebihanwanga khu MWAMI Nyasaye wa Isiraeli.